¹ Talily miomba i Damaskosy. ² Hafoe reo tana Aroera. Ho toera handrea ty biby hare rey, naho tsy hisy hampitahotre iereo. ³ Hanjavo tsy ho ao Efraima, ty fanjaka bakagne Damaskosy, naho ty sisa tavela Arama reo tana voaaro__hanahake ty hasy ty vahoake Israely reo__zay ro talily Yaveh tompo ty maro. ⁴ Naho amize andro zay le ho kele ty hasy Jakoba, naho hizare hahia ty havondra ty nofone. ⁵ Hanahake ty amity famoria ty mpihaza ty vare an-tohine zay, naho ty sandry ty mpihaza ty salohim-bare. Hanahake ty amity fihaza ty ndaty raike ty salohim-bare egne amity baibo Refaima zay. ⁶ Hisy sisa voavory hosisa, kanefa, hanahake ty amity fihozognozo ty hetaen'oliva: misy oliva roe na telo eo amity tahone ambone vatane, amity hetae mamoa__zay ro talily Yaveh, Zagnahare Israely. ⁷ Amize andro zay le hitolike amity Mpamboatre aze ty ndaty, naho ty masone hagnete ty Raike Masy Israely. ⁸ Tsy hagnente ty alitara iereo, ze asa ty tagna iereo, na hagnente ze natao ty rambo-tagnane, le ty baon'Aseraha na reo sare masoandro. ⁹ Amize andro zay le hanahake ty bao hetae nafoe egne amity loha ty tazoa ty tana mafe ore iereo, ze nafoe noho reo vahoake Israely naho hanjare ho maike zay. ¹⁰ Fa nagnaligno ty Zagnahare ty famonjeanareo nareo, naho natao nareo kisare tsy hay ty vatolampy ty herenareo. Ka mambole zaka-mitiry soa nareo, naho mametrake tahom-boaloboke azo bakamity vahiny, ¹¹ amity andro hambolea reo, vaho hamafea nareo, vaho hampitiria nareo. Tsy ho ela le hitiry ty voanareo, feie tsy hahavagno ty vokanareo amity andro fijalea vaho alahelo mafe. ¹² Loza! Ty vande ty ndaty maro, ze mitrero manahake ty fiero ty riake, naho ty fifoake ty firene, ze mamaoke manahake ty fipao ty rano mahere! ¹³ Hitrero manahake ty fipao ty rano maro reo firene, feie homeloke iereo mafe ty Zagnahare. Hilay lavitre iereo naho paie manahake ty akata-raty tiofen-tioke egne amity vohitse, naho manahake ty akata-raty ente ty tafiotre. ¹⁴ Amity hariva, ingo, ty horohoro! Aloha ty maray le ho kele reo! Zay ro anjara reo ze mangalake antika, ty amboara reo ze mamoteke antika.