¹ Ami'ze fomba zay, inareo ampela letoko'e hagneke ty vali'areo. Anovo zay ndre le misy lahilahy maro aza tsy magnarake ty saontsy, naho le mete ho azo iareo ndre tsy misy aza ty saontsy, amy ty alala ty fagnahi'ty vali'iareo. ² Fe ie iareo le hahatrea ty fagnahy mendreke reo am-pagnajagne. ³ Ao ka zay mba ho tanterake tsy miarake ama'o hamigne ivela'e reo: randram-bolo, ravake volamena, na akanjo lamody. ⁴ Fe ie ka, ao ka zay mba ho tanterake miarake ami'ze am-po'o ndaty ao, naho ty hasoa maharetse'ty fagnahy soa naho mitsigne, ze lafo vily agnatrehan'Andrianagnahary eo. ⁵ Fa ty ampela masigne taloha ro niravake ty vata'iareo manahak'izay. Nanagne fahatokiagne an'Andrianagnahare iareo naho nagneke ty vali'e iaby. ⁶ Manahake ze fomba zay ro nagnekea'i Abrahama an'i Saraha naho nitokava'e aze ho tompo'e. Inareo le ana'e henanik'izao naho manao ze soa naho tsy matahotse ndaty nareo. ⁷ Manahake izay avao ka, inareo lahilahy le toko'e hiaigne miarake amy ty vali'areo arake ty fahazavan-tsaigne, ty ampela le manahake o fanake maleme'o. Toko'e home'areo volonahitse iareo manahake ty mpiarake mandova ty fagnomezagne ty fiaignagne. Ataovo zay mba tsy ho voasakagne ty vavake'areo. ⁸ Fara'e, inareo iaby, ao ka mba hiray saigne, hagnarovetse, hifankatea manahake ty mpiroahalahy, ho tso-po, naho hiambane. ⁹ Ko mamale raty ty raty ndre mandratiraty ty mpagnaraty. Mifanohetse am'izay aza, mitahia avao, fa noho izay ro nitokavagne anareo, mba hahafaha'areo mandova ty fitahiagne. ¹⁰ "I raike ze te hankafy ty fiaignagne naho te hahatrea andro soa le toko'e hampitsanogne ty lela'e amy ty raty naho ty sogni'e amy ty vavandezagne. ¹¹ Ao reke mba hiala amy ty atao hoe raty naho hanao ze soa. Ao reke mba hipaia fiadagnagne naho hitaky izay. ¹² Ty fihaino'i Tompo mahavazoho ty marigne, naho ty ravembia'e mahatsendregne ze fangataha'iareo. Fe ie ty vata'i Tompo le manohetse ze manao raty." ¹³ Ia i raike hamele anareo naho magniry ty hanao ty soa nareo? ¹⁴ Nefa naho mijaly noho ty fahamaregnagne nareo, le sambatse. Ko matahotse ze hatahora'iareo. Ko mititike. ¹⁵ Fe ie ka, atokano mahake ty masigne am-po'areo ao i Tompo Kristy. Mivognosa avao hamaly ze kila'o ndaty iaby ze magnontane anareo ty anto'e hatokia'areo an'Andrianagnahare. Ataovo amy ty halemeam-pagnahy naho fagnajagne zay. ¹⁶ Manàgna feo'ty fieretseretagnemalio mba ty ndaty ze mandratiraty ty fiaignagne soa'areo am'i Kristy ao le mete megnatse satria mirehake manohetse anareo iareo manahake te hoe mpanao raty nareo. ¹⁷ Soasoa, naho Andrianagnahare ro magniry, fa mijaly nareo amy ty fanaovagne ty soa noho'ty fanaovagne ty raty. ¹⁸ Fa nijaly noho'ty hakeo avao ka ty Kristy. Ireke ze nimaregne ka le nijaly ho antika, ze tsy maregne, mba handesa'e antika amin'Andrianagnahare eo. Nivinono tamy ty nofotse Reke, fe ie nivinelo t Fagnahy. ¹⁹ Tamy ty alala ty Fagnahy, le nadeha Reke naho nitory hoe'o fagnahy ze tam-pigadragne tegne reo henanik'izao. ²⁰ Tsy nagneke iareo naho fa nandigny ty faharetan'Andrianagnahare tamy ty andro'i Noa, tamy ty fananganagne sambofiara, le Andrianagnahare nagnavotse ndaty tsy ampe _ fagnahy valo _ tamy ty rano. ²¹ Izay ro famantaragne ty batisa ze magnavotse anareo henanik'izao_tsy manahake ty fagnaliovagne ty loto amy ty vatagne, fa manahake ty toka'ty feo'ty fieretseretagne ho amin'Andrianagnahare_tamy ty alala ty nivagnognam-belo'i Jesosy Kristy. ²² Le eo amy ty fità ankavanan'Andrianagnahare eo ty Kristy. Nionjogne an-dagnitse agne Reke. O anjely reo, o manam-pahefagne reo, naho ty hery le tsy maintsy magneke Aze.