¹ Petera, Apostoli'i Jesosy Kristy, hoe'o zanaka am-pielezagne reo, o ze voajobogne reo, magneragne an'i Ponto, Galatia, Kapadokia, Asia, le i Bitynia. ² Izay le arake ty onin'Andrianagnahare Ray'e mialoha, voatoka'ty Fagnahy ho fagnekeagne naho ho famafezagne ty lio'i Jesosy Kristy. Lonike ho ama'areo ty fahasoavagne, naho lonike hitombo ty fiadana'areo. ³ Lonike ho tahiegne ty Andrianagnahare naho Rai'i Jesosy Kristy Tompontika. Tamy ty famindram-po'e, ro nagnomeza'e antika fisamahagne vaovao hoe ty fahatokisa'ty lova. Ze lova zay le tamy ty alala ty fivagnognam-belo'i Jesosy Kristy. ⁴ Izay le hoe ty lova tsy mete ho mate, tsy ho simba,naho tsy ho rava. Izay le voatokagne ho anareo an-dagnets'agne. ⁵ Le arova ty herin'Andrianagnahare nareo amy ty alala ty fonoagne, hoe ty fagnavotagne ze fa vognogne ho ambara amy ty fotoagne fara'e. ⁶ Tena falefale mahakasike izay nareo, ndre te paiave'areo aza ty hahatiaro miharovetse amy ty ndaty maro samy hafa am'izao. ⁷ Izay le hoe ty fagnaporofoagne ty finoa'areo, ze lafo vily noho ty volamena ze simba, ndre te nampandalovegne tamy ty afo aza. Miseho zay mba ho hita ty voka'ty finoa'areo amy ty fideragne, volonahitse, naho haja amy ty hisahoa'i Jesosy Kristy. ⁸ Tsy nahatrea Aze nareo, nefa tea Aze. Tsy mahita Aze nareo henanik'izao, kanefa mino Aze naho tena fale amy ty fifaliagne tsy hay rehafegne, mahafinaritse. ⁹ Raise'areo henanik'izao ty voka'ty finoa'areo, le ty fagnavotagne ty fagnahi'areo. ¹⁰ O mpitoky reo le nikarike naho nagnontany soa ty mahakasike izay fagnavotagne zay, ty mahakasike ty fahasoavagne ze ho anareo. ¹¹ Iareo reo le nipay ty hahafantatse ty mahakasike te hoe ia naho mbia ty Fagnahi'i Kristy ama'iareo ao ro nisaontsy tama'iareo. Izay le niseho manahake ty nirehafa'e iareo mialoha mahakasike ze fijalia'i Kristy naho ty volonahitse magnarake izay. ¹² Nambara tama'iareo zay mba tsy hanompo ty vata'e iareo, fa inareo, naho fa nirehake o raha ze nivoarehake tama'areo am'izao reo iareo tamy ty alala'o ze nitory ty talily soa reo tama'areo tamy ty alala ty Fagnahy Masigne nalefa baok'an-dagnitse agne ze raha tia'areo Anjely ho fantatse. ¹³ Noho izay hamono ty sai'areo. Mahaonogna tegna. Mametraha fahatokiagne amy ty fahasoavagne ze handesegne ama'areo eo amy ty hisehoa'i Jesosy Kristy. ¹⁴ Amy ty maha anake mpankato, ko mampifagnarake ty tegna'areo ama'ze fagniriagne ze narahi'areo tamy ty mbe tsy nahihitse reo nareo. ¹⁵ Fa manahake i raike ze nitoka anareo te hoe masigne, inareo, avao ka, ao mba ho masigne amy ty findesan-tegna'areo manontolo. ¹⁶ Fa voasoratse te hoe: "Ao mba ho masigne, satria masigne Raho." ¹⁷ Ka naho mitoka ty raike ze mitsara tsy misy fagnavakavahagnerake ty asa'o ndaty kiraikiraike iaby te hoe: "Rae" inareo, le handany ty fotoan'andro'areo amy ty fanehoagne fagnajagne ¹⁸ Fanta'areo te tsy boaka tamy ty volafoty navolamena mete rava ro nagnavotagne anareo tamy ty findesan-tegna gege ze nianara'areo tama'o raza'areo reo. ¹⁹ Fe ie ka, navotagne tamy ty lio lafo vili'i Kristy nareo, i manahake'ty anak'aondry tsy misy handra na hakeo. ²⁰ Voajobogne taloha'ty nananganagne an'izao tontolo zao ty Kristy, fe ie am'izao le tama'o ze fotoagne fara'e ro nagnambaragne Aze tama'areo. ²¹ Amy ty alala'e ro hinoa'areo an'Andrianagnahare, i namagnm-belogne Aze'y naho tama'o ze name'e volonahite mba ho amin'Andrianagnahare ao ty finoagne naho ty fahatokia'areo. ²² Nagnalio ty fagnahi'areo tamy ty fagnekeagne ty fahamaregnagne nareo. Izay le hoe ty fitiavagne ara-pirahalahiagne malio; noho izay mifankatiava fatratse amy ty fo. [ Fagnamarihagne: O dikan-drehake ila'e reo le mivaky te hoe: "Nagnalio ty fagnahi'areo tamy ty fagnekeagne ty fahamaregnagne tamy ty alala ty Fagnahy nareo."] ²³ Nasamake ndraike nareo, tsy boak'amy ty voa mete maty, fa boak'amy ty voa tsy mete maty, amy ty alala ty saontsin'Andrianagnahare velogne naho mioregne. ²⁴ Fe ie "ty nofotse iaby le manahake'o akata'o, naho ty volonahi'e iaby le manahake'o folera'o akata'o. Maike ty akata, naho malazo ty folera, ²⁵ fa ty saontsi'i Tompo le mioregne mandrakizay." Izay ty vaovao mahafale ze natalily tama'areo.