¹ Togaya no vuara mere varogocira vina na viliutaki vai kora na lewa qwaqwa, ba rogai kora, qo ba vakarautakhi ni vatikem no ina cakacaka vina coko, ² Mere kua ni tata cakha ca nia lia, me re kua ni viba, mere vakamalumalumtakhi nira, mere vatakea vuara nayolo ni vivaro korokotaki. ³ Nio keta re vataki ni keta te tamata lialia qa te duakara. Tesa qei vacalai qate vabobulataki tu ina gagadre ca gana kea vimatagouli marau. Te cola no muni ina vigati ca qana vuvu. Te tamata tumkila kwa qa te dau vicakati. ⁴ Ia ni sa vatakea mai na yalo vina qana yalo loloma ni Kalou na leda i vakia cola, ⁵ i tam tia kwa ni le da cakacaka dodonu te tara no, ia vai na vuku ga ni lea loloma, qa na kea vaka savasava taki qana. Vivakavoui ni Yalo Tabu, ⁶ ni sa sovarakinia na Kalou ina vuku i Jisu Karisito na leda i vakacola, ⁷ mete rewa ni vadonui kho ina lea loloma, qa te yaco mete tom keni tia vata na cola koite nuitaki nia no na cola tamvai yalayala. ⁸ Naitukutuku kwe ei du. Ia qi vinatia mo vakadudutakhi nia no no kwakwe, balatia nio kora kece, ere vabautia na Kalou i dodonu mere sema i gano ina vuku ni cakacaka vina. Na kwa kece kwe ei vina. Qa yaga vakalem vuara na tamata. ⁹ Ia mete kwa ni vaitavi se tokonitia na vi kwa ei lala e bete me wetai na tuva kawa na vibataki ni lawa. Na vi kwa kece kwe ei tawayaga qa lala e bete. ¹⁰ Me vacegui dei na tamata i varu vnia no na no yavavala, ia me laka vakarua sila re bua na i vakasala, ¹¹ Mete kilatia no nitia tamata cakaca na tamata sokhwe ina lea vukhi dei maou ina gaunisala du me laitavui ga vataki ni koya. ¹² Ni qu vatalai Atitema se o Tikiko ira iko, mo laka varewarewa mai Nikopoli, ko qi sa numia no mequ dewa nore kha. ¹³ Tara na kwa taucokho e rewa ni solia ina ledru i lakalaka o Sina na loya qa Apolosa, qa me kua ni vele i lia na kwa. ¹⁴ O kora muni na leda tamata mere vakavulici mere vaitavitakhi nira ina cakacaka vina merewa ni sotavi varewarewa muni kha na kwa i lai vinati va rewarewa, mere vua vakha levu muni kha. ¹⁵ Ere loloma tu yati va iko o kora na no tu qai au. Iba sa loloma tu muni yati va kora kece na lomani vati kemam ina buku ni vabautia. Me qei lem vata coko na Loloma.