¹ Naho zay le tsy manan-tahegne rehe, o ndaty reo, nareo mitsara ao, fa ty itsarao ty hafa ro agnomezao tahegne ty vatao. Fa ihe mitsara ao le manao izay avao ka. ² Fie fantantika ty fitsaran'Agnahare te arake i maregney le mivale amy ty nanao hoe zay avao ka. ³ Dineho toy, ndaty reo, i rehe mitsara iareo manao raha hoe 'zay ka ndre te manao hoe zay ka rehe. Hilay ty fitsaran'Agnahare vao rehe? ⁴ Ke ambaneo ty hamaro ty hasoa ty fagnahie, ty fandeferae, ty faharetae? Tsy fantao vao ty hasoa ty fagnahie te hitarike azo amy ty fibebahagne? ⁵ 'Zay ka le ho amy ty habeie ty hamafe naho ty tsy fibebaha ty fo areo ro amoria areo heloke amy ty vata areo amy ty fotoan-keloke, le 'zay, ty andro hanondroagne ty fitsarangne marigne Anagnahare. ⁶ Hamale ty ndaty iaby amy ty fetse manahake amy ty natao iareo Reke: ⁷ "Hagnomey arake, ty faharetagne, ty asa soa mipay fideragne, voninahitse, ty tsy havilasy, havelogne tsy misy fiafarae Reke. ⁸ Fa ze mipay hoe ty vatae, ze tsy magneke ty maregne fe ie magneke ty tsy fahamaregnagne, le hoavy ty habosehagne naho ty siake. ⁹ Andrianagnahare le hinday fahoriagne naho fahantragne amy ty fagnahy ty ndaty iaby ze nanao raty, amy ty Jiosy heke, le amy ty Grika ka. ¹⁰ Fa dera, laza, naho fiadanagne ty hoavy amy ty manao ty soa, amy ty Jiosy avao, naho amy ty Grika ka. ¹¹ Fie tsy misy fiangaragne ty mindre amin'Andrianagnahare. ¹² Fie zay ndaty iaby nanagne hakeo tsy nanagne lily le ho montso tsy managne lily avao ka, fe ie ze nanan-kakeo nagnorike ty fagnajagne ty lily le ho tsaragne arake ty lily. ¹³ Tsy ze maharendreke i lily avao ro maregne agnatrehan'Agnahare, fa ze nagnorike ty lily ro nimeage ty maregne. ¹⁴ Fie iareo kokolampe, ze tsy managne i lily, naho nanao raha mikasike ty lily fa boake amy Nagnahare, le iareo ro lily hoe ty vatae, ndre ie tsy managne ty lilie iareo. ¹⁵ Ami'zay ro hanehoa iareo fa ty asa paliavy i lily le voasoratse ampo iareo ao. Ty vetsevetse iareo ka le vavolombelogne hoe'iareo, ty raha agnate ty say iareo manokagne le magnomey tahegne na miaro iareo amy ty vata iareo naho amy Nagnahare. ¹⁶ Le hoavy ka zao ami ty andro ty andro hitsaran' Andrianagnahare ty tsiambaratelo ty olombelogne iaby, amy ty fagnombara soako, amy ty tahina i Jesosy Kristy. ¹⁷ Naho Jiosy ro hitokavao ty vatao naho miankigne amy i lily naho mitregne aman'Andrianagnahare ao, ¹⁸ le mahafantatse ty zotom-poe le mamolily ze kila raha soa vatae satria nampianaregne tamy ty lily rehe, ¹⁹ naho rese lahatse ty vatao fa mpitarike ty goa, ho ilo hoe'i ty maiegne, ²⁰ mpagnanatse ty gege, mpagnanatse ty ajaja, le anagnao amy i lily ao ty saresare ty fahalalagne naho ty maregne, le manao akore ty ho vokae izay amy ty fomba hiaignao amy ty havelo'o? ²¹ I rehe mpampianatse o ilae reo, tsy mampianatse ty vatao vao reheo? I rehe mitalily tsy mete amy ty halatse, mpangalatse vao reheo? I ²² rehe mandrara te tsy tokoe hijangajanga ao, mijangajanga vao reheo? I rehe malaigne o ambiasao, manimba ty anjomba fivavahagne vao reheo? ²³ Rehe fale misengesenge amy ty lily, magnafa baraka an'Andrianagnahare vao rehe amy ty fandikagne lily io? ²⁴ Fa ty tahinan'Andrianagnahare le fa niafa-baraka tamy Jentilisa reo noho nareo," amy ty fa nosoratagne. ²⁵ Fa mahazo tomboe amy ty savatse maregne nareo naho magnorike ty lily, naho mandietse i lily nareo, le avy tsy nosinavatse ndra tie fa nasavatse nareo. ²⁶ Naho zay, naho ndaty tsy voasavatse ro miabegne ze take'i lily, le tsy ho agnate i voasoratse fa voasavatsey vao reke ndre ty tsy nasavatse? ²⁷ Le tsy hoboseha i raike tsy nitapake boake ami Nagnahare vao nareo naho miambegne i lilie'y reke? Satria nareo managne i lily voasoratse mahakasike i savatsey, fe ie mbe mandika i lily avao! ²⁸ Fa reke le tsy Jiosy amy ty fanenteagne aze avao; na ami ty tapake hita ivela ty nofotse avao. Fa reke tsy Jiosy amy ty endrike ivelae avao; na amy ty fanapahegne ivela ty nofotse avao. ²⁹ Fa le Jiosy agnate'e, le ty fanapahaegne boake an'arofo, amy ty fagnahy, fie tsy amy ty soratse. Ty fideragne ty ndaty manahake zay le tsy boake ama ondaty fa boake aman'Andrianagnahare.