¹ Kadi betu tuzeyi nde nzo yibetu yiyi yingotu yituna , yawu yi nitu yibetu yi kinza. buyimeni fua Nzambi wukutulundilanga nzo mu zulu yisitukala. nzo yoyo yikatunga yani kibeni, yawu kayitungua kubantu ku. nzo yoyo yina ntangu zakulu. ² Bungangi mu nitu yiyi betu tukalanga ku nsi mpasi kondu ku kiesi. betu tukalanga mudiambu di tuna nsatu zingolu mubaka nitu betu yina yi kizulu yisituvuata ga zulu yiyi. ³ Tuna yo vuata mpasi nde betu katukadi kondua nitu. ⁴ butukidi moyu mu nzo yiyi yi ngotu yi nza tuta vumuka mu nsi yi mfuetokosu zingolu. kadina ku nde betu tuna nsatu yi kuvula nitu betu yi kinza, kansi betu tuzoledi vuikua yi kizulu, mpasi nde moyu kawuna ye nsuka ku wumina nitu yoyo yifuanga. ⁵ Yi Nzambi yani kibeni wutukubikila nsobolu yoyo, ye yani wutugana Mpevi yani bonsu diambu disiamisanga biakulu bikatulundila. ⁶ Idina betu tuna kibakala ntangu zakulu. betu tuzeyi nde butukidi mu nitu yiyi, tuna ntatuki ye Mfumu. ⁷ Kadi mu zingu kiki betu tudiatilanga mu minu ye katumonanga mu mesu ye mesu ku. ⁸ Betu tuna ye kibakala kimbidi ye tulutidi zola mu katuka mu nitu yiyi ye kuekala gena Mfumu. ⁹ Idina betu tuzolanga ganga mazolanga Mfumu kansu kutuna, kani go tuna mu nitu yiyi ata tukatukidi yawu. ¹⁰ Kadi betu bakulu tufeti monika bonsu butuna gantadisi yi Klisto mu fundusua ku yani. kansu muntu sikatambula mamayani, bonsu buna mambu mayani, mamboti ata mambi makaganga bukakala mu nitu yiyi yi kintotu. ¹¹ Betu tuzeyi vumi ki Nzambi yi nki, idina tutondanga mu sa nde bantu bakuikila. Nzambi wutomeni kutuzaya ye nsidi minu nde benu mpi mu ntima mibenu lukutuzeyi. ¹² Betu ka tuzoledi diaka kukisonga ku benu ku go tuna bantu bamfunu. kansi betu tuzoledi kulugana mpuasika yimboti mukala kiesi mudiambu dibetu, mpasi go lulenda gana zimvutu ku bawu bakukiyananga mu mambu mamonikanga ku mbasi kansi ka mudiambu di mena mu ntima ku. ¹³ Kadi go yi kedika go katuna basungama ku buna betu tuna buawu mudiambu di Nzambi. kansi go tuna ye ngindu zisungama buna yi mudiambu dibenu tunina buawu. ¹⁴ Kadi zola ku klisto kukutuyalanga; betu tutomeni zaya go muntu wumosi wufua mudiambu di bantu bakulu, dina dita songa go bakulu, bena ntuadi mu lufua luyani. ¹⁵ Yani wufua mudiambu di bakulu mpasi go bawu bena moyu kabazingi diaka mudiambu di bawu mosi kansi mudiambu di yuna wufua ye wufuluka mudiambu dibawu. ¹⁶ Idina tuka bungangi betu ka tutalanga diaka bantu mu kimuntu kaka ku. go mpi nkutu mu ntangu yiluta betu tubaka Yesu bonsu muntu kaka kansi bungangi ka tukumuenanga diaka bonsu buna ku. ¹⁷ Muntu bu kabundeni ye Klisto yani kumini muntu wumpa. muntu wunkulu wufididi ye wumpa wugingane. ¹⁸ Mana makulu matukanga ku Nzambi wutuwisisa ye yani mu Yesu Klisto. ye Nzambi wutugana kisalu mu wisisa bantu bankaka ye yani mosi Nzambi. ¹⁹ Kadi mu Klisto, Nzambi wusala mu kutika bantu bakulu ye yani kondua kutala mambi mabawu. ye yani wutugana kisalu musamuna nsamu wu luwawanu luna. ²⁰ Buna betu yi zintumua zi Klisto, tugoganga bonsu go yi Nzambi yani mosi wukulubokilanga mu betu mu nkumbu yi Yesu, betu tukulubombidilanga: bika luwawana ye Nzambi. ²¹ klisto kakala ye masumu ku kansi Nzambi wuntudila masumu mabetu mpasi go mu yani betu tukala mu kintuadi kimboti ye Nzambi.