¹ Ingo, hagnafoa ty tane Yaveh, handrava zay, hahamaike aze naho hizara reo vahoake. ² Hanahake zay ro hoahy reo vahoake, ty mpisoro; ty mpanompo, ty tompo, mpiasa antragno; ty tompo vavene, ty mpivily, ty mpamarotre; ty mpagnomea trosa, ty mpitrosa; ty mpandrambe tombone, naho ty mpagnomea tombone. ³ Ho rava vatane ty tane naho ho foagna vatane; satria Yaveh ro le fa nirehake ze rehake zay. ⁴ Maike vaho malazo ty tane, milofike vaho malazo zao tontolo zao, miharerake ty ndaty malaza ty tane. ⁵ Maoloto amity alala reo vahoake ty tane satria le fa nandika ty lily, niota ty lily, naho nivalike tamity fagnenkea maharetre zisikezay iereo. ⁶ Laha zao le mandrava ty tane ty ozo, naho meloke reo vahoakene. May reo vahoake ty tane, naho tsy ampe ro sisa tavela. ⁷ Maike reo divay vaovao, malazo ty voaloboke, mitempo iaby reo fale agnarofo. ⁸ Mijano ty feo mandrotsirotsy ty ampongatampake, vaho ty tabataba reo mifale; mitsahatre ty hafalea amin-dokanga. ⁹ Tsy mino divay na miantsa sase iereo, naho ty toake le mafaitse hoahy reo ze mino zay. ¹⁰ Rava ty tana ty koronta; mihily vaho foa iaby reo tragno iaby. ¹¹ Misy korake noho ty divay egne andalambey; maieke ty hafalea, nanjavo ty hafalea. ¹² Harava sisa ro eo amity tana, naho ty vavahady le poteke. ¹³ Fa hoe zay ro ho amity tane iaby eo amity firene, manahake ty hetae oliva voatam-pake, manahake ty fitiponam-boaloboke laha fa vita ty fihaza. ¹⁴ Hagnakatre ty feone vaho hikaike ty hasin'Agnahare, naho hikorake an-kafalea bakamity riake iereo. ¹⁵ Laha zao le mandaza Yaveh agne antignana, magnomea hasy ty agnara Yaveh, ty Zagnahare Israely ao amireo nose. ¹⁶ Zisikagne ampara ty tane ro nahareizanay antsa hoe:" Hasy anie hoahy ty mare!" Fa hoe raho ty hoe:" Le fa nihasoa raho, le fa nihasoa raho, feie! Ty mpamitake le ninday ampitake; egne, ty mpamitake le vatane ninday ampitake vatane." ¹⁷ Aminareo ty tahotre, ty lavake, naho ty fandrike ry vahoake ty tane. ¹⁸ Re ze nilay ty feo ty horohoro le ho poke ao andavake, naho re ze miakatre bakao andavake le hoazo ty fandrike. Hivoha ty varavara ty lagnitre, naho reo fagnoregna ty tane le hihozo. ¹⁹ Ho rava vatane ty tane, hitrerake ty tane; hihozongozo mafe ty tane. ²⁰ Hivembe manahake ty ndaty mamo ty tane naho hitsingeva manahake ty tragno akato zay. Havesatre amizay ty hadisoane naho hitonta zay ka tsy hiare sase. ²¹ Naho amize andro zay le hagnasaze ty miaramila ty agnabo agne ambone, vaho reo mpanjaka ty tane etoy antane Yaveh. ²² Haharo iereo, gadra ao andavake, naho hitsy ao ampigadra; naho afake andro maromaro le ho voasaze iereo. ²³ Naho le ho megnatre ty vola, naho hoafa-baraka ty masoandro, satria hanjaka amin-kasy ao ambohitse Ziona vaho ao Jerosalema, naho magnoloa reo taolagnolone Yaveh tompo ty maro.