¹ Mazyuva otatwe a chilira, mwa Kana yakwa Galireya kakukere a masheshwa, mi kakukere ni nyina wa Jesu ko. ² Jesu na Vazyiizwa vakwe niva memerwa ko ku masheshwa. ³ Aho sheyamani e waine, nyina wa Jesu aku amba kwakwe, ''Vashi azya e waine.'' ⁴ Jesu aku amba kwakwe, ''Mukentu, chinji aho kezya kwangu? Ishini kuhura e nako yangu.'' ⁵ Nyina wakwe mpaho sha sumwina a veka, ''Zonshe ezo shake amite, mutende.'' ⁶ Cware kakukere e mpoto ze anja ni konke za menji ezo kazi sebeliswa ha mikiti yoku sanza, yonke kavika menji alikana e diram. ⁷ Jesu aku vata ye, ''Muzi vumbe e mpoto a menji.'' Cware voku zivumba mbita ku mamaninikizo. ⁸ Cware mpaho sha sumwina a bakana, ''Mu nembure mo mi mutware ku mukuru wa bahiki.'' Mi bokutenda vulyaho. ⁹ O mukuru wa bahiki na yereka a menji awo sheana zoki e waine, kono kali kazyi ye kokwi yazwi (kono avo kavazyi mbakana vashi kuteka a menji). Cware mpaho sha kuwa ozyo kashesha ¹⁰ noku musumwina, ''Yenshe muntu ahewa e waine e ndotu mi kuzwaho vahewa e waine i chipite shivana koliwa. Kono kamu zikite e waine e ndontu kureta hanu.'' ¹¹ Echi che chisupo echo natenda Jesu mwa Kana ya Galireya, mi e kanya yakwe momo naisunda, mi a bazyiizwa bakwe niba muzumina. ¹² Aho zimana ezi Jesu, ni banyina, bakwakwe, na bazyiizwa bakwe nivaya kwa Kapenauma mi koko niva kara mazyuva manini. ¹³ Cware shika ina hafwihi a paseka ya Majuda, Jesu nayenda kwa Jerusarema. ¹⁴ Sheka kawana a bawulisi be ñombe ne mberere ne nkwilimba mwi tempere, mi navo bachincha mashereni kava kere mo. ¹⁵ Cware akutenda enchupa ye mihara no kutanda mwi tempere, kuhindilira ne mberere ne ñombe. Aku xandaura o muwayawaya wa mashereni avo kavachincha noku wisa e ntafure zavo. ¹⁶ Kuva wulisi be nkwilimba aku amba ye, ''Muzwise ezi zintu munu. Mureke kutenda enjuwo iva Tata kuva musika.'' ¹⁷ A Bazyiizwa vakwe voku azyaara ye zintu ziñoretwa, ''Kushaka hawa enjuwo yako nakura ndiyaya.'' ¹⁸ Cware o Vayendesi va Majuda voku mutava no kutaye, ''Chisupo munji echo otu sunde, vulyena otenda ezi?'' ¹⁹ Jesu akutava, ''Kuyaya eyi tempere, mi mazyuva otatwe nandira izyimika.'' ²⁰ Cware vayendisi va Majuda voku amba, ''Eyi tempere niya zyakiwa mu myaka ya makumi one ne anja ni wonke, mi nora izyimika mu mazyuva o tatwe?'' ²¹ Kavulyaho, ka amba ze tempere yo muvili wakwe. ²² Aho avuka ku vafu, a bazyiizwa bakwe voku azyara ye shazi amba, mi voku zumina a mañoro nezo naamba Jesu. ²³ Aho kakere mwa Jerusarema mwi nako mikiti ye Paseka, vanavungi niva zumina mwi zina lyakwe aho vavona ezo nantenda. ²⁴ Ko Jesu kali nava zumina kakuli zavo zonshe kazizyi, ²⁵ kakuli kali kashaka ye o muntu amu torokere kazo muntu, kakuli kazyi ezo zina ku muntu.