¹ Bafadisi we ndam'a basonogo baduugu gu Yelusalemi lubaya ziungu Yesu. ² Bamono balongogo bande bamoso badiaya miogo mikono guwululu; ³ mutulu bafadisi we bayudu babosogo badiaga ni lo bamawululu miogo pima-pimi; ⁴ ni bamadugu gu zaana tomo bu bawebelga; bagele se we misigi mimbana nga guwululu magobo we mabungu. ⁵ We bafadisi we basonogo lu bawufulu Yesu ni mutul'a ki balongogogo bakono gulabaga misigi mi bambudu, badiaga miogo mijili? ⁶ Yesu ni: Bapal' ba, Yisaya ga boda bigili mu tul'abini ni baada banzidisaga kaga gu gono, mu mudimi lowo; ⁷ nulabga mapana ma baada, ma Nzaama lo ga bini. ⁸ Lugabisa balele ni nulabaga misigi mi Nzaama kaga mapana ma baada. ⁹ Mose gadodo ni zidisi mag we gid'aga ni lo batuguzwa si nugidaga si gimi. ¹⁰ Nudogolo misigi mi Nzaama nusi misigi mi bini beene. ¹¹ Si nudodoga ni muudu ni lo gamazidisi gid'ana ni lo mana bamuzwe; ¹² Ni wudodo abunu, numulelega ni gakono gusalasa gid'ana we mana ¹³ Nde bunu nugidili ndaga-Nzaama gimi gi pamba, nuyasalene mapana ma bini beene. ¹⁴ Lugabisa bademene gabalele ni: Wana! ¹⁵ Lo gugele we gimi yanje gisumunuga muudu si gugele gini giduguga gisumunuga. ¹⁶ Wugele we matswi maguwugene gawugu. ¹⁷ Lugawini mu nzo, balongogo bande lubamuwufulu mutula tigi yini; ¹⁸ nde ni bini se lo nuyayabene tigi yiyi? ndungu lo gabini? ¹⁹ Gimi gibebesga muudu gini gimaduugu mu kebe; gini giwinginiga ni gimaduugu gienega gu tsege. ²⁰ Lugabisa dodo ni gini giduguga mu kebe ga muudu nde gini gisumunuga; ²¹ mutulu gimaduugu mu mudimi. ²² Bimi biduguga mu mudimi abibi: mafa manungu mafa, ginduumu, gwibi, lulende, lese, bifu bifa we bimbana se... ²³ Bimi bibiosogo biduguga mu kebe biwi bibebesga muudu. ²⁴ Yesu lugadogo yana gagie gu Tyr we gu Sidon ni gabadamana; ²⁵ si mukaada wumoso wubela mwana lugaya mubwilene ya mili ni nzunuseene mwana wuwu; ²⁶ Mukaada gagele mugrec, gamulomo ni gamudusu mwana muhungu wufa; ²⁷ Yesu ni madia ma baana lo bawaga bambwa. ²⁸ Mukaada lugagumunu ni: E ndebunu Mfumu, bambwa badiaga bisenge gu tsina mese. ²⁹ Yesu ni ndawene, mwana bu gazuna. ³⁰ Lugafudugu gayabaga mwana wuzunu. ³¹ Yesu lugafudugu gu Tyr mu nzila Sidon we Decapole, ³² baya mudwalene mwana wumoso gifa-matswi, nde se baba. ³³ Yesu lugamudwala mu lugala, lugamusi ndeme mu matswi, lugamugeme mu ludimi; ³⁴ Lugadele gu tala, lugahumunu ni: Ephphatha mbangudulu ni 'zibigi'. ³⁵ Mbal'moso matswi mande lumazibigi, ndaga se luyiduugu. ³⁶ Yesu lugabalele ni gwadelene muudu lo, si nde bunu paana luyimwangagana. ³⁷ Baada babosogo bamona guwibigene we bifa-matswi biwuga we ba baba badoda.