¹ Henanezao ty momba ty fiavia i Jesosy Kristy Tompontika naho ty namoriagne antika nindre ama'e: magnontane anareo zahay, ry rahalahy, ² mba tsy ho mora vereveregne naho hitititike nareo, ndra amy ty fagnahy, ndra amy ty hafatse, ndra amy ty taratasy manao te hoe hoavy ama'ay, naho ty voka ty fiavia ze andro i Tompo zay. ³ Ko engagne hisy ndaty hamitake anareo ndra ie amy fomba manao akore. Fa tsy raha hoavy zay naho tsy afara ty firebahagne, le haboake ty lahilahy mpandika lily, ty ana ty fahasimbagne. [Fagnamarihagne: ty dikan-drehake ila'e taloha le manao te hoe: "le haboake ty lahilahy behakeo."] ⁴ I reke mandietse naho mamere ty vata'e amy ze tokavegne hoe Andriagnanahare naho ze ivavahagne. Voka izay, le nitoboke amy Tempolin'Andriagnahare ao reke le nanao ty vata'e ho am'Andriagnanahare. ⁵ Tsy tiaro'areo vao fa tam'iraho mbe nindre ama'areo le fa nirehake o raha reo? ⁶ Amy henanezao hai'areo inogne ro mitagne aze, mba hiboahae amy ty fotoagne mete rerike avao. ⁷ Fa ty raha mietake ty fandikagne lily le fa miasa, misy ndaty raike avao manikambatse aze henanezao mandra-pisitaha'e amy ty lalagne. ⁸ Naho fa avy eo le haboake am'zay i mpandika lily vata'ey, ie hovonoe i Jesosy Tompo amy ty fiay ty vava'e. I Tompo le hinday aze amy ze tsy misy dika'e amy ty fiboaha ty fiavia'e. ⁹ Ty fiavia i mpandika lily vata'ey le boake amy ty asa i Satana naho amy ze herie abike, o famantaragne io, le ty sahatse tsy maregne, ¹⁰ le naho ty dramotse aby ty amy ty tsy fahamarenagne. Hoe iareo ze motso o raha abike reo, satria iareo io le tsy nandrae ty tena fitiavagne ty fahamarinagne nba haha avotsy iareo. ¹¹ Naho amy ze antoe zay le mandefa asa ty fahadisoagne Andriagnanahare mba hinoa iareo vande. ¹² Voka izay le ho tsaraegne abike iareo, iareo tsy mino ty fahamarinagne fa ie mangalake faliovam-po amy ty tsy fahamarinagne. ¹³ Fa zahay le toko'e magnome fisaoragne an'Andriagnahare avao ho anareo, ry rahalahy notea i Tompo. Fa Andriagnanahare ro nijibogne anareo manahake ty voaloham-bokatse hoe ty famonjeagne amy ty fagnamasinagne ty Fagnahy naho ty finoagne ty fahamarinagne. [Fagnamarihagne: "Ty dikan-drehake hafa le manao te hoe: Fa Andriagnanahare fa nijibogne anareo boake amy voalohae hoe ty famonjeagne.] ¹⁴ Izay ty nitokavae anareo tamy ty alala ty talilisoa'ay mba hahazoa'areo ty voninahe i Jesosy Kristy Tompontika. ¹⁵ A naho zay areke, ry rahalahy, mijohagna mafe. Tano ty fahamarinagne ze nampianaregne anareo. Ndra tamy ty rehake ndra tamy ty taratarasi'ay. ¹⁶ Amy henanizao le ao i Jesosy Kristy Tompontika vata'e, le Andriagnanahare Raentika tea antika naho ka magnomey antika fankaherezagne hatrampara'e naho ka fatokisagne soa hoe ze hoavy amy ty alala ty fahasoavagne, ¹⁷ hampahery naho hametrake ty fo'areo amy ty asa soa abike naho ty rehake.