¹ Izao ty foto ty raha tsarae: Manañe mpisorombey tika naho le niambesatse ankavana ty fità ty seza fiandriana ty bey volonahitse an-dañitse añe. ² Mpanompo an-toera masiñe ao Reke, naho le tabernakely mareñe ei Andriatompo, fa tsy ndaty, ro namoroñe aze. ³ Fa ze mpisorombey aby le tinondro hanolotse fañomezañe naho soroñe. Manao izay le paiañe ty manan-draha hatolotse. ⁴ À naho tantane etoy ty Kristy, le toe tsy ho ny mpisoroñe Reke, satria misy ka ty manolotse fañomezañe arake ty lily. ⁵ Iareo le mpanompo amy tabernakely ao sare navaho talinjo ze raha an-dañitse añe. Izay le manahake ty nandraran' Andrianañahare i Mosesy naho vaho hamboatse tabernakely reke: Izao ty nataon' Andrianañahare te: "Henteo mba hatao o arake ty fañe e fa natoro azo tambonevohitse ey ze kila raha. ⁶ Fa henaneo Kristy le nandrae asa fanompoañe fanjaka lavitse. Izay le noho reke ndaty aivo avao ka amy ty fanitike soa vatae, naho le mifotose amy ty fampitamaeñe fanjaka vatae. ⁷ Fa naho tsy nanan-kadisoañe ze fanitike voalohae zay, le tsy nisy nipaoke ty fanitike faha roe. ⁸ Fa naho fa nahaonin-kadisoañe tama ondaty ty Andrianañahare, le tihoe ty nanao te: "Ingo, ho avy ty andro---hoe ty Andriatompo---naho fa hanao fanitike vao amy ty foko Israely naho ty fokofoko Joda Raho. ⁹ Le tsy hanahake ty fanitike nataoko nindre amy ty raza iareo tamy ty andro nindesako iareo amy ty tañae hisintake boake amy ze tane atao Egypta zao. Fa iareo le tsy nitoetse tamy ty fanitike Nataoko, naho Izaho le tsy niambeñe iareo---hoe ty Andriatompo. ¹⁰ Izao ty fanitike hataoko amy ty foko Israely afara ze andro zay---hoe ty Andriatompo. Hatao an-tsay iareo ao ty liliko, naho le ho sorateko am-po iareo ao ka zay. Ho Andrianañahare iareo Raho, naho le ho ndatiko ka iareo. ¹¹ Tsy hampianatse ty mpiharo tanañe naho ty rahalahie aby iareo, hitalily te: "Fantako ty Andriatompo." Le hahafantatse Ahy ze ndaty, boake amy ty kede vatae naho le hatra amy ty farae bey vatae amy iareo. ¹² Fa hikeverako iareo amy ty tsy fahamareña iareo, naho le tsy hahatiahy ty hakeo in-tsasa." ¹³ Amy ty firehafañe te "vao", le nanao fanitike voalohae ho taolo reke, naho ze fa nilany andro naho niantetse le fa narine ho veloñe.