¹ Lasosiete dji Lahosiel a kumã djis jonfi viej ki phã, ie lalãp i ie sotxi pu ie kõthe ke om ki ke maie-la. ² sëk dji ie de sã hezõ, i sëk te gãië hezõ. ³ Jonfi sã hezõ-iela phã ie lalãp-iela, më ie phã xis pu ie. ⁴ Sa ki gãië hezõ-iela phã xis lãdã ue buet-iela pu ie lalãp. ⁵ Kumã om ki ke maie-la tade, djis jonfi-iela kumase sigale i ie dhõmi. ⁶ Më minuit, ie tãde un hele: "om ki ke maie-la ka hive! vini kõthe ke li". ⁷ Ëbe tut sa Jonfi viej-iela leve pu phuepahe ie lalãp. ⁸ I sa ki sã hezõ-iela dji pu sa ki gãië hezõ-iela: "bai pu no un moso dji zot xis, pase no lalãp-iela ka muhi". ⁹ Më sa ki te gãië hezõ-iela hepon: "nõ, veie li mãke pu no i pu zot osi. si zot le xis, zot ale axte"! ¹⁰ Ëkãt ie sotxi pu ie axte, om ki ke maie-la hive. Sa sëk Jonfi ki te ke ie lalãp-iela phuepahe ie ãthe ke li pu lafet dji lamaiaz-la, i li tatxe lapot-la. ¹¹ Aphue uot sã hezõ-iela hive ie kumase hete."Sëie, sëie, lese no ãthe"! ¹² Më li hepon: "Ã lavehite mo ka dji mo pa konet zot"! ¹³ Jezi dji: zot hete ka veie, pase zot pa save ju-la i lo-la. ¹⁴ Jezi kõtxinë dji: Lasosiete dji Lahosiel a kumã un om ki te ke voiaje. Li aple so siavito-iela li mete ie pu ëtxupe dji so djibië-iela ¹⁵ Li bai lajã pu ie, jis kumã kapasite dji xak un: pu phõmië-la li bai sëksã ãghënë dji lo; pu dezem-la li bai dêsã ãghënë, i pu thoazem li bai sã. Aphue li ale voiaje. ¹⁶ Lãdã mem lokasiõ,sa ki husuve sëksã-la li ale negosie lajã-la, li gãië plis uot sëksã. ¹⁷ Dji mem mãië sa ki husuve desã-la ãghënë, li gãië plis uot desã. ¹⁸ Më sa ki husuve sã ãghënë-la li sotxi, li fe un thu lãdã late-la i li sehe lajã dji pathõ-la. ¹⁹ Aphue dji boku tã, pathõ-la tonë, pu hãde kõt ke ie. ²⁰ Siavito-la ki te husuve sëksã ãghënë hive li bai plis sëksã, li dji: "pathõ u bai mo sëksã ãghënë. Gade! esi plis sëksã ki mo hesi gãië". ²¹ Më so pathõ dji pu li: "boku bië, bõ siavito fiam! lasu tximoso u hete fiam, lasu boku no ke mete u; vini i pahtxisipe dji kõtãtmã dji u pathõ. ²² Ëbe siavito-la ki te husuve desã ãghënë-la hive li dji: "pathõ u bai mo desã ãghënë.Gade! esi plis desã ki mo hesi gãië". ²³ So pathõ dji pu li: boku bië, siavito bõ i fiam! lasu tximoso u hete fiam, lasu boku mo ke mete u. ²⁴ Më sa siavito ki te husuve sã ãghënë-la hive li dji: " mo te save pathõ ki u te sa un om du, ki te ka hamase kote u pa plãte, i u ka hasãble kote u pa sõmë. ²⁵ Mo hete pe a pu sa mo sehe u lajã lãdã late-la. Gade! esi u lajã." ²⁶ Ëbe so pathõ hepon: Siavito maleve i fëiã u save ki mo ka hamase kote mo pa plãte, i mo ka hasãble kote mo pa sõmë. ²⁷ Pu sa u te djivet deposite mo lajã lãdã bãk, i, kã mo te tonë, mo te husuve li plis boku. ²⁸ Aphue pathõ-la gade kote uot siavito-iela li dji: zot tihe dji li lajã-la i bai pu sa ki gãië mil ãghënë. ²⁹ Pase sa ki gãië boku ie ke husuve plis i kõsa ie ke gãië plis boku ãko. Më sa ki pa gãië, juk tximoso ki ie gãië ie ke txihe dji ie. ³⁰ "zot jite siavito-la, deho lãdã suku .Laba li ke khie i li ke mode so dã dji dulo. ³¹ Jezi dji ãko: Kã Pitxit dji Om-la ke vini kumã Vue, ke tut so zãj-iela, i li ke asi lãdã so obiho lãdã Glória dji lahosiel. ³² Tut nasiõ-iela ke hasãble djivã li, i li ke sepahe mutõ-iela dji kabhuit-iela. ³³ Li ke mete ki bõ-iela la so adhet i uot-iela la so agox. ³⁴ Ëbe Vue-la ke dji pu sa ki la so adhet-iela: "vini, zot ki mo Papa bëni! Vini i zot husuve Lasosiete ki mo Papa phuepahe pu zot djipi kumasmã dji tã-la. ³⁵ Pase mo te fë, i zot bai mo mãje; mo te suef zot bai djilo. Mo te sa un ëthaje, i zot husuve mo la zot Kaz. ³⁶ Mo te sã lëj, i zot bai mo lëj; mo te malad ,i zot ëtxupe dji mo. Mo te la phuiziõ i zot ale vizite mo. ³⁷ Ëbe sa mun ki bõ-iela ke dumãde: " Sëie, ki tã no ue u fë i no bai u mãje i suef i no bai u djilo.? ³⁸ Ki tã no ue u kumã un ëthãje i no husuve u la no kaz, i sã lëj i no bai pu u? ³⁹ Ki tã ki no ue u malad, o u phui i no ale vizite u?" ⁴⁰ Vue-la ke hepon: Ã lavehite mo ka dji pu zot: tut sa ki zot fe pu xak un dji mo fue-iela, a pu mo zot fe. ⁴¹ Aphue li ke dji pu sa ki la so agox: "zot sotxi dji obo mo, zot ki ãba maldjisiõ dji Bõdje! zot ale pu djife ëtehnel, ki phuepahe pu djab-la i so zãj-iela! ⁴² Pase mo te fë, i zot pa bai mo mãje, mo te suef, zot pa bai mo djilo. ⁴³ Mo te sa un ëthãje, i zot pa husuve mo la zot Kaz,; mo te sã lëj, o malad, o phui zot pa ide mo"? ⁴⁴ Ëbe ie ke dumãde: Sëie, ki tã no ue u fë, o suef i kumã un ëthãje, i sã lëj, o malad o la phuisiõ i no pa ide u? ⁴⁵ Vue-la ke hepon: "Ã lavehite mo ka dji pu zot: tut sa ki zot lese dji fe pu xak un dji mo fue-iela; A pu mo zot lese dji fe. ⁴⁶ I tut sa-iela ke ale pu sufãs ëtehnel, më sa ki bõ-iela ke ale pu lavi ëtehnel.