¹ Tamin'ny voalôhany ny Teny, ary ny Teny tamin'Andriamanitra, ary ny Teny de Andriamanitra. ² Zégny de takô amin'Andriamanitra tamin'ny voalôhany. ³ Ny raha jiaby de avy Aminanjy aby, ary kô tsy noho Izy de tsisy na ino na ino. ⁴ Noho Izy no nisiam-piainagna, ary io fiainagna io no fahazavan'ny ôlogna jiaby. ⁵ Ny hazavagna de mamiratra agnatin'ny hizigna, ary ny hizigna tsy nandresy zégny. ⁶ Nisy lalahy raiky nirahin'Andriamanitra, Jaona no agnarany. ⁷ Tônga izy mbô ho vavôlombelogna hagnambara ny momban'ny fahazavagna, mbô hinoan'ny jiaby amin'ny alalany. ⁸ Tsy Jaona lay fahazavagna, fô tônga ndraika mbô hagnambara ny momba lay fahazavagna izy. ⁹ Ny fahazavagna marigna, zay magnamia hazavagna ny ôlo-jiaby, de tônga aketo amin'izô tontôlo zao. ¹⁰ Teto amin'izô tontôlo zao Izy, ary Izy nahariagna an'izô tontôlo zao, ary zao tontôlo zao tsy nahafantatra Ananjy. ¹¹ Tônga tagny amin'ny ôlony Izy, ary ny ôlony de tsy nandray Ananjy. ¹² Fô iré maro nandray Ananjy, zay nino ny agnarany, de namiàny fahefagna ho tônga zanak'Andriamanitra. ¹³ Iré de tsy nateraka tamin'ny rà, na ny sitrapon'ny nôfo, na ny sitrapon'ny ôlogna, fô ny an'Andriamanitra. ¹⁴ Ary ny Teny tônga nôfo ké nonigna tamintsika. Hitanay ny vôninahiny, vôninahitra kara lay raiky sy tôkagna zay tônga avy tamin'ny Baba, feno fahasoavagna sy fahamarinagna. ¹⁵ Jaona nagnambara ny momba Ananjy ké nihafatra mafy, magnano hoe: "Izy lay raika zay efa nivolagniko hoe: 'Izy zay tônga afarako de maventy be noho zaho, satrià talôhako Izy.'" ¹⁶ Fô avy amin'ny fahafenoany no nandraisantsika jiaby fahasoavagna hagnampy fahasoavagna. ¹⁷ Fô ny lalàgna de namiagna tamin'ny alalan'i Mosesy. Ny fahasoavagna sy fahamarignana de tônga tamin'ny alalan'i Jesosy Kristy. ¹⁸ Tsisy nahita an'Andriamanitra na oviagna na oviagna. Fô lay Andriamanitra raika sy tôkagna, izô aké an-tratran'ilay Baba, no nampahafantatra Ananjy. ¹⁹ Ary izô no fagnambaran'i Jaona kôfa nagnasa iré mpisorona sy Levita avy tagny Jerosalema hankeo aminanjy iré Jiosy mbô hagnontany ananjy hoe: "Zôvy mô anà?" ²⁰ Nitsotra izy, ké tsy nandà, fô namaly hoe: "Tsy Kristy zaho." ²¹ Ké nagnontany ananjy zaré hoe: "Ino ariky anà izégny? Elia vô anà?" Nivôlagna izy hoe: "Tsy izy zaho." Ahozy zaré ré hoe: ''Anà mô lay mpaminany?'' Namaly izy hoe: "Aha." ²² Avy také zaré ré nivôlagna taminanjy hoe: "Izôvy anà, mbô afahanay magnamià valin-teny amin'ire zay nagnasa anay? Ino no volagninà momban'ny tegnanà?" ²³ Ahozy izy hoe: "Zaho lay feo, magnantso mafy agny an'efitra hoe: 'Atôvy mahitsy ny lalan'ny Tompo,' araka ny voalazan'Isaia mpaminany." ²⁴ Ary nisy iraky sanany avy aminjaré fariseo nalefa, ²⁵ ary nagnontany ananjy zaré ké nivôlagna taminanjy hoe: "Nagnino ariky anà no magnano batisa kô tsy Kristy anà no sady tsy Elia no tsy lay mpaminagy?" ²⁶ Ary Jaona namaly anjaré ré, magnano hoe: "Magnano batisa amin'ny rano zaho. Fô aké agnivonaré de misy ôlogna araiky mijôro zay tsy fantanaré. ²⁷ Izy lay araiky zay tônga avy akô afarako, zay tsy tôkony ho zaho no hamaha ny tadi-kapany." ²⁸ Iré raha iré de natô tagny Betania tagny andafin'i Jordana, zay nagnanovan'i Jaona batisa. ²⁹ Amaraigna Jaona nahita an'i Jesosy nagnatogna ananjy ary nivôlagna hoe: "Zahà, indro ny zanak'ondrin'Andriamanitra zay magnala ny fahotan'izô tontôlo izô!" ³⁰ Itô lay araiky zay nivolagniko hoe: 'Lay araiky zay tônga avy afarako de maventy be noho zaho, satrià talôhako Izy.' ³¹ Ary zaho tsy nahafantatra Ananjy, fô mbô ho voavôlagna amin"Israely izy no nihaviàko hagnano batisa amin'ny rano.'' ³² Jaona nagnambara, magnano hoe: "Nahita ny Fagnahy nirôrogna avy agny an-dagnitra kara ny voromailala zaho, ary nipetraka také ambôniny izégny. ³³ Tsy mahafantatra Ananjy zaho, fô Izy zay nagnasa anahy hagnano batisa amin'ny rano nivôlagna taminahy hoe: "Aké ambonin'izay hitanà hirorôgnan'ny Fagnahy sy hitoerany aké aminanjy, izy lay araiky zay magnano batisa amin'ny Fanahy Masina.' ³⁴ Sady nahita zaho no nagnambara fô izy lay Zanak'Andriamanitra.'' ³⁵ Ny amaraigna, ndraiky, kôfa nijôro niaraka tamin'ny roy amin'iré mpianany Jaona, ³⁶ de nahita an'i Jesosy nandaiha zaré ré, ké ahozy Jaona hoe: "Zahà, lay Zanak'ondrin'Andriamanitra!" ³⁷ Naharegny ananjy nivôlagna izégny iré mpianany roy ké nagnaraka an'i Jesosy zaré ré. ³⁸ Avy také Jesosy nitodika ké nahita anjaré ré nagnaraka Ananjy ké nivôlagna anjaré ré hoe: ''Ino no ilainaré?'' Namaly iré hoe: ''Raby (zay midika hoe mpampianatra), eza Anà no mitoetra?" ³⁹ Namaly anjaré ré Izy hoe: "Magnatôgna ary zahà." Ké nagnatogna zaré ré ké nahita ny toeragna zay nipitrahany; nitoetra niaraka Taminanjy takô zaré ré tamin'io andro io, fô tôkony efa ho lera fahafôlo taminjagny. ⁴⁰ Araiky tamin'iré mpianatra roy naharegny an'i Jaona nivôlagna ary nagnaraka an'i Jesosy avy aké i Andrea, rahalahin'i Simona Petera. ⁴¹ Nitady an'i Simona rahalahiny alôha izy ké nivôlagna taminanjy hoe: "Hitanay ny Mesia" (zay adika hoe Kristy) ⁴² Nitondra ananjy tagny amin'i Jesosy izy, ary nizaha ananjy Jesosy ké nivôlagna hoe: "Anà de Simona zanak'i Jaona, Anà de antsovigna hoe Kefasy" (zay midika hoe: Petera). ⁴³ Ny amaraigny, kôfa te andeha ho agny Galilia Jesosy, de nahita an'i Filipo Izy ary nivôlagna taminanjy hoe: "Magnaraha Anahy." ⁴⁴ Filipo de avy agny betsahida, tanàgnan'i Andrea sy Petera. ⁴⁵ Nahita an'i Natanaela i Filipo ké nivôlagna taminanjy hoe: "Izy zay nosoratan'i Mosesy takô amin'ny lalàgna, sy iré mpaminany, hitanay Izy, de Jesosy zanak'i Josefa, avy agny Nazareta." ⁴⁶ Natanaela nivôlagna taminanjy hoe: "Mô hisy raha tsara avy akô Nazareta?" Filipo nivôlagna taminanjy hoe: "Magnatôgna ké zahà." ⁴⁷ Jesosy nahita an'i Natanaela nagnatogna ananjy ké nivôlagna iré mombamomba ananjy hoe: "Zahà, izégny no tegna israelita, zay tsisy fitaka aminanjy!" ⁴⁸ Natanaela nivôlagna Taminanjy hoe: "Karakôry nafantaranà anahy?" Jesosy namaly ké nivôlagna taminanjy hoe: "Talôhan'ny nagnatsôvan'i Filipo anà, kôfa tambanin'ny kakazo aviavy anà, de hitako." ⁴⁹ Natanaela namaly hoe: "Raby, Anà lay zanak'Andriamanitra! Anà no mpanjakan'Israely!" ⁵⁰ Jesosy namaly ké nivôlagna taminanjy hoe: "Satrià Zaho nivôlagna taminà hoe: 'Nahita anà také ambanin'ny kakazo aviavy Zaho,' no hinoanà? Hahita raha tsara mihoatra noho izégny anà." ⁵¹ Avy aké Izy nivôlagna hoe: "Volagniko aminaré, marigna, de marigna tokoà, fô hahita ny lagnitra hisôkatra anaré, ary iré anjelin'Andriamanitra hiakatra sy hirôrogna aké ambonin'ny zanak'ôlogna."