¹ Mu gilumbu teegu gi posu,bendi gu malumba mu musuga-musuga,ba needi ma gabu mana ma bayidigi. ² Ba daadi dadi di gadi gu giafulu di gadi badudi gu malumba. ³ Ba goodi mu kadi di malumba,mvum,bi yi fwumu Yesu yi gadi. ⁴ Dangu di ba gumi loo ba gadi mu gieshi mudiambu ye bwoona ba bagala boodi ba manani mu mbimba ye baa bavadi miledi miana mingengagi. ⁵ Bakedu bu bagadi ye booma,ba dashi ma mbunzu ma baa mu manu,haa baa ba baledi mbi:"mumbada kii lu ba dinga wuna weedi ye mooni mu kadi ga bafwaa? ⁶ Loo geedi keega yaa,haa wu fudumugi.Lu bayaba keega mu pila yi ga yagulagi,mu dangu di ga gadi teegu gu Gadileya, ⁷ ga yagulagi mbi:gu sonami mbi mwaana muudu ba fani gu mu deega gu mioogu mi baadu ba masumu,ba fani gu mugooma ye kulundji,nga ga fudumuga mu gi lumbu gi dadu.'' ⁸ Bakedu ba yibugi malongi mana,ye ba balumugi gu malumba. ⁹ Ba needi tsangu djiootsu gwedi guumi ye wu moshi ye gwedi bana bootsu. ¹⁰ Bana ba yagulagi mapandi mana mootsu gwedi ba tumwa gu gadi:Madiya Magadala,Djiani ye Madiya ngudi wu Djiagi,ye bakedu beega ba gadi ye baa. ¹¹ Haa mapandi mana gwedi ba tumwa beega ba gondi lugwigilu,loo ba gwigidi mana mootsu ma yagudi bakedu. ¹² Haa Piela ga niamugi,geendi tiinu gu malumba.Ga sondamani muna dalaga,gadadi ndi mweni miledi mitaalu.Piela gendi gu nzu yandi,ga yandigi gu di yufula mu mapandi mana ma ludagi. ¹³ Haa dalani,mu gilumbu giagina,boodi mu kadi ga baa bendagi gu bula di balendigi mbi Emayishi,gu leeya ye Yelusalemi mu gidamina gi vula. ¹⁴ Baa muna wagana baa ye baa mu bina biootsu biludi. ¹⁵ Ba dadi mbi mudangu di ba nwanaganagi ye gu yufulagana,Yesu ndi mweni ga finami ye ga vugani mu ndjila ye baa. ¹⁶ Haa misu ma baa loo ba dadi mu gu muyaba. ¹⁷ Yesu ga ba ledi mbi:"kii lu ba yagula binu ba boodi lwedi mu ndjila mu gwenda?"Ba manani mu kenda-kenda. ¹⁸ Wu moshi mu kadi ga baa mu djina di Kilopashi,ga mu vududidi mbi:"weedi ndi mweni gwoogu,wuna wu ba ginga gu Yelusalemi wu ba gonda gu yaba mootsu ma ba luda mu gilumbu gii?" ¹⁹ ''Kii mapandi?''gu yufulagi Yesu.Ndi mududidi mbi:"mapandi mana madadidi Yesu mwaana wu Nazaledi,wuna wu gadi mbigudi wu ngolu wu hangagi ye wu yagulagi gu misu ma Gahungu ye gu ma mugangu wootsu, ²⁰ haa beeni geshi kanu ye ba twadishi ba pidu ba mugami ye gu muilembula mu lufwaa ye gu mu gooma ye kulundji. ²¹ Pidu du yindulagi mbi ndi wu fani guhulusa Yishiledi.Bwoona,mumbada ye maa,lelu di bilumbu bidadu yandiga di hangamani mapandi maa mootsu. ²² Haa bakedu bavula mukadi ga pidu,ba du yidugishi ngolu,mu gwenda mu musuga-musuga gu malumba. ²³ Dangu di ba gondi dala mvumbi yandi,baa bitshi ba wanagani ye ba tuumwa ye bitshi yagula mbi geedi ye mooni. ²⁴ Beega ba gadi mu kadi ga pidu bendi gu malumba baa keega ba dadi mapandi nga bu yagudi bakedu.Haa ndi,baa loo ba mudadi.'' ²⁵ Bwoona Yesu ga ba ledi mbi:"baadu ba gondi mayela,ye mbundu ndji baa dji gondi lugwigilu mu gu gwigila miootsu mina mi yagudi ba mbigudi. ²⁶ Loo gwedi fwunu mbi:Kidishidu bu ga dadi minianga mu mapandi maa,mbi wu goodi mu kiembo?" ²⁷ Yandiga gwedi Mososhi ye gwedi ba mbigudi bootsu,mbi ga ba lelaga mu masonugu mootsu mina midadidi. ²⁸ Dangu di ba gumi pena-pena ye bula,dina di bendagi,ba yindudi keega gwenda gu leeya. ²⁹ Haa muna gu ba hemigisa,ye guyagula mbi:"gala ye pidu,mudiambu mashiga ma gumi pena-pena ye gilumbu mu gwenda gu tsuga.''Ye ga goodi mu gusala ye baa. ³⁰ Ba di dadi mbi.mudangu di ga gadi ye meesa ye baa,ga sendi mapaa gu ngoyi yi gu masaguna,ga bahegi. ³¹ Misu ma baa magadi ma hwagangula ye baa muna gu muyaba,haa ndi ga walugi gu misu ma baa. ³² baa ba yagulagani baa ye baa:"mbundu dji pidu loo dji leemagi mu kadi ga pidu mudangu di duyagulagi mu ndjila ye mu gudendudila masonugu?" ³³ Mudangu diadina di gadombugi ndi gu yilu,baa bavudugi gu Yelusalemi keega bawani bana guumi ye wu moshi,ye bana ba vugani ye baa. ³⁴ Muna yagula mbi:"fwumu gu masonga wu fudumugi,ye bu ga monigi gwedi Shimoni.'' ³⁵ Bwoona ba yandigi guda mana ma ba lududi mu ndjila,keega buni Yesu ga ba ledi mudangu di ga sagumunagi mapaa. ³⁶ Mu dangu di baa bada mapandi mana,Yesu ndi mweni ga moonigi mu kadi ga baa,ye ga ba ledi:''ngemba djigala ye binu!'' ³⁷ Mumbada ba gadi ba hwaa yula ye booma ba yindudi mbi wuna ga gadi muhunga. ³⁸ Yesu ga ba ledi mbi:''mumbada kii lu ba gudi yangisa,ye mumbada kii ngiufuu di ba mana duga mudjimbundu dji binu? ³⁹ Dalani mioogu miami ye milu,gwedi mi.Gamani ye dalani.Muhunga loo shi wu moshi weedi ye luudu shi gifwa nga bu luba taala muhunga loo lu fani gu mu dala.'' ⁴⁰ Mu gu yagula mana,ndi ga ba ledi mioogu ye milu miandi. ⁴¹ Dangu dina diootsu baa bagadi ba gondi gwigila mu gieshi ye gu yiduga,Yesu ga ba ledi mbi:"yaa lwedi ye gima gi moshi gi gudia?" ⁴² Ba muvududidi ba mbitshi boodi ba gu yuma. ⁴³ Yesu ga sendi,ga dii yi miisu ma baa. ⁴⁴ Ga ba ledi mbi:"maa mana ma yi lulelagi,mu dangu di yi gadi ye binu,bu yi luledi mbi ma fani lungisama mootsu mana masonamani mumbada ye mi mutshigu dji Mososhi mwedi bambigudi,ye mu migunga. ⁴⁵ Bwoona ga ba gangi mabanza,gu ngoyi bayandigi gu yagula masonugu. ⁴⁶ Haa ga ba ledi:"bwoona gusonami mbi Kidishidu ga fani dala bulu,nga ga fudumuga mu lufwaa mu gilumbu gi dadu. ⁴⁷ Bwoona gu balumuna mbundu ye gu lolula gu masumu nga gu longamana mu ndjina diandi mu maganda mootsu,yandiga gu Yelusalemi. ⁴⁸ Lwedi ba mbangi mu mapandi maa. ⁴⁹ Dalani,yi dumisa gwedi vbinu biaana dada wami bi ga peegilatshi.Haa binu salani yaa yi vula tii guna gu lu vada ngolu dji gaduga gu yilu.'' ⁵⁰ Bwoona Yesu ga ba ledi tii gu Bedani.Ga zangudi mioogu,ga ba sugumuni. ⁵¹ Gu gumi gu dangu di ga basagumunagi,ga ba shishi ga dombugi gwandi gu yilu. ⁵² Gu ngoyi yi gu samba,ba vudugi ba bootsu gu Yeluzalemi mu gieshi gi ngolu. ⁵³ Ba galagi dangu djiootsu mu nzu yi Gahungu,mu gu yimbilaga ye gu sagumunaga Gahungu.