¹ Tamy ze andro zay, le nandily ze kila tane hagnisake ze ndaty iabike velogne ambone ty tane toy ty Aogosto Kaisara. ² Izay ro isake ndaty natao voaloha'e ta Kyrenio mpandily ta Syria agne. ³ A izao ty ndaty iaby le fonga niheregne amy ze tanàgne nirifa'e iaby hisoratse agnragne ho amy ty isake ndaty. ⁴ Le nandeha nimba Galilea agne ty Josefa, Ntenazareta, handeha hoa Jodia agne, tanà ry Davida atao te Betlehema zay, toe boake amy ty tragno naho longo ry Davida ka reke, ⁵ nandeha agne reke hisoratse agnaragne nindre amy Maria, vorovoro ty fanambalia'e fa mivesatse. ⁶ Le iareo mbe tagne ie, le niavy ty fotoagne tokoe hiteraha'e naho ⁷ le nitera-dahy reke, le i reke ro nampisafotse aze lamba voaloha'e naho le nampandry aze amy fampihinanagne ahitse, fa tsy nahatrea toeragne tan-dotely ao iareo. ⁸ Teo ty mpiraoke agnondry nitan-tonda tey avao tamy ty faritse nisy iareo, niaraoke agnondry lahialegne amy ty halegne. ⁹ Le niboaha ty anjely i Andriantompo niheho tamy iareo te le ty voninahi'e i Andriantompo ro nagnazava nagnarogne iareo, naho le natahotse iareo. ¹⁰ Nagnombara tihoe ama iareo anjely te: "Ko matahotse, fa hinday talily soa hagnomey hafaleagne raha tsy tan-tane hoe ty ndaty iabike raho. ¹¹ Te anito le nisy mpandrombake terake hoanareo amy ty tanà i Davida! Ie ro Kristy Andriantompo! ¹² Toa ty famantatse hatoro anareo: "Hahatrea ajaja misafotse lamban'ajaja mandry amy ty fihinanagne ahitse nareo. ¹³ Nitampoke teo avao nindre amy i anjely ie, le nisy irake bey boake andagnitse agne nidera nanao tihoeke te: ¹⁴ "Hasigne hoan'Andrianagnahary Andidimonegne agne, le hahazo fiadanagne amy ty tane toy hoe ze ndaty notretreze'e." ¹⁵ Naho fa nienga iareo nandeha an-danitse agne i anjely rey, le i mpiarak'agnondry rey nifampirehake tihoeke: "Ndagne ntika ho a Betlehema agne, hagnente zao raha ao zao, zao nampahafantare i Andriantompo zao." ¹⁶ Nanao lia tsiela agny iareo le nahatrea i Maria naho Josefa, naho ajaja miroro ambone fagnisiagne ahitse eo. ¹⁷ Naho fa nitrea iareo Reke, le nitalily iareo ty raha nambara ama iareo ty miomba o ajaja ao. ¹⁸ Ze nahaonigne izao le nilatsa amy ty raha talilie mpiarak'agnodry rey. ¹⁹ Fa i Maria le mbe nisafiry ze miomba ty raha iabike nirey'e, fa nitana'e agn'arofoe avao. ²⁰ Le nibalike i mpiarak'agnondry rey, nihasy naho nandaza an'Andrianagnahare amy ty raha nirey iareo naho ty nitrea iareo, amy ze raha natalily iareo. ²¹ Naho fa nitampetse ty andro fahavalo, le nasavatse Reke naho le nameagne ty agnaragne te Jesosy, i agnaragne namea'y anjely Aze taloha ty nametrahagn'Aze an-troke. ²² Naho fa nivita ty isa ty andro hiliova'e, arake ty lily i Mosesy, le ninday Aze handeha hoagn'anjomba fivavahagne ao ty Josefa naho Maria hagomey Aze Andriantompo. ²³ Naho ty fa sinoratse amy ty lily Andriantompo ao tihoeke ey te: "ty anake lahy nasamake voaloha'e le natao hoe'i Andrinatompo." ²⁴ Ama izao lily Andriantompo zao le nanese raha hasorogne iareo, "Ndre deho roe ndre vorogne mahilala roe." ²⁵ Teo ze rangahe Nte Jerosalema, atao Simona zay, rangahe maregne naho mimane raha soa. Nanao ze raha hitroara Israely amy ty Fagnahy Masigne ao reke. ²⁶ Nambara ty Fagnahy Masigne amae fa tsy ho vilasy reke naho tsy le sita mahatrea i Kristy Andriantompo. ²⁷ Notarihy ty Fagnahy Masigne, handeha an'anjomba fivavahagne agne ty Simona. Naho fa nitrotro i Jesosy nizilike ty rae naho ty rene'e, hanao fomba amy ty lily ao, ²⁸ le norambese'e naho trinotro'e Reke naho le nisaotse an'Andrianagnahare reke nanao tihoe: ²⁹ "Henany zao Andriantompo, le engao raho mpitoro'o ho mate, hagnorike ty tsara'o. ³⁰ Fa ty masoko fa nahatrea ty rombake, ³¹ nampitamào niatreke ndaty maro: ³² le ty fahazavagne ho fagnombara hoe'i Jentilisa naho voninahitse hoe Israely fokofokoa'o." ³³ Niverinehake ty rae nao ty rene'e i ajaja ay amy ty raha nosaontsi'e mahakasik'Aze. ³⁴ Nanipe rano hoe iareo ty Simona le nanao tihoeke Maria rene: "Ingo, ty ajaja toy nojibonegne handrarake naho hampitroatse ty tarira i Israely iabike, le ho famantatse ze raha nolieregne - ³⁵ Hisy arara hampite lio ty fagnahio - le ho voambara ze vetsevetsem-po ty maro. ³⁶ Nisy ampela mpitoky raike atao Ana zay. Anak'ampela i Fanoela boake amy ty tarira ry Asera reke. Fa antetse reke. Niharo toboke amy ty vali'e tagnate ty fito taogne reke tafara ty mbe tsy nahafatara'e lahy, ³⁷ niampelatovo tagnate ty efatse ambe roapolo taogne. Le tsy mba nienga ty anjomban'Agnahare reke fa lelia'e nitorogne vavake naho nifaly hanegne avao, tsy nifily andro tsy nifily halegne. ³⁸ Tamy fotoagne zay avao le niharine aze iareo le nisaotse an'Agnahare naho nitalily tama'e ty amy i ajaja ay amy ze ndaty iaby nandigny ty rombake i Jerosalema. ³⁹ Naho fa nahavita ze raha iabike nampanoegne iareo arake ty lily i Andriantompo iareo, le nibalike ta Galilia, amy ty tanà iareo a Nazareta agne. ⁴⁰ Nihabey i ajaja ay, naho le niha nahery, nihendre, le ty hasoan'Agnahare ka le tama'e. ⁴¹ Ty rae amy ty rene'e isan-taogne le tsy tapake mamonjy ty fankalazagne ty Paska ta Jerosalema agne. ⁴² Naho fa ny roa ambe folo taogne Reke, le nandeha mbeo ka iareo hanao ty fomba fatao naho fa fete. ⁴³ Naho nijanogne tao ampara ty nitampera i fetey iareo le niheregne noly ka. Le nijanogne avao ta Jerosalema ty Jesosy ndre te ie tsy niarofana ty rene'e amam-dra'e zao. ⁴⁴ Nitamà avao iareo te nindre amy ty ndaty nindre ama iareo Reke, le agnate ty raike andro iareo nandeha avao. Izay vao nisahiragne nipay Aze ama ty longo'e naho ty ragne'e. ⁴⁵ Naho fa tsy nihita iareo tao le niheregne nandeha ta Jerosalema agne ka, le nipay Aze agne. ⁴⁶ Ie re nitelo andro, le niony iareo agn'anjomban'Agnahare ao Reke, mitoboke agnivo ty mpampianatse, nitsanogne Aze naho ty nagnontane Aze. ⁴⁷ Ze nahaonigne Aze le nilatsa amy ty hilala'e naho ty tohin-dreha'e. ⁴⁸ Naho fa nahavazoho izao iareo, le niverinehake. Ty rene'e nanao izao te: "Anake, ino anoa'o izao anay io? Tsanogno, raho aman-dra'o sahiragne naho natahotse ty fipay Azo? ⁴⁹ Nanoigne iareo tihoeke Reke: "Nagnino nareo nipay Ahikeo? Tsy arofana areo vao te tsy ho mbia tsy ho an'anjomba ty Raeko atoa Raho?" ⁵⁰ Fie tsy naharendreke ty raha tea'e ho tsaraegne iareo. ⁵¹ Le nindre noly ama iareo a Nazareta agne Reke nagnorike ty laha iareo. Ty rene'e nitagna an-troke avai ze raha nisy. ⁵² Jesosy nihabey hilala nahao nihabey vatagne, ro mbe nifankatea amin'Agnahare naho tama o'ndaty.