¹ Lafa niala kelikely tsy lavitsy vohitry io Davida, la avy Ziba mpiasan'i Mefiboseta nanegnategna gnazy miaraky amin-gny soavaly roe misy lasely fipetraha; nanday mofo roanjato voho tagnam-boaloboky zato noho aviavy zato fehea voho divay tavoangy raiky. ² Nivola tagnamin'i Ziba amizay mpanjaka igny hoe: " Nagnino iha manday raha lako reto io? Ka hoy Ziba hoe: " natao hiendranan-gny longon'i mpanjaka reo soavaly reo, mofo reo koa natao ho hanin'olonao reo, divay io hinomin-drozy. ³ Ka hoy mpanjaka igny: " Aia va zafilahiko igny? La namaly Ziba hoe: "Niegny tagny Jerosalema agny ie fa zao gny volany: " Hampolin-gny olon' Israely reo aminy androany gny fanjakan-gny babako. " ⁴ Ka hoy ndraiky mpanjaka tagnamin'i Ziba hoe: " Ho gnanao iaby raha nignan'i Mefiboseta reo henanio. " Zao gny navalin'i Ziba gnazy hoe: " Mihohoky voho miambany agnaminao aho mpanjakako. Afa-po amin-gny fisianao aho. ⁵ Lafa baka namonjy an'i Bahorima Davida mpanjaka, nisy johary raiky bakamin-gny fokon'i Saoly niboaky bakao, Simey gn'agnarany, anak'i Gera. La nisiziky ie ro mbo nanao fivolagna raty koa. ⁶ Tinorany vato Davida voho olo manam-pahefa rey, nefa egny iaby amin'io maramilan'i mpanjaka rey. ⁷ La nanao vola raty avao Simey, zao gny nataony mandehana agny nareo, olo raty rety, miboaha tana toy iha, mpamono olo ty, mpamoriky iha, mpagnosavy. ⁸ Navalin'i Yaveh anareo any famonoanareo longon'i Saoly igny, tamin-gny toera nanjakanareo agny. Namean'i Yaveh an'i Absaloma am-pelatagnany gny fanjaka. Arava gny momba anao fa olo raty iha, mpamono olo. ⁹ Ka hoy Abisay anakilahin'i Zeroia tamin-gny mpanjaka hoe: " Ino agnozognan-gny amboa maty roa an'ny mpanjaka tompoko tia io? Miala hanampahako lohany io". ¹⁰ La nivola mpanjaka igny hoe: " Mpi-ino moa tsika io, anakilahin'i Zeroio tia? Ozogniny aho fotony vinolan'i Yaveh ie hoe: " Ozogny Davida.' Ka ia moa olo afaky hivola gnazy io hoe: " Nagnino iha magnozo mpanjaka io? " ¹¹ Zao amizay gny nataon'i Davida tamin'i Abisay voho mpanompo gnazy rey hoe: " Ingo anakilahiko naterako io, ta-hamono gnahy, vomaiky moa Benjamina magniry gny haharava gnahy? Engao nareo avao io hagnozo gnahy fa zay koa gny nagnirahan'i Yaveh gnazy. ¹² Evany hanenty gny fijalea nahazo gnahy toy vasa Yaveh sady hamaly soa gnahy amin-gny ozo ataony gnahy toy ie androany. ¹³ La nandeha nagnaraky lala igny Davida voho olony rey, fa Simey koa nagnaraky an-drozy, nimbagnabombegny avao ie, la nagnozo ie mbegny igny ro nanondraky lemboky sady nitoraky vato an-drozy. ¹⁴ Vozaky mbakany mpanjaka igny noho olo nisondry aminy rey, farany nijano lafa haly gn'andro. ¹⁵ Avy an'i Jerosalema ao amizay koa Absaloma voho olon' Israely nisondry aminy rey voho Ahitofela. ¹⁶ Lafa niavy tamin'i Absaloma eo amizay Hosay Arkita, naman'i Davida igny, zao gny nataony hoe: " Ho lava velo lahy gny mpanjaka! Ho lava velo lahy gny mpanjaka ¹⁷ Ka hoy Absaloma tagnaminy: " Zao va gny fahatokia atoronao amin-gny namanao? Nagnino iha tsy nisondry aminy io? " ¹⁸ Ka hoy Hosay tagnamin'i Absaloma hoe: " Aha! olo raiky nifilin'i Yaveh voho vahoaky toy miarak'amin'olon' Israely reo iaby ro johary arahiko lia sady hipetraky aminy eo aho. ¹⁹ Ia koa gn'olo tokony ho tompoko? Tsy tokony hanompo eo amin-gny fagnatrehan-gny anakilahiny va aho? Manahaky gny nanompoako teo amin-gny fagnatrehan-gny babanao ,la hanompo eo amin-gny fagnatrehanao zaho".