¹ Gwigi Meeme Poolo wunu wugidili Yesu tumu waana mu guzolo gwana ande paangaana Timote duya nusonogeene bini bisi Kolinti ande baklisto ba Akayi babosogo. ² Gidaabisi Nzaama ande Mfumu Yesu banu dele mu disi lupimi. ³ Dumu lumusaana Nzaama, gidaana-Mfumu wubisi Yesu wunu wuleedega ngolo gugele baada bigi mu pasi, ⁴ ndelunu bisi duwaaga se baada bambaana bigi mu pasi yi gifande gifa ngolo yini yiga duwaaga nde. ⁵ Ndebunu bu twigi mu pasi yini yimono Mfumu Yesu wunu wudu waaga ngolo, bisi se duba waaga ngolo baada bana bigi mu pasi ⁶ mutulu mu pasi ndeyini ni dumaganga mudimi, butwini baga moono du mvulande mvulu. ⁷ Bisi dunu siline mudimi ni pasi yinu yamono ndeyini yini nuwa ngolo nga bisi. ⁸ Duya zolo ni bini nuyabeene pasi yidu mono bisigu ndaama Azi gunu gudu kaya fa. ⁹ Dununga ni budu fi, asi Nzaama wunu wudu silinige mudimi, luga duhulusu; ¹⁰ ndebunu buga duhulusu, ndebunu se bubini duhulusu mu daanga lunu. ¹¹ Bisi dumu silineege mudimi hoso daanga, bini se nudu saamaneege bisi mutulu mu bisaama bibini ande bi baada bambaana bubini duhulusu, baada bavulu bubini mudoono mutula bisi. ¹² Mapaana mamfunu mama fana gunuwa bini kiesi lowo ni migi mambaana, kaga mana manu yaaba, mana manuya bagisi ande maduya nusonogeene hoso daanga ni ¹³ bisi bu twini numoneene bini kiesi, bini se bunwini dumoneene bisi kiesi mu bufugu bu nsugu; ¹⁴ nukono gulaba biesi bi gisi gigi, asi nuwesele gimuudu gibini, Muhunga-Nzaama wunu dwalasaaga. ¹⁵ Manungu mameeme magele ni ngwini yadigi ya bulu lubini ya Kolinti mutulu nwa ndeede gu Masedoni tii gu Yudeye, asi manungu luma sobogo. ¹⁶ Lowo ni yima sala mu gimuudu ni mu mbala lowo yima dodo ni E, yima dodo ni Lowo. ¹⁷ Mfumabisi Yesu mwana-Nzaama wuduya longo ande meeme ande Silasa ande Timote gadodaaga ni E ande Lowo mu mbala yimoso. ¹⁸ Nde gigi wunu wudodoga peele ni E ¹⁹ mutulu mu kebe gande mwigi kaga E. ²⁰ Ndelunu bisi wudodoga ni Amen mu gulumugu Nzaama mutulu nde wuya gugusu mapaana mamosogo madugenese Daada Nzaama. ²¹ Nzaama wudu si gidimi, wudu soolo, wudu diageene Muhungaana mu kebe ga midimi. ²² mu gudu leese mapimi mande mana maga duswegeene. ²³ Lowo gwigi mutula gunu wa pasi gimi giyi koono guzolo gwa fudugu mu nzili yi bulu lubini, ndelunu ni yima sala gubiyi, Nzaama ganzwe. ²⁴ Lowo duya saga gunu salasa mu gingolo-ngolo mapaana manu fana gusala bini mu lugwigili lubini, asi duya zolo mapimi mabini.