¹ Ry Yaveh, Zagnahareko riha; hagnakatre anao raho, hiantsa ty agnaranao raho; fa le fa nanao zaka-mahagaga riha, zaka le fa vinogno ela, ampatokia vatane. ² Fa le fa natao ho korotam-bato ty tana, naho ty tana voaaro mafe, ho harava, naho ty fiaro mafe reo vahiny tsy ho tana. ³ Ka le hagnomea hasy anao reo ndaty mahere; hatahotre anao ty tana reo firene feno seresere. ⁴ Fa fitoboha fiaro hoahy ty ndaty mahantra riha, fialofa hoahy ze ore ao amity fijaleane_fialofa amity tafion-tioke vaho alokaloke amity hafana. Laha hoe ty tafion-tioke handietre ty rindry ty fofognay reo masiake, ⁵ naho hoe ty hafana amity tane maike, ro nahareizanao ty kora reo vahiny, manahake haresea ty aloke ty raho ty hafana le hoe zay kea ro hamalea ty antsa reo masiake. ⁶ Eto amity vohitse toy ro tazoa Yaveh Tompo ty maro fagnafara amireo zaka vondrake, amity divay maro karazane, amity laoke bey solike, fagnafara amity divay le fa nitoboke ela hoahy ty vahoake iaby. ⁷ Horavae eto amity vohitse toy ty fanakofa eo amity vahoake iaby, ty tragno kala eo amity firene iaby. ⁸ Hatelene zisikagne ty fate, naho Yaveh tompo hamafa ty ranomaso amireo tarehe iaby, hafaha amity tane iaby ty fahafaham-baraka ty ndatine, fa Yaveh ro le fa nirehake zay. ⁹ Naho horehafe amize andro zay ty hoe:"Ingo, toy ro Zagnaharentika; le fa nandy aze tika, naho re hamonje antika. Re ro Yaveh, le fa nandy aze tika, hifale vaho hiravo ty amity famonjeane tika." ¹⁰ Fa eto amity vohitse toy ro hitsahara ty tagna Yaveh; naho Moaba ho voalia-lia amity toerane, na le voalialia ao andavake feno zezeke aza ty maloto. ¹¹ Namelatre ty tagna iereo teo agnivo zay iereo, hoe ty famela ty mpiagno ty tagnane laha fa milagno, Fa Yaveh hanjotro ty avognavo iereo na le eo aza ty falaky ty tagna iereo. ¹² Ty manda abo fiarovanao le hoambanene amity tane, ho eo amity deboke.