¹ Nisy johary raiky tao amin'ny tanin'i Oza zay Joba ro agnarany; sady joba la tsy misy tsiny sady mahity, zay natahotsy gnan-Dranagnahary sady nifaly gny raty. ² Ie la nana gnanaky fito lahy voho telo vavy. ³ Ie la nana aondry fito arivi, rameva telo arivo, aomby lahy voho aomby vavy dimanjata, voho boriky dimanjato sady nana mpanompo lako. Ie ro johary bevata mare tamin'ireo olo Tantignana iaby. ⁴ Isaky gny andro voatendry ho gnan'ny nanaky lahiny, la nanao fisinisiniha tao an-tragnony ie. Rozy la nagniraky ka nikaiky gnan'ireo anabaviny telo mba hiaraky hihina voho hisotro amin-drozy. ⁵ Lafa nifara gny fisinisiniha, la nampikaiky sady nagnamasy gnan-drozy Joba. Nifoha maraindray be ie sady nanao fagnatitsy oroa ho gnan'ireo anany kirakiraiky , fa hoy gnataony:" Mety fa nanota na nagnozo gnanDranagnahary tagny am-pony anako reo." Nanao gnan'io avao Joba. ⁶ Sady tamin'io andro la avy niseho teo agnatrehan'iYaveh reo anakin-Dranagnahary. La avy niaraky tamin-drozy koa Satana. ⁷ Hoy Yaheh Tamin'i Satana hoe:" Bakaia ro niavianao?" Satana namaly gnan'i Yaveh ka nanao hoe:" Baka nirenireny teto an-tany, nivezivezy teo aminy." ⁸ Hoy Yaveh tamin'i Satana hoe:" Fa nandiniky gnan'i Joba mpanompoko va iha? Fotony tsy misy manahaky gnazy eto am-boninin'ny tany, johary tsy misy tsiny sady mahity, zay matahotsy gnan-Dranagnahary voho mifaly gny raty." ⁹ Bakeo Satana namaly gnan'i Yaveh ka nivola hoe:" Matahotsy gnan-Dranagnahary amin'ny tsy misy antony va Joba? ¹⁰ Tsy nasianao fefy va gny magnodidy gnazy, magnodidy gny tragnony, voho magnodidy gnazy manontolo? Fa notahinao reo asan'ny yagnany, voho nitombo reo biby fiompiny eto amin'ny tany. ¹¹ fa amizao amparo gny tagnanao ka kasiho zay iaby anagnany, sady henteo laha tsy magnozo Gnanao eo amin'ny tarehinao ie. ¹² Hoy Yaveh tamin'i Satana :" Ingo, eo ampelatagnanao zay iaby anagnany. Fa gny vatany avao ro ka hagnamparanao gny tagnanao." La niala tao agnatrehan'i Yaveh Satana. ¹³ Ndraik'andro , nihina voho nino divay tagny an-tragnon'ny anaky lahiny voalohan reo anaky lahiny voho anaky ampelany. ¹⁴ Nisy mpanday hafatsy raiky namonjy gnan'i Joba sady nivola hoe:" Niasa tany reo aomby sady reo boriky la nihina tagnilan'ireo teo. ¹⁵ Nanafiky gnan-drozy reo Sabeana sady nanambotsy gnan-drozy. Laha gny amin'ireo mpanompo, la novelezin-drozy tamin'ny lelan-tsabatsy. Zaho raiky ro tafatsoaky mba hampandre gnanao." ¹⁶ Laha mbo nivola igny ie, la nisy raiky koa avy sady nivola hoe:" Nilatsaky bakagny an-danitsa gny bonon-Dranagnahary sady nagnoro reo aondry voho reo mpanompo. Zaho raiky ro tafatsoaky mba hampandre gnanao." ¹⁷ Laha mbo nivola gnan'igny ie, la nisy raiky hafa koa avy vo nivola hoe:" Nizara vondro telo reo Kaldeana ka nanafiky reo rameva, sady nanambotsy gnan'ireo. Laha gny amin'ireo mpanompo , la novelezin-drozy tamin'ny lelan-tsabatsy. Zaho raiky avao ro tafatsoaky mba ampandre gnanao." ¹⁸ Laha mbo nivola gnan'igny ie , la nisy raiky hafa koa avy vo nivola hoe:" Reo anaky lahinao voho anaky ampelanao la nihna voho nisotro divay tao an-tragnon'ny zokin-drozy voalohany. ¹⁹ Nisy tsioky mahery avy bakagny agn'efitsy nikapoky gny zorony efitran'ny tragno, Nilatsiky tamin'ireo zatovo io, sady la maty rozy. Zaho raiky ro tafatsoaky mba hampandre gnanao." ²⁰ La nitsanga Joba , nanataky gny akanjony, nagnaratsy gny lohany, niankohoky teo amin'ny tany, voho nidera gnan-Dranagnahary. ²¹ Hoy gnataony:" tsy nisiky aho laha niboaky tao an-kibon-dreniko, sady tsy hisiky aho lafa himpoly ao. Yaveh ro nagnome, sady Yaveh ro nangalaky. Isaorana anie gny agnaran'i Yaveh." ²² Tamin'ireo raha nitranga iaby reo , la tsy nanota Joba, na koa niampanga gnan-Dranagnahary hanao gny tsy mety.