¹ Kã Jezi finï dji koze tut sa bagaj-iela, li dji pu so djisip-iela. ² Zot save ki dji esi ke un dê ju a lafet Pak, ie ke hãde Pitxit dji Om-la pu ie klue'l lasu lakhue. ³ Xef dji sasedotxi-iela i lidehãs dji judeu-iela ie hasãble, la kaz dji Caifás, ghã sasedotxi-la, ⁴ Ie kose ãfë dji ize, un mãto pu ie phui Jezi, i pu ie txue'l. ⁵ Ie te ka dji: No pa ke fe sa dehãtxi lafet-la, pase veie pov-la hete kole. ⁶ Jezi te la pov dji Betânia, asi obo un tab la kaz dji Simõ, om ki gãië bobo-la. ⁷ Ëbe un fam hive phox dji Jezi ke un buet plë ke un losiõ ki boku xe, li devide losiõ-la la tet dji Jezi. ⁸ Kã djisip-iela ue sa ie hete kole i ie dji: pukisa u ka gaspie! ⁹ Pase sa losiõ-la u te puve vãde boku xe, i lajã-la u te puve bai pu mun ki pov-iela. ¹⁰ Më kã Jezi save dji sa, li dji pu djisip-iela: pukisa zot hete kole ke sa fam-la? Li fe pu mo un bagaj boku bõ. ¹¹ Pase mun pov-iela tuju ke hete ke zot, më mo nõ. ¹² Më li mem, kã li devide losiõ-la lasu mo ko, li fe sa pu phuepahe mo ko pu ie ãtehe mo. ¹³ Ã lavehite mo ka dji pu zot: lada nëpot kote dji tã-la kote Pahol-la ke ãnüsie, ie ke hakõte sa ki li fe, i ie ke xõje dji fam-la. ¹⁴ Ëbe, um dji duz-iela ki ie te k'aple Judas Iscariotes, ale kose ke xef-iela dji sasedotxi-iela. ¹⁵ Li dji: kõbie zot ke peie mo, pu mo pote Jezi pu zot? I ie peie thãt ãghënë dji prata. ¹⁶ I djila pu djivã Judas te ka sase un opohtunite pu te hãde Jezi pu ie. ¹⁷ Lãdã phõmië ju dji Lafet dji djipë sã Fehmëto, djisip-iela hive phox dji Jezi i ie dumãde: Kõte u le no phuepahe mãje dji Lafet Pak-la pu u? ¹⁸ Li hepon: Zot ale juk la pei-la, sase un tel om i zot dji kõsa: "Met voie dji kõsa: Mo lo deha hive. Mo djisip-iela i mo ke ale fêtê lafet dji Pak-la la u kaz". ¹⁹ Djisip-iela fe kumã Jezi te dji pu ie fe i ie phuepahe mãje dji Lafet Pak-la. ²⁰ Kã, hive nãnuit, Jezi i so djisip-iela asi obo tab-la pu mãje. ²¹ Ëkãt ie te ka mãje Jezi dji: Ã lavehite mo ka dji pu zot: un dji zot ke kuiënë mo. ²² Ie hete boku this i, un pa un kumase dumãde: U ka majinë ki a mo Sëie? ²³ Jezi hepon: Mun ki ke kuiënë mo, a sa ki ka mãje lãdã mem asiet ke mo. ²⁴ Pase Pitxit dji Om-la ke muhi dji mãië kumã ka dji Pahol Së-la; më ki ghã aflisiõ pu sa ki ka kuiënë Pitxit dji Om-la! te plis bõ pu li pa te jë fet! ²⁵ Ëbe Judas, sa ki kuiënë li, dumãde: Met, u khe ki a mo? Jezi hepon: A u ka dji sa. ²⁶ Ëkãt ie te ka mãje, Jezi phã djipë-la li humiasi Bõdje. Aphue li pataje djipë-la li bai pu so djisip-iela, li dji: phã i zot mãje; sa la a mo ko. ²⁷ Aphue, li phã djivë-la li humiasi Bõdje. Aphue li bai djivë-la pu so djisip-iela, li dji: bue zot tut ²⁸ pase sa a mo djisã, a djisã dji kõtha, ki ka devide pu boku, pu padõnë tut pexe. ²⁹ Mo ka dji pu zot ki zot pa jë ke bue ãko dji sa djivë-la, juk ju kã mo ke bue ke zot un nov djivë, laba la Lasosiete dji Lahosiel. ³⁰ Ëbe ie xãte,un xãte dji adohasiõ, aphue ie ale pu mõtãi dji Oliveiras. ³¹ I Jezi dji pu so djisip-iela :Sa nuit-la zot tut ke mahõ i zot ke ãbãdonë mo, pase Pahol Së-la ka dji: "ie ke txue Pasteh-la, i mutõ-iela ke hete kate". ³² Më, aphue ki mo hesusite, mo ke ale djivã dji zot pu Galileia. ³³ Ëbe Pie dji pu Jezi: Mo pa jë ke ãbãdonë u Sëie, mem ki ie tut ãbãdonë u. ³⁴ Më Jezi dji: Ã lavehite mo ka dji pu u: Lãdã sa mem nuit-la, ãvã kok xãte, u ke kuiënë thoa fue. ³⁵ Pie hepon: Mo pa jë ke kuiënë u, mem mo gãië pu muhi ke u, mo pa jë ke kuiënë u. I tut uot djisip-iela dji mem bagaj. ³⁶ Jezi ale ke so djisip-iela pu un kote ki ie ka aple Getsêmani i li dji pu ie: Zot asi esi, ëkãt mo ka ale laba phuie. ³⁷ Ëbe Jezi ale, ale ke li Pie, i dê pitxit dji zebedeu-iela. I djila li kumase hete this i sãtxi u ghã aflisiõ ³⁸ Li dji pu ie: Aflisiõ ki mo ka sãtxi thop ghã, ki li kapab dji txue mo. zot hete esi, veie ke mo. ³⁹ Li ale un tximoso plis djivã, li ãjunü, li koxte so vijaz ate i li phuie: Mo Papa, si posib tihe sa sufãs dji mo, nõ pu fe sa ki mo le, më ui pu fe kumã u le. ⁴⁰ Aphue li tonë li ue thoa djisip-iela ka dhõmi. Ëbe li dji pu Pie: Ëbe, zot pa puve hete un le dji tã pu veie ke mo? ⁴¹ Zot veie i phuie,pu zot pa tõbe lãdã tëtasiõ. vuemã, lesphui-la phuepahe, më laxe-la feb. ⁴² Pu dezem fue Jezi ale phui, li dji: Mo Papa, sa djivë dji sufãs-la pa puve sotxi dji mo, sã ki mo bue'l, ëbe fe u volõte. ⁴³ Li tonë ãko li ue so djisip-iela ka dhõmi, ie pa te ka hesi hete ke ie uei luvui, pase ie te thop le dhõmi. ⁴⁴ Jezi lese ie, li ale phuie thoazem fue, li dji mem pahol-iela. ⁴⁵ Ëbe li tonë kote so djisip-iela te fika li dumãde: zot ka dhõmi i zot ka pose tuju? zot Gade! hive lo-la i Pitxit dji Om-la ie ka hãde la lãmë dji mun mixã-iela. ⁴⁶ Zot leve, i ãnu ale. zot Gade! sa ki ka kuiënë mo-la deha hive. ⁴⁷ Jezi te ka kose tuju, kã Judas hive, un dji duz djisip-iela. Te ka vini ke li um ban mun ãmë ke zam, ke batõ, ki xef-iela dji sasedotxi-iela i lidehãs dji judeu-iela voie. ⁴⁸ Judas te ķõbinë ke ie un sin. Li te dji:"zot phui sa ki mo ke bô-la, pase a li". ⁴⁹ Judas ale phox dji Jezi, i li dji: Met, ki kõtãtmã hete ke u Sëie! i li bô Jezi. ⁵⁰ Jezi hepon: kamahad, sa ki u ke fe, fe ato mem. Ëbe ie hive, ie phui Jezi ie mahe'l. ⁵¹ Më, un dji sa ki te laba ke Jezi tihe so espad, li atake un siavito dji Ghã Sasedotxi-la li kupe un zohe dji li. ⁵² Ëbe Jezi dji: sehe u espad, pase mun ki ka ise espad ke muhi pu un espad. ⁵³ u pa save, si mo te dumãde pu mo Papa ide mo, li te ke voie ato mem, duz legiõ dji zãj? ⁵⁴ Më dji sa mãië, kumã te puve kõphui sa ki Pahol Së-la te dji sa ki te buëzë fet? ⁵⁵ Aphue Jezi dji pu sa mun-iela: zot ka vini ke espad i batõ pu phui mo kumã un vole? tu le ju mo te ka asi, no te ka mõthe la kaz dji mo Papa, i zot pa phui mo. ⁵⁶ Më tut sa ka hive pu kõphui sa ki phofet-iela ekhi lãdã Pahol Së-la. Ëbe tut djisip-iela ãbãdonë Jezi, i ie mahõ. ⁵⁷ Om-iela ki phui Jezi, ie pote'l juk la kaz dji Ghã Sasedotxi Caifás, kote te hasãble un dê met dji lalua-iela i um dê lidehãs dji judeu-iela. ⁵⁸ Pie suiv Li dji luë, juk obo kaz dji Ghã Sasedotxi, li ãthe li asi ãsam ke soda-iela pu gade kumã li te ke fini. ⁵⁹ Xef-iela dji sasedotxi-iela i tut Kosei ki gho,te ka sase un akusasiõ ãfë dji kõdãnë'l pu lamo. ⁶⁰ Më ie pa thuve ãië kõt li, mem Kõsa boku mun leve pu dji mãto a hespek dji li. Dê om leve, ⁶¹ ie dji: Sa om-la afihmë: "Mo puve dethi gho Kaz dji Bõdje i level ãko lãdã thoa ju". ⁶² Ghã Sasedotxi-la leve li dumãde dji Jezi: U pa ke defie u ko dji sa akuzasiõ-la? ⁶³ Më Jezi pa hepon ãië: Ëbe Ghã Sasedotxi-la dumãde'l ãko: Lasu nõ dji Bõdje vivã, no ka bai zod pu u dji pu no: U sa Messias, Pitxit ki Bõdje? ⁶⁴ Jezi hepon: akimun ki ka dji sa a u. Më, mo ka afihmë djila pu djivã zot ke ue Pitxit dji Om-la asi bo adhet dji Bõdje ki gãië povua i ka vini lasu nuaj-iela. ⁶⁵ Ëbe, Ghã Sasedotxi-la fãde so phop lëj-iela i li dji: Li kose mal! no pa buëzë ãko dji tëmuë! zot tãde ato mem ki li kose mal kõt Bõdje. ⁶⁶ akisa zot ka thuve? Ie hepon: Li gãië ghã to, li djivet muhi! ⁶⁷ Djila ie khaxe la vijaz dji Jezi, ie fut li ke pohad. I sa-iela ki te ka fut li ⁶⁸ te ka dji: Messias pale pu no akimun ki fut u! ⁶⁹ Pie te asi laba deho Kaz-la, kã un fam siavito, phoxe'l, li dji: U osi te ke Jezi dji Galileia. ⁷⁰ Më li kuiënë djivã tut mun, li dji: "Mo pa save a dji kisa u ka koze". ⁷¹ Aphue li ale lãdã djihesiõ dji kote ie ka ãthe dji kaz-la. uot fam siavito ue Pie li dji pu mun ki te laba: Li osi te ke Jezi dji Nazahe. ⁷² Pie kuiënë ãko, li hepon: Jãmë ki mo pa konet sa om-la! ⁷³ Aphue dji sa um tximoso, sa ki te laba-iela hive phox dji Pie ie dji: U, mãië dji kose, ka mõthe vuemã, ki u sa un dji ie. ⁷⁴ Ëbe Pie dji: Jãmë, mo pa konet sa om-la! ki Bõdje madjixõnë mo si mo pa ka kose lavehite! Lãdã mem lokasiõ kok-la xãte. ⁷⁵ I Pie xõje ki Jezi te dji: "Ãvã ki kok xãte, u ke kuiënë mo thoa fue u ke dji ki u pa konet mo. Ëbe, Pie, sotxi dji laba li khie boku.