¹ Me toso ga i no ina loloma vavitacini. ² Kua ni numidei nia mo vaceguti kova na valagi. Na calevu kwe, e i sewa sa tara ua vivacegni vua ra na agilosi qa ve tam kilatia tu. ³ Numi kora na koivesu me wetai sara ga e vesulaki tu qai kora. Numi kora muni na lei qwavavi vakaca tu me wetai o iko i lia vuara. ⁴ Na vakavilewe me doka coko na tamtata, me tara ne vavilewe i na calevu savasava, baletia na Kalou ina lewai kora na tameta re vidomom koi tam donu qai ko ra na vidanci. ⁵ Dania na lem i vakaran mo gwalala mai ne dau lomania ne i lavo. Mo yalo vakacega ina kwa i tau i va iko, ni sa kwaya rewa na Kalou, “Qi na tam deim iko, se qi numidei ni iko tu. “ ⁶ Me te yalo vaka cegu me te doudou ni dau kwaya, “Na Momo ne leqi au i vukevuke; qi na tam mataku. Na yava ei rewa ni tara na tamata va au?” ⁷ Vanumi kora na teimata taki ni kem vali, o kora na wase na tata ni Kalou va iko, qo vanumia na i soqovu ni ledra i vakaran. Tatakutakni cia na ledra vabantia. ⁸ O Jisu Karisito e si tantanvata ga no a invi, vikua me tam mudu. ⁹ Me kua sava ni rewati iko na vimatagali vakavuli von. E i vina na uto me raqwaqwataki ina loloma, me kua ni tea magiti ko i tam vukei kora e re laka vata qara. ¹⁰ E i tau no e i lia na cabocabo vu sovo ko i tam donu me re kani ka o kora ne viqwaravi i werenilotu ¹¹ Ko na dra ni manumanu ko i vakama te baletia na i valavala cakaca e i kau na bete levu inavanua vatabui, oti a sqei lai bula me dra yago i daku ni keba. ¹² O Jisu mum a sotagaya kwe i matamata ru koro mai tevai, me ma rewa ni vadonui na tamata i e dra. ¹³ Me te laka yati i vua i daku ni keba, me te liavata i na lolo vira a sotaqaya. ¹⁴ E i lala lia leda koro koi tauvalia tu ka kwe. E i vina, te tolavia no yati ko i lia e i vakarau laka no mai. ¹⁵ Baleti koya, so kwe, me te dau va cabo ga no i yata na i soro ni vilaveti vua na Kalou, na vilaveti koi tea vua ni tebeingusu kou vacaucautaki ina e yaca ¹⁶ Me te kua ni dau numidei nia na tara na kwa vina qa na dau soli kwa, ko na mataqali vacacabo kwe e i dau vinatia na Kalou. ¹⁷ Dauvarogo qo soli kem vuara ne viliataki, do o kora e re va dama no mem yalo qa re na solo tukutuku mum. Dauvarogo me ma rewa vuara na vilintaki me re tara I na gadre, me re kua vu boris i , baletia i tam vina va iko. ¹⁸ Masulaki ni vatikemam, baletia iba vadeitaki nia ni ba na vatulewa vina qa ba sa vinatia me ba cola vadodonu ina vikwa coko. ¹⁹ Qi uqeti vatikem mo ba tara vakalevu kwe, me rewa ni qu lesuvi vatikem leqwa mai boto kwe. ²⁰ Na lea vakacegu na Kalou, o koya a vacola nia leqwa mai na mate na i vakatawa levu ni sivi, na leda momo o Jisu, ko na dra ni viyalayalati tam oti rewa. ²¹ Ba colataki na kwa vina coko mo ba rewa vu tara na kwa e i vinatia, a ba tara na kwa a vina vua, baleti Jisu Karisito, me lea na varokoroko ko i tam mudu. Emeni. ²² Ko kwe qi sa uqeti vatikem, vitacini raki, me vatilem na tata ni vivayalo qwaqwataki ko qu vola valekeleke ya va vatikem. ²³ Ba kilatia o vatileda vitacini o Timoci a sa vagwalala taki rewa, qi na lai dam vatikem ya ma ga i sa laka boto mai kwe. ²⁴ Loloma yati vuara na lem i liuliu qa i ko ra coko na tamata vatabui ni Kalou. O kora mai Itali re sa loloma yati. ²⁵ Me leda vata na loloma.