¹ Tafara gny nahaterahan'i Jesosy tao Betleheman'i Jodia tamin'gn'andron'i heroda mpanjaka, ro niavy tao Jerosalema johary manam-pahaiza bak'an-tignana agny nivola hoe: ² "Aia I gnazy teraky ho mpanjaka gny Jiosy? Nahajery gny vasiabak'antigna zahay sady avy mba handrengy azy." ³ Lafa nahakasa zay Heroda mpanjaka, ka nihorohoro I, voho i Jerosalema iaby niaraky taminy. ⁴ Nandesin'i Heroda niaraky gny loha gny mpisoro iaby voho gny mpagnora-dalan'gny olo, sady nagnontany azy reo hoe: "Aia ro hahaterahan'i Kristy?" ⁵ Nivola taminy reo hoe: "Ao Betleheman'i Jodia, fa zaho ro voasoratry gny mpaminany hoe: ⁶ 'Ka iha, Betlehema, agny amin'gny tany gny Joda, ka ty kely mare amin'reo mpitondran'i Joda, fa avy aminao ro iavian'gny mpanapaky gnazy hiamby gny oloko Israely."' ⁷ Ka nikaiky mangiky gny johary manam-pahalala i Heroda mba hagnontany andreo mazava soa gny fotoa nipoira gny basia. ⁸ Nalefany tagny Betlehema reo, manao hoe: "Mandehana ka fotoro soa gny mahakasiky gny zaza. Lafa jerinareo I, ka agnambarao aho, mba afahako mandeha koa handrengy azy." ⁹ Tafara gny nandresean-dreo gny mpanjaka, ro nandeha tamin'gny lalany reo, sady gny basia hitansreo t'antignana tegny ro hitariky andreo paraky hijanonany t'ambony gny toera nisy gny zaza. ¹⁰ Lafa nahajery gny basia reo, ka votraky sinisiny mare. ¹¹ Nilitry t'an-tragno I reo sady nahajery zaza niaraky tamin'i Maria reniny. Niankohoky sady nandrengy azy reo. Nanokatry gny mpisy harea reo sady nanolotry gny fagnomeza volamena, dintin-kazo magnitry, voho gny miora ho azy. ¹² Nampitandry andreo tamin'gny nofy Andrianagnahary mba tsy himpoly agny amin'i Heroda, ka lala hafa ro nandehanadreo namonjy gny firenea ndreo. ¹³ Lafa roso reo, ka nisy anjelin'i Tompo niseho tamin'i Josefa tamin'gny alala gny nofy sady nivola hoe: "Miarena, andeso gny zaza voho gny reniny, ka mandosira agny Egypta. Mitoera agny paraky hivolagnako aminao, fa i Heroda ro mitady gny zaza mba hamonoany azy." ¹⁴ Alik'igny Josefa ro nifoha sady nanday gny zaza voho gny reniny ka nandeha a Egypta. Nipetraky tagny I paraky hifatesan'i Heroda. ¹⁵ Zay ro nagnatanteraky gny nambaran'i Tompo tamin'gny alalan'gny mpaminany hoe: "Kinaiko hiala tagny Egypta gny gnanako." ¹⁶ Bakeo Heroda, lafa nahajery fa voafitaky gny johary manam-pahalala, ka nasiaky mare. Nagniraky voho nampamono gny zazalahy iaby roa tao mizotso tao Betlehema voho tao amin'gny faritsy iaby, araky gny fotoa nofotara gny mazava tamin'gny lehilahy manam-pahalala. ¹⁷ Bakeo ka tanteraky gny safa nivolagny tamin'gny alalan'i Jeremia mpaminany hoe: ¹⁸ "Nisy feo kasa tao Rama, fitomagnia voho fisaonam-be, mitagny noho gny amin'gny gnanakiny i Rahely, sady tsy nagneky gny ho ampanginy i, fotony fa lasana reo." ¹⁹ Lafa maty i heroda, ingo, nisy anjelin'gny Tompo hita tamin'i Josefa tagny Egypta tamin'gny nofy sady nivola hoe: ²⁰ "Mifohaza ka andeso gny zaza voho gny reniny ka mandehana agny amin'gny tanin'Israely, fa maty gnazy nifofo gny ain'gny zaza." ²¹ Nifoha Josefa, nandesiny gny zaza voho gny reniny, ka nandeha tagny an-tanin'Israely. ²² Fa lafa kasany fa i Arkelaosy ro nanjaka tagny Jodia nandimby an'i Heroda babany, ka natahotry gny handea agny I. Tafara gny nampitandreman-Dragnahary azy tamin'gny nofy, ka niala nandeha amin'gny farits'i Galilia I ²³ ka nandeha sady nipetraky tao amin'gny tana kahia hoe Nazareta. Zay ro nahatanteraky gny voavola tamin'gny alala gny mpaminanay reo hoe: "Nazarena ro hikahia azy."