¹ Ze laha tamboaloha e zay fa nirey ay, le ze fa nitrea ay amo masoay io, le ze fa netea ay, naho ze fa tsinapa ty tagna ay, izay le miomba ty lilin-kavelogne. ² Manahake izay ka, ty nampahafantaragne ty havelogne, le fa nitrea ay zay, naho le zahay ty mitsangagne ho voanolombelogne ama zay. Le izahay ty mampahafohigne ama areo ty havelogne mandrakizay, ze tama ty Rae ao, naho ze fa nampahafanteregne anay. ³ Ze fa nitrea ay naho ze nirey ay avao ka ty hambara ay ama areo, mba hanagna 'reo fifinkahazoagne amay avao ka. Ty fifankahazoagne anagna ay moa le ama ty Rae naho ama ty Anae, Jesosy Kristy. ⁴ Manahake izay avao ka, manoratse zo raha ho anareo zahay mba hilefesa ty haravoan-tika. [Fagnamaregnagne: ze tikan-drehake taolo ilae le vakiegne hoe izao: " Ara le manoratse zo mba hilefesa ty fifalea'reo."] ⁵ Izao ty hafatse nirey ay hirike amae le ambara ay ama 'reo: Andrianagnahare ro fahazavagne, naho ze Amae ao le tsy misy maiegne vatae. ⁶ Naho mivolagne tika fa managne fifandraesagne Amae naho mandeha ama ty maiegne, le mavande tika naho le tsy manao ty maregne. ⁷ Fe ie naho mandeha ama mazava manahake Aze tika agnate ty fazavagne ao, le managne fifandraesagne ama ondaty kiraidraike tika, naho le ty lio i Jesosy Anae ro magnalio antika ama ty hakeo aby. ⁸ Naho mivolagne tika te manankakeo, le mamitake ty aintika tika, naho le tsy ampiaintikao zo fahamaregnagne zao. ⁹ Fe ie naho miantoke ty hakeontika tika, le miantoke vatae Reke ama ty fagnahagne ty hakeontika naho le magnalio antika ama ze tsy fahamaregnagne iaby. ¹⁰ Naho mivolagne tika te mbe liae naho niota, le manognom-pandagnitse aze, naho le tsy ampiaintika ao ty saontsie.