¹ Nanohy nivola Joba sady nanao hoe: ² " Eh, laha mba manahaky gny tamy regny volana lasa fony nikarakaran-Dranagnahary gnahy regny mantsy zaho, ³ tamy namirampiratsy teo an-dohako gny jirony, sady tamy namakivaky gny maiky tamin'ny fahazavany zaho. ⁴ Eh, laha mba manahaky gny tamin'ny andron'ny fatoizako tamy gny finaman-Dranagnahary tao an-tragnoko regny mantsy zaho; ⁵ tamy mbo niaraky tagnako gny Tsitoha, sady mbo nagnodidy an-drozy anako, ⁶ tamy voarakotsy ronono gny lalako, sady gny vatolampy nandrotsaky rian-tsoliky ho gnahy! ⁷ Laha niboaky gny vavahadin'ny tana zaho, laha nipetraky tamin'ny toerako teo an-kianjan'ny tana zaho, ⁸ la nahita gnahy sady nijano lavitsy gnahy tamim-panaja reo tovolahy, sady gny olo antitsy nitsanga ka nijoro ho gnahy. ⁹ Nijano tsy nivola gny andriandahy lafa avy zaho; nagnampy gny tsihoviny tamin'ny tagnany rozy. ¹⁰ Nangina gny feon'ireo olo-manan-kaja, sady niraikitsy teo amin'ny lanilaniny gny lelan-drozy. ¹¹ Fa lafa baka nahare gnahy gny sofiny, la nitso-drano gnahy rozy; lafa baka nahita gnahy gny fijeriny, la nijoro vavolombelo ho gnahy voho nanaiky gnahy rozy ¹² fotony nagnavotsy gny olo ie, sady gny olo zay kamboty raiky lafa tsy nana na ia na ia ie hagnampy gnazy ie. ¹³ Gny tso-dranon'izay fa ho maty la avy tagnamiko; nahavy gny fon'ireo mpitondratena hihira fifalia zaho. ¹⁴ Misalotsy fahamarigna zaho, sady nampisalotsy gnahy izay; gny fahamarigna la manahaky gny akanjo lava voho satroky. ¹⁵ Maso ho gnan'ireo jiky zaho; tomboky ho gnan'ireo malemy zaho. ¹⁶ Ray ho gnan'ireo olo ory zaho; nandiniky gny aly zaho na la gny gnan'ny tsy haiko aza. ¹⁷ Namotiky gny valanoranon'ny olo tsy to zaho; nanombotsy gny niham-zoina bakeo amin'ny nifiny zaho. ¹⁸ La hoy zaho hoe: ' Ho maty ao amin'ny akaniko zaho; hampitobo reo androko manahaky gny vovom-pasiky zaho. ¹⁹ Misandrahaky eo amin'ny rano reo fakako, sasy gny ando nitoetry teo amin'ireo rantsako gny haliky manontolo. ²⁰ Gny vininahitsy ao agnamiko la vaovao lalandava, sady gny tsipikan'ny heriko la vaovao lalandava eo an-tagnako.' ²¹ Ninjanjy an-drozy olo; niamby gnahy rozy; nangina mba hinjanjy gny toro-hevitriko rozy. ²² Lafa vita gny safako, la tsy nivola sasy rozy; nitete manahaky gny rano teo amin-drozy gny vatako. ²³ Niamby gnahy lalandava manahaky gny niamby ora rozy; nampisagnasagna gny tsihoviny rozy mba hino gny safako, manahaky zay hataon-drozy amin'ny fara-ora. ²⁴ Nitsiky tamin-drozy zaho lafa tsy nanampo izay rozy; tsy mba nanda gny fahazavan'ny vatako rozy. ²⁵ Nifily gny lalan-drozy zaho sady nipetraky ho lehibeny; niaina manahaky gny mpanjaka omban'ny tafiny zaho, manahaky gny olo zay mampionona reo mpisaona.