¹ Ndra ia ndra ia miantoke fa i Jesosy ro Kristy nasaman'Andrianaganahare, naho le ndra ia ndre ia tea ty Rae le ikokoa e ka ty anake nasamae. ² Le izay ro ahafohignantika fa mikoko antika ty anak'Andrianagahare: naho tea an'Andrianagnahare tika le magnorike ze lilie. ³ Satria izay ro hatea ho an'Andrianagnahare, le ty fagnorihantika ze lilie. Naho le tsy mavesatse o lilie eo. ⁴ Fa ze kila ondaty nasaman'Andrianagnahare le mandresy ama ze kila tane. Naho ze fandreseagne zay ro fa nandresy ze kila raha: le ty finoantika. ⁵ Ia o raike mandresy ze kila raha aby io? Le ze raike miantoke fa i Jesosy ro Anak'Andrianagnahare. ⁶ Ze raike niavy tama ty rano naho ty lio zao: Jesosy Kristy. Tsy niavy ama ty rano avao reke, fa ama ty rano naho ty lio. ⁷ Fa misy telo mitsangagne voavolombelogne: ⁸ ty Fagnahy, ty rano, naho ty lio. Ie telo le mifagnorike. [Fagnamaregnagne: ty dikan-drehake taolo ilae le vakiegne manao izao: "Fa misy telo mitsangagne voavolombelogne ty an-dagnitse agne: ty Rae, le ty Rehake, naho ty Fagnahy Masigne; naho le raike avao ie telo. Le mbe misy telo ka mitsangagne voavolombelogne ambone tane etoy: ty fagnahy, ty rano, naho ty lio; naho le raike avao ie telo." Ndra izao anio, ze dikan-drehake soa vatae le tsy vakiegne manao izao.] ⁹ Naho mandrae ty fitsangana ondaty voavolomnbelogne tika, le ho bey vatae ty fitsanganae voavolombelon'Andrianagnahare. Fa ty fitsanganagne ho voavolombelon'Andrianagnahare le izao: ireke le mitsangagne voavolombelogne mikasike ty Anae. ¹⁰ Ndre ia ndre ia miantoke ty Anak'Andrianagnahare le managne fitsanganagne voavolombelogne ama ty tegna e ao reke. Ze tsy mino an'Andrianagnahare le manognom-pandagnitse Aze, satria ireke le tsy miantoke ty fitsanganagne voavolombelogne ama ty fa nimein'Andrianagnahare momba ty Anae. ¹¹ Naho ty fitsanganagne ho voavolombelogne le izao: Nimein'Andrianagnahare antika fiaignagne hatramparae, naho le ama ze Anae ao ze fiaignagne zay. ¹² Ze raike managne ty Anake le managne ty fiaignagne. Ze ndaty tsy managne ty Anak'andrianagnahare le tsy manan-kavelogne. ¹³ Fa sinorako ho anareo ty raha toa mba hahafohigna 'reo fa managne ty fiaignagne mandrakezay nareo ho anareo ze miantoke ty tahina ty Anak'andrianagnahare. ¹⁴ Le manahake izay avao ka, izao ty fifagnekeagne nanagnantika tagnatreha eo, te ie ndra ino ndra ino anagantahentika arake ty zotonarofoe, mahonigne antika Reke. ¹⁵ Le mbe hoe izay avao ka, naho haintika fa mahonigne antika Reke- ndra ino ndra ino anagantahentika Amae- le fatantika fa ho azontika ze hene raha nangatahentika tamae. ¹⁶ Naho misy ndaty raike mahatrea ty rahalahie magnota fe ie tsy mikaike hafate, le mahay tsy mivavake reke, naho le hagnomey fiaigne ho aze ty Andrianagnahare. A'zaho le mampitaha iareo ze manankakeo fe ie tsy mikaike hafate. Misy hakeo ze miterake hafate; fe ie tsy mivolagne raho te ie tokoe hivavake amizay reke. ¹⁷ Ze tsy fahamaregnagne iaby le fa hakeo, fe ie misy hakeo tsy mikaike fahafatezagne. ¹⁸ Fatantika fa ndra ia ndra ia nasaman'Andrianagnahare le tsy manankakeo. Fe ie ze nasaman'Andrianagnahare le miaro ty vatae, naho hihalavitse aze ty raty. ¹⁹ Fa haintika fa boake aman'Andrianagnahare tika, naho ze kila tane le mitoetse ama ao ty raty. ²⁰ Mone izao fa haintika fa niavy ty Anak'Andrianagnahare naho le fa nagnomey antika fahazavan-tsaigne mba ahafohignantika ze raike maregne vata e. A le manahake izay ka areke, tika naho ama zo raike maregne zay ao, ama i Jesosy Kristy Anae ao. Ie ro Andrianagnahare maregne naho le fiaignagne mandrakezay. ²¹ Anake, ambeno ama ze sampy ty tegna areo.