¹ 1. U, mem, mo pitxit, hete fo i ghemesi ki la hu jezi khi. ² I ha ki u tãdẽ dji mũ, djivã dji buku temwẽ, khe la mum ki fie-iela i usi ki pwepahe pu mõthe wat. ³ 3 Sufwi ke mo, ake un bõ soda dji jezi khi. ⁴ Nẽ un soda, amem tã i ka sevi i ka phwemét ke thavai dji ha lavi-la, ki i le fe ho xéf kõtã. ⁵ Dji mem mãiẽ-la, si un mum kuhi, i pa ke gãiẽ ho kado si i pa kuhi dezem ho lalwa. ⁶ I mum ki ka thavai la batxi a li phomẽ ka txihe phomẽ fwi dji ha ki i plãte. ⁷ U kõphan akiha ga dji, i Bõdje ke bai to konétmã dji tut wat bagaj-iela. ⁸ Hu xõge dji jezi khi, desãdã dji Davi, ki leve mum muhi-iela, dezem ho pahól dji Bõdje, ⁹ apuha mo sufwi i mo phwi ãke un khim. Mẽ pahól dji Bõdje pa ka phwi. ¹⁰ Apuha mo ka sipote tut ha bagaj-iela pu ha ki sa pitxit dji Bõdje, fe sa pu ie puve gaie ie salvasiõ ki la hu jezi khi. ¹¹ Gãiẽ kõfiãs la ha pahól-la: ''Si no muhi ke li, no ke viv usi ke li. ¹² Si no ãtãt ke paxãs no ke ale ke li. Si no pole li mem usi pa ke asete no. ¹³ Mem si no pa fie, li mem ka kõtxinẽ fie, i pa puve xãge ho phóp ko.'' ¹⁴ Huxõje dji ha bagaj-iela. Ki djivã dji Bõdje usi hót pa blwiga palakós dji pahól, blwiga i pa bõ i ka pote pobleb pu ha ki ka tãde-iela. ¹⁵ Sase puẽzãte u ko pu Bõdje ãke un wom ki konet pu i pa pase võte, ki konét biẽ pahól dji lavehite-la. ¹⁶ Evite koze ki pabõ, ki ka poteu pu pa gãiẽ lapen. ¹⁷ Ha kalite koze-iela ha ki ie ka pale i ka kate ãke un maladji. Ãthe ie mem i te gãiẽ Himeneu i Fileto, ¹⁸ wom ki te ka devihe dji lavehite-la. I ie dji ki hesuhesiõ-la deha fét i ie hete thakase de thoa mum pu ie sutxi dji ie fie. ¹⁹ Tut tã, piẽ tõ dji Bodje ka hete gãiẽ ha pahól-la: ''Bõdje konét ha ki a hopa-iela'', i ,''tut ha ki ka numẽ no dji Bõdje ie djivét hale ie ko dji tut bagaj ki pa bõ''. ²⁰ Lãdã un kaz ki hix apa selmã pót dji ló i dji phat, mẽ usi dji bua i dji late; i gãiẽ ha ki bõ pu ize, i gãie ha ki pa bõ pu ize. ²¹ Akõhã, ẽbe, si un mum netuaie ho ko mem dji ha to-iela i ka sa un pót expecial, pase i dedjike ho ko pu ho xev, i pwepahe pu tut thavai ki bõ. ²² Mãhõ dji plezi dji jõnés-la. I sase un lavi jis, fie, kõtalmã i pax ke ha ki ka numẽ Bõdje dji un txó ki phop. ²³ Mẽ hete luẽ dji bagaj ki pa bõ i ki pa gãiẽ valé. U save ki ie ka bai bwiga. ²⁴ Un sevitó dji Bõdje pa puve viv bwiga. I djivét sa un mum ki bõ ke tut, pwepahe pu mõthe, i gãiẽ paxãs. ²⁵ I djivét hãje ke ãtãsiõ ha ki ka vihe kõt li. Pitét Bõdje puve bai ie un opohtunite dji hepãtxi pu ie gãiẽ konetmã dji lavehite. ²⁶ Ie puve tonẽ kõplet ãko i ie ke mahõ dji thap dji djab-la,ha ki i te txẽbe pu i te fe ha ki i te le fe ke ie.