¹ Anake, magneke ty rae'areo naho ty rene'areo amy Andriantompo ao, fa toe izay ty ie. ² "Mihasia ty rào naho ty reneo." (Izao ty lily voaloha'e misy ty tamagne), ³ "Hahatrea soa naho hilaly lavenoke ambone ty tane toy rehe." ⁴ Inareo rae, ko ndesegne amy ty heloke ty ana'areo. Fa ndeso amy ty sata naho ty fagnanara i Andriantompo Reke. ⁵ Nareo mpitorogne ndaty, magneke ty hasy naha matahora ty ragnandria'areo an-tany eto, amy ty hamoram-po areo. ⁶ Magneke aze manahake ty fagnekea areo i Kristy. ⁷ Magneke aze avao ndre tsy miatreke ty ragnandria areo hampalio fo iareo. Fie mandako zay ty fagnekeagne hanahake ty mpitorogne i Kristy, manao ze lio fon'Agnahare amy ty fo areo vatae. Mitorogna amy ty fo areo vatae, ampanahafo ty mitorogne Andriantompo nareo fa tsy ndaty, ⁸ fa toe fointika fa ndre inon-dre inogne asa soa atao ty ndaty raike, le handra valen-kasoa boake amy Andriantompo reke, ndre ndevo reke ndre ndaty afake. ⁹ Inareo tompoegne, manahafa ty raha atao ty mpitoro areo ka nareo. Ko mampatahotse iareo. Hai'areo fa Reke avao ro Ragnandriaareo naho Ragnandria iareo an-danitse agne, tsy misy ndaty hafa Amae ao. ¹⁰ Ty farae, mahereza amy Andriantompo naho ty amy ty tanja ty heri'e. ¹¹ Misikigna reketse ty fihalian'Agnahare iabike, hahafahao hiatreke hialy amy ty vetsevetse ty kokolampogne. ¹² Fa ty alintika tsy mialy ama nofotse naho aman-dio. Fa hialy amy ty fanjakagne naho ty fahefagne ara pagnahy naho mpandily ty iegne raty, hialy ama ty fagnahy raty an-danitse agne. ¹³ A izao le misikina reketse ty kobaen'Agnahare, hahafaha areo miatreke ty zao andro raty zao, le naho fa vita areo zao raha iabike zao, le hatohetse nareo. ¹⁴ A izao lefa hatrefo, naho fa natao areo ambaniagne eo ty maregne naho natao areo aragnagne amy ty raha mahitsy. ¹⁵ Le hanahake ty hana ho'e ty tombo areo, le fantsiho agnate ty loha ty fahavonognagne hitalily ty saontsisoa ty filongoagne. ¹⁶ Ze fonga raha le alao ho kobaen-ty finoagne, hahafaha'areo mialy amo ze anaka lily mandrehetse ty afo ty raty. ¹⁷ Alao ty fandrombahagne hiaro loha naho ho arara ty Fagnahy, ze saontsin'Agnahare. Ama ze vavake naho ze raha angatahegne, le angataho amam-Pagnahy isan'andro. ¹⁸ Amo zao raha vetsevetsegne zao le mahareta amy ze kila raha, naho fa magnomey vavake ho'e iareo ndaty masin'Agnahare. ¹⁹ Le mivavaha ho ahy, hahazoako hafatse naho fa manokake ty vavako raho. Mivavaha havaniako hampahafoigne ty raha maregne mietake miomba ty talily soa. ²⁰ Ama ty talily soa toy ro nagnirahagne ahy ho voafatotse am-pigadragne ato, havaniako mitalily izao, naho toe hirehake vatae raho. ²¹ Tykiko, i lahisoa naho mpitorogne mahatoky ama i Andriantompo ao, ro hampafantatse anareo ze raha iabike, hahafohigna areo ty hataoko. ²² Niraheko ho ama areo reke handefe izao, hahafohigna areo ze raha miomba anay, naho ahafahae mampahery ty fo areo. ²³ Fiadanagne naho fitea reketse ty finoagne boake amin'Agnahare Rae naho ty Andriantompo Jesosy Kristy hoama'areo rahalahy. ²⁴ Ho hasoa ty hoazo ty ndaty tea i Jesosy Kristy Andriantompontika aman-katea tsy maty le tsy hotampetampetse.