² bamaaya se gifa gimoso ngagwi ni maaga. ³ Salasa we luzidi bakaada bafileene badimi, bana bakono si muudu. ⁴ Bana bigi we baana ni lowo badigili, bawesele gu miogo mi baana we badigili babiwi; ⁵ wunu wuma badagana tsili, muudu wumusalasa lowo, wululeede mu gusaama Nzaama we guloomo lusalasa pibi we mooso. ⁶ Longo baada ni mukaada wunu wuya laba biesi bi gisi gigi bagele wungafa. ⁷ Ni muudu lowo gaya salasa gigana giana mumpani mu gubiyi. ⁸ Mukaada wufileene mudimi mu gumusonogo kuumu tomo gagugusu mvulu maguumu masamana, bagele we bifu bibi: ⁹ gansasga baana baana pimi, gayambga banzenzi pimi gu nzwana, ¹⁰ gadwala mudimi wumoso peele, gawululaaga mili mi baklisto, gasalaaga baada bigi mu pasi, ¹¹ gasalaaga mapaana mapimi. Bana bakono gununu gubasonogo lowo, ni lowo bubini bisa kwele, bini bwa madiadi, bubini bilagana nzila-Yesu, ¹² bini gwenaaga mu manzo ma gisaga-saga we gwawinginaaga mu mapaana ma baada bambana we bidodadodo. ¹³ Ndelunu meeme yimazolo ni bakaada bana babisa dwala badimi babiwi, babudu baana, ¹⁴ babansasa, bayaala manzo mabiwi mutulu bavulu babili nzila-Nzaama, balebe Sadana. ¹⁵ Ni we muklisto wu mukaada wigi ande bakaada bafileene badimi mu gigana gibiwi, wesele ni nde gabaselese, gakono guleede bugogo gu dibundunlu Nzaama, lunu luyasalasa bana bamakono tsili baada ba gubasalasa. ¹⁶ Bambudu bana basalga gisala gipimi bamafana gubaga matabisi mabisi mbal yoolo, bana balongoga bagwene. ¹⁷ Ndaga-Nzaama yiyadodo ni muuda-gisala gabege lufudu lwana. ¹⁸ Basonogo ni guganga lowo ngombi gono ni wuniada mbenge, mimi gayidi. ¹⁹ Ni bamaya funu mbuda-dibundu, pimi gugele baada boolo ni lowo badede; ²⁰ ni baada basele gubiyi, bangeneene ya misi mi baada babosogo, bunu bamoso nga bawugu boomo. ²¹ Iyaguleele ya misi mi Nzaama, mi Yesu we mi bawanzio mu gusala mapaana maama, ²² laba malongo maama, gugala we manungu mambana lowo, sala gifa gimoso gugele muudu wuwosogo. ²³ Gusa muudu miogo tina-tini lowo, guwinginaaga lowo mu masumu ma baada, lugenzaaga, gunwaaga maja peele lowo, ²⁴ nwaaga se ndama-mono mutulu nze wubelega guvulu. ²⁵ Baada bavulu masumu mabiwi mamonogoga mangoyo, bamoso gugilungunu, mapaana mapimi se mamosogo mamonogoga, mambana bu guswama lowo.