¹ Haho kakure o Mufarisi we zina lya Nekudemasi, mukuru wa Majuda. ² Ozyu mukwame nakezya kwa Jesu a masiku mi aku amba, ''Rabbi, tuzyi ye oli muzyiizi azwa kwa Nyambe, kakuli kwaazya ozyo atenda ezi mbita ozyo akere ne Nyambe.'' ³ Jesu aku mutava, ''Hawa, hawa, mbita ye o zyumwi na pakiwa hape, kawoli kubona muvuso wa Nyambe.'' ⁴ Nekudemasi aku mutava, '' Mbuti o muntu awora ku pakiwa ati shali mukuru? Kawoli kuvoora mwibumo lya nyina noka pakiwa hape, hahena awora?'' ⁵ Jesu akutava, ''Hawa, hawa, mbita ye zyumwi na pakiwa ka menji no Muzya, kawoli kukavira mu muvuso wa Nyambe. ⁶ Kokutaye echo chi pakiwa kwi nyama nji nyama, kavulyaho chi pakiwa ku Muzya nowo muzya. ⁷ Washa komokwa kezo nda ambi kwako, 'Ye ovotere ku pakiwa hape.' ⁸ O ruho ruhungiwa oko rushaka; oshuwa o murumo waro, kono kozyi ko ruya noko ruzwa. Cware mbovulyaho kwina yenshe vulyo ozyo a pakiwa ku Muzya.'' ⁹ Nekudemasi akutava noku amba kwakwe, ''Mbuti ziwora kuva ezi zintu?'' ¹⁰ Jesu aku mutava no kuamba kwakwe, ''Nga oli muzyiizi wa Isiraere, kono koshuwi ezi zintu? ¹¹ Hawa, hawa, ndiku sumwina, tu amba ezo tuzyi, mi tutorka ezo nitwa vona. Kono hape ko tambuli o vupaki bwetu. ¹² Ati andi ku sumwina ze fasi mi ewe ko zumini, mbuti owora ku zumina ezintu ze wiru kuti ndizi ku sumwine? ¹³ Kwaazya ozyo nalizya kwiwiru mbita ozyo na suka ko - Mwana o muntu. ¹⁴ Shina vulyena Mushe na nanuna lukungwe mwi nkanda, mbovulyaho aswanera ku nanunwa Mwana o muntu, ¹⁵ okutiye bantu vonshe va zumina kwakwe vave no vuharo kavumani. ¹⁶ Kakuli Nyambe na shaka hawa e fasi, mi akuliha o mwana yenke ozyo ashakiwa, okutiye yenshe ozyo azyumina kwakwe nareke kufwa kono nawane vuharo kavumani. ¹⁷ Kavulyaho Nyambe kali na tuma Mwane mwifasi ye akezye a ature kono kutiye alihaze kakwe. ¹⁸ Yenshe vulyo azumina kwakwe kanyansiwa, kono yenshe ozyo kazumini kwakwe na aturwa kare keveka lyo kutiye kana zumini mwizina lya Mwane ya Nyambe. ¹⁹ Elyo ndevaka lyoku atura: O mumuni niwa kezya mwifasi, mi a vantu niva shaka a kansikwe kuhita o mumuni kakali ezitendantu zavo nzibbi. ²⁰ Yenshe ozyo atenda ezibbi a zimbite o mumuni, mi kakezyi ku mumuni, kakuli ovubbi bwakwe mbovu zyivahare. ²¹ Nanga kwakwina vulyaho, yenshe vulyo atenda za hawa akezya ku mumuni o kutiye ku vonahare ha nkanda ye ezitendantu zakwe niza tendiwa ka Nyambe.''