¹ Mifohaza, mifohaza, isikino ty herenao, nareo Ziona; isikino sikinao soa vatane reo, nareo Jerosalema, tana masy; fa tsy hilitse aminareo sasy ty tsy vitatampake na ty maloto. ² Ahimpao ty lemboke amity vatagnareo; miaregna vaho Mitoboha, nareo Jerosalema; afaho ty rojo vy ambozognao eo, nareo anak'ampela Ziona ndevo. ³ Fa izao ro tsarae Yaveh tihoe: "Navily maimaimpoa nareo, vaho ho vonje maimaimpoa." ⁴ Fa izao ro atalily ty Tompo Yaveh: "Tamboalohame agne ty ndatiko nandeha nizotso nimba Egypta agne mba hitoboke zisike ty andro misy farane; fa nampijale Asyria vaho tsiela iereo. ⁵ Amizao ino ty hanagnako eto-izay ro fitalilia Yaveh-hisake fa nalae tamity tsy antone ty ndatiko? Mandratiraty reo ze mandily amy gniereo eo-izay ro fitalilia Yaveh-vaho vinolambola avao ty agnarako isan'andro. ⁶ Naho izay ty ndatiko le hahay ty agnarako; ho hae gniereo amy ze andro zay fa Iraho iaze mivola tihoe: "Eka, Iraho zay!" ⁷ Henhe ty hasoa ty tombo gny mpinday hafatse ambohitse egne reo ze minday vaovao soa, ze mitalily fiadagna, ze minday tsara soa mahafale, ze mitalily famonjea, ze mivola amy Ziona tihoe: "Manjaka ty Zagnaharenao!" ⁸ Njigno, manondrotse ty feone mpiambenao reo, miharo koram kafalea iereo, satria hahisake ty fiheregna Yaveh amy Ziona agne iereo, ty maso gniereo iaby. ⁹ Miharoa renge antsan kafalea, inareo rava gny Jerosalema; fa Yaveh lefa nagnahere ty ndatine; fa nagnavotse ani Jerosalema re. ¹⁰ Fa naneho ty vatane masy tamaso ty firene iaby Yaveh; hahisake ty famonjea ty Zagnaharentika ty tane iaby. ¹¹ Miala, miala, miboaha etoa; ko mikasike zaka maloto; miala tagnivoane eo; liovo ty vatagnareo, inareo ze minday ty hanagna gn'Yaveh. ¹² Fa tsy tampoke ty hiboahanareo, na tahotse ro hialagnareo; satria Yaveh le handeha Hialoha anareo; vaho iaze -Zagnahare Israely ro ho farandala gnareo. ¹³ Ingo, hiasa ampahendrea ty mpanompoko; ho ambone naho hisondrotse re, vaho ho abo vatane. ¹⁴ Fa manahake ty nahavere ty maro taminao-le simba loatse tsy manahake ty agnondaty ty tarehene, vaho tsy hisake manahake ty ndaty sasy ty Pozine. ¹⁵ Ndra le izay aza, hambole firene maro ty mpanompoko vaho hagnily ty vavane naho iereo mpajaka. Fa ze tsy mboe vinola iereo, le ho hisa gniereo, vaho ze tsy mboe re gniereo, le ho azo gniereo.