¹ Ka zao ro tantaran'ny gny havorohotan'i Arona voho Mosesy lafa nivola tamin'i Mosesy tagny am-bohitsy Sinay Yaveh. ² Gny agnarany reo anakilahin'i Arona la i Nadaba talagnolo,voho Abiho,Eleazara,voho Itamara. ³ Reo ro agnarany reo anakilahin'i Arona,reo mpisoro ze voahosotsy voho voatoka hanompo ho npisoro. ⁴ Fa Nadaba voho Abiho koa la maty tangnatrehan'i Yaveh lafa nanolitsy Gnazy bolo tsy ietagny ami-gny liomonton'i Sinay rozy.Tsy nana-gnanaky i Nadaba voho i Abiho,ka la Eliezara voho Itamara avao ro nanompo ho mpisoro nisondry tamin'i Arona baba-drozy. ⁵ Nivola tamin'i Mosesy i Yaveh.Hoy Ie:" ⁶ Andeso gny fokon'i Levy ka atoro gnan'i Arona mpisoro rozy mba hagnampy gnazy. ⁹ Aoky hatolotrao gnan'i Arona voho reo anakilahiny reo Levita.Atolotsy iaby rozy mba hanampy gnazy hanompo gny vahoakin'i Israely. ¹⁰ Tsy maintsy tingininao ho mpisoro i Arona voho reo anakilahiny,fa ze olo hafa firenena avy magnariniky la tsy maintsy vonoa ho maty." ¹¹ Nivola tamin'i Mosesy i Yaveh.Hoy Ie hoe:" ¹² Ingo,fa nangalaky reo Levita bakamin'ireo vahoakin'i Israely Zaho.Zay ro natoako laha tokony nangalaky gny talagnolo kiraikiraiky ze nateraky tamin'ny vahoakin'i Ysraely.Gnahy reo Levita. ¹³ Gnahy gny talagnolo iaby.Tamin'ny gnandro nagnisiako gny talagnolo iaby tagny amin'ny tany Egypta,ro nanokanako ho Gnahy gny talagnolon'i Ysraely iaby,ndra gny vahoaky ndra gny biby fiompy.Gnahy regny.Zaho ro Yaveh. ¹⁴ Nivola tamin'i Mosesy tagny an-diomonton'i sinay i Yaveh.Hoy Ie hoe: ¹⁵ " Isaho isaky gny hasaveregnany gny havorohotan'i Levy,isaky gny hasaveregnan'ny razamben-drozy.Isaho gny johary iaby ze vola raiky voho miakatsy." ¹⁶ Nagnisa gnandrozy i Mosesy,magnaraky gny safan'i Yaveh,magnaraky gny nandidiany gnazy hatao. ¹⁷ Gny agnaran'ireo anakilahin'i Levy la Gersona,Kohata,voho Merary. ¹⁸ Gny hasaveregnam-be bakamin'ireo anakilahin'i Gersona la Libny voho Simey. ¹⁹ Gny hasaveregnam-be bakamin'ireo anakilahin'i Kohata la Amarama,Izara,Hebrona,voho Oziela. ²⁰ Gny hasaveregnam-be bakamin'ny anakilahin'i Merary la Maly voho Mosy.Reo ro hasaveregnam-ben'ireo Levita,ze nilahatsy magnaraky gny hasaveregnany iaby. ²¹ Reo hasaveregnm-ben'ireo Libnita voho Simeita la bakamin'i Gersona.Reo iaby ro hasaveregnam-ben'ireo Gersonita. ²² Gny johary iaby mamototsy vola raiky voho miakatsy la nihisahy,ka niisaky 7500. ²³ Gny hasaveragnam-ben'ireo Gersonita la hivory amin'ny sisiny andrefan'ny tabernakely. ²⁴ Eliasafa anakilahin'i Laela ro tsy maintsy hitariky reo hasaveregnam-ben'ny havorohotan'ni Gersonita. ²⁵ Gny hasaveregnan'i Gersona la tsy maintsy mikarakara gny tragno-lay fihaogna ka ao agnatin'izay gny tabernakely.Hikarakara gny tragno-lay rozy,gny sarony,voho reo lamba ampiasa ami-gny filira ao ami-gny tragno-lay fihaogna. ²⁶ Tsy maintsy mikarakara gny lamban'ny gny kianja rozy,gny lamba eo ami-gny filiran'ny kianja-gny kianja zay magnodidy gny fitora masy voho gny alitara.Aoky hikarakara reo talin'ny gny tragno-lay fihaogna voho ze raha agnaminy eo iaby. ²⁷ Bakamin'i Kohata reo hasaveregnam-be reto:hasaveregnan'ny Amaramita,gny hasaveregnan'ny Izarita,gny hasaveregnan'ny Hebronita,voho gny hasaveregnan'ny Ozielita. ²⁸ Gnan'ireo Kohatita reo hasaveregnam-be ireo.8600 johary vola raiky voho miakatsy ro fa nihisahy mbahikarakara reo fanagnan'i Yaveh. ²⁹ Reo hasaveregnan'ny taranak'i Kohata la tsy maintsy mivory antimon'ny tabernakely. ³⁰ Elifaza anakilahin'i Oziela ro tsy maintsy hitariky gny hasaveregnam-ben'ireo Kohatita. ³¹ Rozy ro tsy maintsy mikarakara gny fiara,gny latabatsy,gny fasian-jiro,reo alitara,reo raha masy ze ampiasa ami-gny fanompoany,gny lamba,voho ze asa iaby mikasikizay. ³² Eleazara anakilahin'i Arona mpisoro ro tsy maintsy hitariky reo johary ze mitariky reo Levita.Tokony hagnara-maso reo johary ze mikarakara gny fitoera masy ie. ³³ Hasaveregnam=be roe ro bakamin'i Merary:"gny hasaveregnan'ny Malita voho gny hasaveregnan'i Mosita.Reo hasaveregnam-be reo la bakamin'i Merary. ³⁴ 6200 johary vola raiky voho miakatsy ro fa nihisahy. ³⁵ Zoriela anakilahin'i Abihaila ro tsy maintsy hitariky reo hasaveregnam-ben'i Merary.Tsy maintsy mivory avaratsy gny tabernakely rozy. ³⁶ Gny havorohotan'i Merary la tokony hikarakara gny rafitsy gny tabernakely,reo barany,fitsanganany,gny faladiany,gny fitaova iaby,voho ze raha mahakasiky gnazy iaby,ao agnatin'izay ³⁷ reo toha voho gny fitsanganan'ny kianja ze magnodidy gny tabernakely,miaraky ami-gny faladian'ireo,fihantognan-draha,voho gny taly. ³⁸ Mosesy voho Arona voho reo anakilahin-drozy la tsy maintsy hivory antignanan'ny tabernakely,agnatrehan'ny tabernakely,agnatrehan'ny tragno-lay fihaogna,magnandrify gny fiboahan'ny masoandro.Rozy ro tompon'andraikitsyho gnan'ny gny fagnatanteraha reo adidy ami-gny fitoera masy voho reo adidy ami'ny vahoakin'Israely.Ndra ia ndra ia olo hafa firenena mamonjy gny toera masy la tsy mantsy ho maty. ³⁹ Mosesy voho Arona nagnisa gny johary iaby tamin'ny hasaveregnam-ben'i Levy ze vola raiky voho miakatsy,magnaraky ze nandidian'i Yaveh.Niisaky 22000. ⁴² Mosesy nagnisa gny talagnolon'ny gny vahoakin'Israely iaby magnaraky ze fa nandidian'i Yaveh gnazy hatao. ⁴³ Nagnisaky gny talagnolo iaby magnaraky gny agnara ie,vola raiky voho miakatsy.Nahavoaisaky 22273 johary ie. ⁴⁴ Nivola tamin'i Mosesy ndraiky Yaveh.Hoy Ie hoe: ⁴⁵ "Alao reo Levita ho solon'ny talagnolo amin'ny vahoakin'Israely,voho alao gny biby fiharin'ny Vahoaky.Gnazy reo Levita-Zaho ro Yaveh. ⁴⁶ Mamoria sekely dimy ho gnan'ny fagnavota isa maray amy reo talagnolon'ny vahoakin'Israely ze mandilatsy gnisan'ireo Levita. ⁴⁷ Ampiasao magnaraky gny hasoan'ny gny lanjanao gny sekelin'ny fitoera masy.Gera roapolo gny sekely. ⁴⁸ Hameanao gnan'i Arona voho reo anakilahiny gny vilim-pagnavota ze naloanao." ⁴⁹ Ka la namory gny vilin'ny fagnavota bakamin'ireo ze nandilatsy gnisa tamy reo navotan'ireo Levita i Mosesy. ⁵⁰ Namory gny drala bakamin'ny talagnolon'ny vahoakin'Israely.Nahavory sekely 1365 ie,nilanja tamin'ny sekelin'ny fitoera masy. ⁵¹ Mosesy nagnome gny dralam-pagnavota ho gnan'i Arona voho reo anakilahiny.Mosesy nanao ze raha nisafagnin'i Yaveh gnazy hataony,magnaraky ze fa nandidian'i Yaveh gnazy.