¹ Am'izao, raho Paoly, gadra i Kristy Jesosy noho ty ama'areo Jentilisa. ² Naho mba rei'areo fy nindesagne ty fitahian'Agnahare nimeagne ahy hoanareo. ³ Manoratse ze raha natalily ahy raho. Izao ty maregne amy ze raha mivony miomva ze kedekede sinorako ama'are. ⁴ Naho fa vinaky areo zao, le ho fohi'areo ty fomba nahazoako ze raha maregne mietake miomba i Kristy zao. ⁵ Ama ty tariratse hafa le natao tsy ho foin-ty ana ondaty zao raha maregne zao. A hinane zao le nambara baoke amy ty Fagnahy ama iareo Apostoly naho ty mpitoky fa tinoka ho amy ty asa raike toy. ⁶ Izao maregne mivony zao le mamolily fa ty Jentilisa le miharo lova, mitraoke raike amy ty nofotse, mizara ty fampitama i Kristy Jesosy am-po ty talily soa ao iareo. ⁷ Fa ndra nanjare raho ro mpitorogne talilisoa amy ty fitahiantsoan'Aganahare nimeagne ahy amy ty fiasa ty heri'e. ⁸ Nimean'Agnahare ahy raha fomey zao, ndre ty kede vatae raho ama ty ndaty masin'Agnahare. O fomey zao ro hagnombarako anareo Jentilisa ty talily soa ty hare i Kristy sarotse paiagne. ⁹ Ty fitahian'Agnahare ahy ro indesako hazavagne amy ty ndaty iabike ty lahan'Agnahare. O lahatse eo le navonin'Agnahare, nihary ze kila raha tagnate ty taogne maro te taolo. ¹⁰ Natao foin-ty maro agn'anjomba fivavahagne ao zao lahatse zao hahafohigna ty mpandily naho ty mpanampake ty fagnahy hilalan'Agnahare. ¹¹ Niboake magnorike ty nandaharange aze tsitampetampetse nilefe amy Kristy Jesosy Andriantompontika izao. ¹² Fa amy Kristy ao ro hananantika fahavaniagne naho lalagne itokisagne amy finoantika Aze. ¹³ A izao le mihalale ama'areo raho tsy ho ketrake amy ty jaliko hoanareo, ho voninahi'areo. ¹⁴ A izao le mitongalike miatreke an-dRaeke ¹⁵ magnomey agnaragne naho ty foko iabike an-tany eto naho ty an-danitse agne raho. ¹⁶ Mivavake raho hagnomeizae anareo, arake ty hamaro ty voninahi'e, hampahery anareo amy ty Fagnahy Masigne, ama'areo ao. ¹⁷ Mivavake raho hoavy agnate ty fo areo am-pinoagne ty Kristy, hioregne naho hionjogne amy ty fitea'e nareo. ¹⁸ Hanagne hery nareo naho ze mpino iabike hahafantse ty saka'e, halava'e, ty haavo'e, ty halali'e, ¹⁹ le mandako ty fahafantaragne ze kila raha ty fitea i Kristy, le ho feno'e ze hafenon'Agnahare nareo. ²⁰ A Ie mahavita magnomey ambone ze vinevetsentika naho ty nangatahentika, amy ty hery miasa amintikagne ²¹ ao, ho Aze ty voninahitse agn'anjomba fivavahagne naho amy Kristy Jesosy hatra ty tariratse tariratse tsy mbia ho tampetampetse. Amena.