¹ Maro ty nimane nanoratse tantara miomba ze raha nilefe amantika eto, ² manahake ty fa natalily iareo aze antika, ze fa nivavaolombelogne nagnatreke maso naho ty mpinday tsara hatra amboalohae. ³ Naho ty Amako le mete avao - naho fa nisafiriegne ty raha nisy iaby hatramboalohae - ty hamolily an-tsoratse arake ty filaharae ho azo, ry Teofilo ndaty vatae. ⁴ Izao ty hahafoignagne ty maregne miomba ze kila raha nagnanaragne azo. ⁵ Tamy ty andro i Heroda, mpanjaka i Jodia, le nisy mpisorogne raike atao te Zakaria zay, boake amy ty fokoa i Abia. Anan-kapela i Arona atao Elizabeta zay ty agnara ty valie. ⁶ Sambe ndaty nanagne ható amin'Andrianagnahare iareo, nihasy ze lily naho ty sata i Andriantompo. ⁷ Fie tsy nanagn'anake iareo, fa betsiterake ty Elizabeta, toe fa sambe niantetse aby ka iareo roe tamy fotoagne zay. ⁸ Izao ty miomba i Zakaria amin'Agnahare, nanao ty asa fisoronagne ifandimbezagne isagn'afo'e. ⁹ Naho fa natao ty fomba iareo amy ty fijibognagne ze ho mpisorogne fagneva ty hitorogne, le nivoafily antsapake hagnemboke agn'anjomba fivavaha i Andriantompo ao reke. ¹⁰ Tamy lera hagnoroagne emboke ey le nivavake an-tane lavitse ndaty maro rey agne reke. ¹¹ le ingo ty anjely i Andriantompo niboake amae mijohagne akavana i vatomasigne nisy emboke ey eo. ¹² Naho fa nahatrea aze ty Zakaria, ndra nihondrahondra ty tahotse. ¹³ Anjely nanao tihoe amae te: "Ko matahotse, rehe Zakaria, fa nirey ty fivavahao." Hivesatse anake lahy amao ty tagnanjombao Elisabeta. Le i Jaona ty hatao areo agnarae. ¹⁴ Hanagne hafaleagne naho halio fo rehe, mbe ho maro ka ty hirebeke ty fisamahae. ¹⁵ Fa ho bey agnatreha i Andriantompo reke. Le tsy hinon-divay naho toake mahery reke, fa ho feno Fagnahy Masigne boake an-troke agne. ¹⁶ Maro amy ty tarira Israely ro hiheren-doha amin' Agnahare. ¹⁷ Hiaólo ty fagnova i Andriantompo amy ty fagnahy naho ty nihery i Elia reke. Natae zay soa hampitraoke ndraike ty fon-drae amy ty anae. Hagnoriha ty tsy vokatse ze mahilala amy ty lalagne maregne - Hagnomagne tariratse fa vonogne hoe i Andriantompo ro handigne Aze. ¹⁸ Zakaria nirehake amy anjely te: "Akore ty hafatarako zao? Raho fa rangahe antetse ndre ty valiko ka fa antetse." ¹⁹ Le hoe ty natoy anjely naho ty reha'e amae: "Raho ro Gabriela, mitsangagne agnilan'Agnahare eo. Nirahegne raho hagnombara amao, hinday zai talily soa zao amao. ²⁰ A izao! Ho moagne rehe, le tsy hahay hirehake, naho tsy sita le avy ty andro hilefea o zao raha iaby zao. Naho ndra tsy niantofao ty tsarako, ho lefe amy ty andro hoavy." ²¹ Ndaty rey fa vozake ty ligny i Zakaria. Nilatsa ty hahela ty fijanognae agn'anjomba fivavahagney ao. ²² Naho fa niakatse reke, le tsy niafake nirehake ama iareo. Fa nifanta'iareo te nahatrea raha niboake amae tan-anjomban'Agnahare tao reke. Nagnondrotondro iareo ndra nanjare bobo. ²³ Naho fa nivita ty andro nitampera ty fagnompoa'e, le noly an-tragnoe agne reke. ²⁴ Tafara o andro reo, le nivesatse ty Elizabeta naho le nietake tagnate ty limy volagne. Hoareke te: ²⁵ "Natà i Andriantompo zao,mba hagnafaha'e ty hasalarako ama agnatrehao ndaty io. ²⁶ Ie nifeno enem-bolagne, le nirahen'Andrianagnahare ty Anjely Gabriela nandeha amy ty tanagne raike ta Galilea atao Nazareta ao, ²⁷ ho amy ty ampela mbe tsy nahafantatse lahy fa vinorovoro ho valy lahy atao Josefa zay. Mbe tarira ry Davida avao ka reke, le ty agnara i ampela tsy mahafantatse lahy i Maria. ²⁸ Niheho amae ao reke le nirehake tihoe: "Salama rehe, ry soavoatse! Andriantompo ho amao ao." ²⁹ Ndra nilatsa amy ty reha'e hoe izao oy reke naho le nagnontane an-troke te ty salama manao akore ka izay io. ³⁰ Le hoe ty anjely tamae: "Ko matahotse, rehe Maria, fa nisohen'Agnahare any ihe eo. ³¹ Ingo, hanagn'anake rehe le hitera-dahy. Le ty tahina'e hatao'o te 'Jesosy'. ³² Ho ndaty bey Reke le hotokavigne tihoe Ana i Andidimonegne ey. Andriantompo Andrianagnahare hagnomey Aze ty toeragne nanjakà i Davida razae. ³³ Hanjaka hatramparae amy ty fokoa i Davida reke, naho le tsy hisy fatamperae ty fanjakà'e. ³⁴ Le tihoe ty natoy Maria amy i anjely: "Akore ty ho lia izao, raho toa tsy mbe nandry ama ty lahilahy?" ³⁵ Nanoigne aze i anjely te: "Ty Fagnahy Masigne ro hizotso amao, naho ty hery andindimbonegne ty ho avy amao. A le ho terake i masigne ey le hatao izao te Anak'Andrianagnahare. ³⁶ Ingo, ty longo'o Elizabeta mbe nitsokeregne anadahy avao ka ndre te ie fa antetse. Fa faha enem-mbolagne ty aze, ireke notokavigne te betsiterakey. ³⁷ Fa tsy misy raha tsy ho lefe amin'Andrianagnahare ao." ³⁸ Hoe Maria: "Intoa raho, ampela mpitoro i Andriantompo. Lonike hoavy amako zao hagnorike ty tsarao. Le nienga aze i anjely. ³⁹ Tamy ze andro zay, le niavotse ty Maria nikapikapike, nanganike ze tanàgne ambohitse a Jodea agne zay. ⁴⁰ Namantagne an-tragno ry Zakaria ao le nanalama i Elizabeta. ⁴¹ Naho fa naharey ty feo i maria nanalama aze ty Elizabeta, le nikambiakambia tsy nahay avao ty ajaja tan-tro'e ao, le nifeno Fagnahy Masigne ty Elizabeta. ⁴² Le nagnonjogne ty feo'e mafe reke nanao ty hoe: "Soavoatse amy ty ampela iaby rehe, le soavoatse ka ty anadahy hasamao. ⁴³ Te iraho manao akore ro le ty rene i Andriantompo ty avy hitilike ahy? ⁴⁴ Fa ingo, naho fa naharey ty salamao raho, le nihisa tsy nahay avao ty ajaja an-troko ato. ⁴⁵ Haha ze niantoke fa ho lefe abike ze raha nampitalilien'Agnahare." ⁴⁶ Le hoe ty Maria: "Midera i Andriantompo ty fagnahiko, ⁴⁷ le ty fagnahiko nifale aman' Andrinagnahare mpandrombak'ahy ao. ⁴⁸ Fa nivazoho ty fijalea ty ampela mpitoro'e Reke. A le ingo, hinanekeo ze fonga ndaty le hanao haha ahy iabike. ⁴⁹ Te ama ty raha tsy tan-tane tamako nanoe i mahalefe ty raha iabike ey amako, le ho masigne ty tahinae. ⁵⁰ Fa haharetse ho an-jafe agn'ana'e ty tretre'e ho'e ze matahotse Aze. ⁵¹ Nampiboake ty heri'e amy ty oza'e Reke; nabaratsia'e iareo ze nitregne ama ty raha vinetsetsevetse ty fo'e. ⁵² Nahoma'e amy ty fahefa'e ty anadahy ty mpanjaka le ty ambane natroa'e. ⁵³ Natao'e vontsigne raha soa ze nikeré, fa ty mpagnarivo nampolie'e hara'e. ⁵⁴ Nanome fanampiana an'Israely mpanompony Izy, mba hahatsiarovany haneho famindram-po ⁵⁵ (araka ny nolazainy tamin'ireo raintsika) tamin'i Abrahama sy ny taranany mandrakizay." ⁵⁶ Nijanogne nitoboke amy i Elizabeta ao sabo ho telo volagne ty Maria vaho zay niherigne noly an-tragno'e agne. ⁵⁷ Le niavy ty andro hisamaha i Elizabeta ty anae naho le niterake lahy reke. ⁵⁸ Naho fa naharey ty tretrea i Andriantompo aze ty tanan-draike amae le nindre nirebeke amae. ⁵⁹ Naho fa ama ty andro fahavalo le niavy hanavatse ty ana'e iareo. Le ho notokavy iareo te "Zakaria" manahake ty agnarandrae reke. ⁶⁰ Fie ty rene'e nandietse nanao izao te: "Tsy ie zay, Jaona ty hitokavagn'aze." ⁶¹ le hoe iareo tamae: "Tsy misy amy ty longo'o notokavigne amo zao agnaragne zao." ⁶² Nanao fihetseke taman-dra'e iareo haonignan-drae ty tea'e hatao'e agnara-nana'e. ⁶³ Le nangalake ardoaze ty rae le sinora'e tao te: "Jaona ty agnarae" le nilatsa izao iaby iareo. ⁶⁴ Nindry amy zay avao le nisokake ty vava'e nivotsotse ty lela'e. Nivolagne reke naho le niasaotse an'Agnahare. ⁶⁵ Nanjary natahotse iabike ty tanan-draike ama iareo. Le fonga naharey izao talily izao ty an-tanàgne Jodia. ⁶⁶ Le ze naharey sambe nametsevetse am-po'e agne, nirehake hoe izao te: "Ho inogne ty ajaja toy io?" Fa ty fitàn'Agnahare ro miomba aze. ⁶⁷ Le nifeno Fagnahy Masigne ty Zakaria ra'e le nitoky, nagnombara te: ⁶⁸ "Deragne ty Andriantompo, Andrianagnahare ty Israely, fa niavy nagnampe naho nagnafake ty tarira'e Reke. ⁶⁹ Nanandratse ambone ty marem-panavotagne ho antika an-tragno i Davida reke, ⁷⁰ manahake ty nitsinara'e ama ty saontsy ty mpitoky masigne te niandro taolo agne. ⁷¹ Handrombake antika ama ty fahavalontika naho amy ty tagna ze malaigne antika Reke. ⁷² Nata'e zao hahafoigna ty raentika ty tretrea naho tsy hagnalinoagne titike Masigne ey, ⁷³ tsy inogne fa i titike tsinara'e ama i Abrahama raentikagne ey. ⁷⁴ Nifampititike ty hahazoagne antika, naho fa niafake an-tagna ty fahavalontika, hitorogn'Aze tsy an-tahotse, ⁷⁵ am-pahamasignagne naho amy ty fahamaregnagne miatreke Aze tsy hifiliagn'andro. ⁷⁶ Eka, ihe ro ajaja, ho tokavigne te mpitoky ty Andidimbonegne agne, fa hiaolo ty fagnova i Andriantompo rehe le hagnamboatse ty lala'e, ⁷⁷ mba hampiomagne ty ndaty amy ty fiavia'e. Hanoro lalan-kavelogne hoe ty ndaty ama ty faganahagne ty hakeo iareo. ⁷⁸ Nisiagne izao ho tretrea masigne ty Andrianagnaharentika, izao ty hibelagna i androy boake andidimonegne agne hagnampe antika, ⁷⁹ hagnazava ze mitoboke am-po ty iegne naho ze fa marine ho mate. Hanoe'e zay hitarihagne ty tombontika ho ama ty fiadanagne." ⁸⁰ Nihabey naho nanagne herem-pagnahy ajaja ay, tandiolio agne reke hatra ty hiavia ty andro hiboaha'e vatagne amy Israely.