¹ Ka lafa jajin'i Sanbala,Tobia,voho Gasema Arabo voho gny fahavalonay sisa tavela fa fanagnamboatsy gny manda ndraiky zaho ka tsy nisy faritsy tataky hiboahany sasy,ndra la mbo tsy nananga gny varavaragna tam-bavahady teo aza zaho, ² la hoy i Sanbala voho Gasema tagnamiko,nanao hoe:"Ndena,ndao tsika hihoa agny amin'ny gebon'i Ono agny ho agny."Kanefa nikinia gny hagnisy raty gnahy rozy. ³ Nagniraky mpanday hafatsy tagnamin-drozy agny zaho,nanao hoe:"Manao asa bevata zaho,ka tsy afaky minjotso.Nagnino ro hanjanoko gn'asa ka la hengako fa hinjotso zaho hagnaminao agny?" ⁴ Nandefa hafatsy mitovy ingefatsy tagnamiko rozy,fe nivaleako mitovy isakin'ny mandefa rozy. ⁵ Nagniraky gny mpiasany tagnamiko atoy manahaky gnan'izay fagnindiminy i Sanbala,nanday taratasy mivoha an-tagnany egny . ⁶ Voasoratsy tamin'izay tao hoe:"voaatitsy amin'ny firenena zao,sasy nambaran'i Gasema avao koa,fa mitetiky gny hanohitsy iha voho gny Jiosy,ka noho zay ro agnambaranao gny vala ndraiky.Manahaky gny ambaran'ireto tatitsy reto,la fa hanjary mpanjakan-drozy iha. ⁷ Fa nanendry mpaminany avao koa iha mba hanao gnan'izao fagnambara mikasiky gnanao zao agny Jerosalema,manao hoe:"Misy mpanjaka agny Joda!Mahazo matoky iha fa ho janjin'ny mpanjaka reto tatitsy reto.Noho zay miavia,ndao tsika hifampiresaky." ⁸ La nandefa safa tagnaminy agny zaho manao hoe:"Tsy nisy raha niseho manahaky raha safagninao zao,fa tagnatinao ao avao ro namorognanao gnazy." ⁹ Fa te hampatahotsy gnanay rozy,nametsivetsy hoe:"Mampiraviravy gny tagnan-drozy amin'ny fagnanova gny asa rozy,ka tsy ho vita zay."Fe henanizao,Andrianagnahary,mba fatraro gny tagnako." ¹⁰ Nagnagny an-tragnon'i Semaia anakilahin'i Delaia anakilahin'i Mehetabela,ze tsy afaky nihetsiky tan-tragnony tao zaho.Hoy ie:"Ndao hihoa an-tragnon-Dragnahary agny tsika,agnatin'ny tempoly ao,ka ndao hiliantsika gny varavagnan'ny tempoly,fotony avy hamono gnanao rozy.Ho avy hamono gnanao rozy amin'ny haliky." ¹¹ Namaly zaho hoe:"Johary manahaky gnahy va ro handositsy?Hilitsy an-tempoly ao mba hahazoany magnavotsy gn'ainy va gny johary manahy gnahy?Tsy hilitsy zaho!" ¹² Tonga say zaho fa tsy Ndragnahary ro nagniraky gnazy,fa naminany hanohitsy gnahy ie. ¹³ Nikaraman'i Tobia voho Sanbala ie.Nikarama gnazy rozy mba hampatahotsy gnahy,mba hagnanovako ze raha nisafagniny ka hanotako,mba hagnomezan-drozy gnahy agnara raty ka hangalan-drozy gny barakako. ¹⁴ Tiarovo Tobia voho Sanbala,Andrianagnahariko,voho ze raha nataon-drozy iaby.Tiarovo avao koa i Noadia mpaminany ampela voho gny mpaminany sasany ze nampatahotsy gnahy. ¹⁵ La vita tamin'ny gn'andro ropolo limiamby gny volo Elola gny vala.tafaran'ny gny dimanpolo roamby andro. ¹⁶ Lafa njanjin'ireo fahavalonay iaby zay,gny firenena iaby magnodidy gnanay,la navaka rozy ka tonta mare ta-mason-drozy teo avao.Fa hain-drozy fa vita tamin'ny fagnampean'ny Ndranagnahary gn'asa. ¹⁷ Tamin'izay fotoa zay la nandefa taratasy lako tagny amin'i Tobia gny manan-kaja tao Joda,ka la niavy tagnamin-drozy agny avao koa gny taratasin'i Tobia. ¹⁸ Fa nisy lako tagny Joda ro voafatotsin'ny gny fifanta tagnaminy,fotony vinantolahin'i Sekania anakilahin'i Ara ie.Ka Johanana anakilahiny fa nanambaly gn'anakampelan'i Mesolama anakilahin'i Berekia. ¹⁹ Nivola tagnamiko mikasiky gn'asa soany voho nitatitsy gny safako tagnaminy agny avao koa ie.Nandefasa taratasy bakamin'i Tobia zaho mba hampatahotsy gnahy.