¹ Ye ba mpangi, monu kizoledi ku lugoyisila ku bonsu bantu ba ki mpefi, kansi bonsu bantu ba kinsuni, bonsu bana ba butukidi bubu mu Klistu. ² Monu ya ludikidi mu midiki ye ka mu mbisi ku, kadi benu kalufuenieti ku. ³ Kadi benu lukini kaka mu kinsuni, kadi kuna kuena kimpaka ye mpaka ga kati kibenu, keti kalu tazingila mu kinsuni ku ye diata mu nkala yi bantu? ⁴ Go muntu tedi :"Monu ngiena muntu Polu" ye wu nkaka tedi :"Monu ngiena muntu Apolo," keti kaluta zingila mu kinsuni ku benu? ⁵ Nani kena Apolo? Ye Polu nani ? Bisadi bia lusonga mu ku lekila minu, ku bawu Mfumu kagana bisalu. ⁶ Monu ya kuna, Apolo watula masa, kansi Nzambi wu menisa. ⁷ Buna, kayuna kunini ku kani yuna sidi masa, wuna mfunu. ⁸ Buna yuna takuna ye yuna ta tula masa bakulu ku mosi kuani, ye osi mosi si kabaka mfutu ani bonsu buenina kisalu kiani ⁹ . Kadi betu tuena bisadi bi Nzambi. Benu luena sodi di Nzambi, ntungulu Nzambi. ¹⁰ Bonsu Mpefi Nzambi yiyi baka bonsu ntungi nduenga, monu ya tula ngiantukulu ye wa nkaka wu tunga. Kansi bonsu muntu kafueti keba mu tala bueyi ka ta tungila. ¹¹ Kadi ga nkatu muntu fueti tunga diaka ngiantukulu, go kayina bakisila ku, yi yena Yesu Klistu. ¹² Bubu yonsu si wutunga ga ntandu ngiantukulu mu wolu, mu palata, mu matadi ma ntalu, mu bititi kani mu nianga, ¹³ kisalu kiani si kimonika, kadi ntemu wu kilumbu si wumonikisa. Kadi yani si kasongua mu tiya. Tiya tua mosi si tusonga kisalu kisadidi konsu muntu. ¹⁴ Go salu kisadidi muntu mu tunga kiena, yani si kabaka nsendu ani. ¹⁵ Kansi go kisalu ki muntu kiyokolu, yani si kabaka mfuilu, kansi yani mosi si kavuluana, bonsu muntu tinini ku tiya. ¹⁶ Keti benu kaluzeyiku nde benu luena kinlongu ki Nzambi ye Mpefi Nzambi yi vondanga mu benu ? ¹⁷ Go muntu fuasidi kinlongu ki Nzambi, Nzambi si ka mfuasa. Kadi kinlongu ki Nzambi kiena kia nlongu, ye benu mpi luena ba nlongu. ¹⁸ Muntu ka kiwunaku. Go yu mosi ga kati kibenu weti yindula nde yani wena ye nduenga mu ntangu yiyi, yani si kakituka nkua buzengi mpasi kakala nkua nduenga. ¹⁹ Kadi nduenga za nza yi buzengi kua Nzambi. Kadi busonama :" Yani wu kitulanga ba nduenga mu buzoba buawu." ²⁰ Buna diaka :" Mfumu zeyi nde mabansa ma ba nkua nduenga yi buzoba." ²¹ Yidina, mfunu nkatu mu kukivuna! Kadi bima biakulu biena bi benu, ²² kani kikala Polu, kani Apolo, kani Kefa, kani nza, kani luzingu,kani lufua, kani bia bi ntangu yiyi, kani bia bi ntangu yi kuisa. Bima biakulu bi benu, ²³ ye benu luwilu kua Klistu ye Klistu wilu kua Nzambi.