¹ Ia na lawa itia titiyalo boto ni vikwa vina inayaco mai, ia i tam ni koya nai yaloyalo du. O kora coko ere kabi vakolotia no na Kalou i tam rewa ni bulira mere vina sara nai soro vata ga care dau cabo na bete ina vi-yabaki. ² Ia maga ei rewa, ina tam rewa muni me tarovi na kea cabori no nai sori? O kora cokho na dausoro ere sa vakasavasavatakhi qa ra sa tam okati mere ivalavarala ca. ³ Ia nai soro cokho kwe itia nunumi tu boto ni valavala ea ina vi yabaki. ⁴ Ni rewatia na dra ni bulumakau qana me me kau dei na valavala ca. ⁵ Ina lea takha mai vuravura na Karisito qa kwaya, “nai soro qana madrali qaisa duaraki nia, ia na yago ga omsa vakarautaki nia va au; ⁶ nai soro koi bula qa nai soro ni valavala ca om tam gadretakhi nia. ⁷ Qu sa qei dwaya, tolavia, o au kwe- me wetai a volai tu ina vola vivigi-mequ tara eiloma, na Kalou.” ⁸ Nai matai ni kwa a kwaya, sa lala nai soro, sei madrali, se nai madrali bula, se soro ni valavalaca omtam vinatia se rekhitaki nia. “Ko kwe nai madrali a cabori me wetai na lawa. ⁹ Asa qei kwaya, “tolavia, o au kwe mequ tara mloma.” Sa kau dei kha o koya nou matai ni vatovotovo me vatarai kha nai karua ni vatovotono. ¹⁰ Mai e loma, tesa qei vasavasavatakhi mai na kea cabo e yago ni Jisu Karisito me kea i tinitini. ¹¹ Ina visiga cokho kora na bete ere tu mere tara ledra cakacaka, na sorovaki dodo ni madrali- na i madrali koi tam kau dei kolokolo nai valavala co. ¹² Ia na Karisito sa cabo vakalia maga mei madrali ni valavala ca, qa sa gatule civo no e lima i matau na Kalou. ¹³ A sa qei warakhi nira no na meca mere butu lau nia e mawe ni la. ¹⁴ Mai na lia talia ga nai madrali a sa va yaco nira kha mere vina wara qa tam vai yalayala okora are sa vakasavasavatakhi. ¹⁵ Na Yalo Tabu sa vakadudutakhi nia boto muni va keta. Matai i kwaya, ¹⁶ :kokwe na vi yalayalati qina vayaco i vuara ni oti na visiga sokwe, sa kwaya na Momo. Qina biutia na lequ lawa ina buto ni medra uto, qaqa na vola muni ina ledra vakhasama.” ¹⁷ Sa qei tomania, “na ledra i valavala ca qana ledra duakara qisa numidei nia vakalia.” ¹⁸ Ia maga isa vosoti na vi kwa kwe, sa lala vakdia leqwa nau soro ni valavala ca. ¹⁹ Ia ko kwe, ra viwekani, sa soli tu kha na gwalala mete rewa ni rusu doudou ina buto ni logi tabu ina vuku ni dra i Jisu. ²⁰ So kwe na calevu vou qa cola sa vatarai va keta mete rusu vio nai lati, so kwe, nai balebale nie yago. ²¹ Baletia ni sa no qai keta vali na bete tetelagi ni were ni Kalou, ²² Mete toso valeke ina uto ei du qana sinai vutuvutu ni vabautia, me vakasavasavatakhi meda uto mai na numia cala qa na yago me savati ina wai matamatakwa. ²³ Mete borokutukutu nia no nai nuinui koi te vatusa no, ni a yalayala ina yalo du. ²⁴ Mete vakasamataki nia sakavina sara mete viovaki no ina loloma qai na tara vina. ²⁵ Meta kua ni deinia na leda dau viovio no, me wetou ere sa tara ei sewa. Koya so kwe, mete vivayalo qwaqwatakhi no, ia me vakalevu me wetai na leda ligocia ni sa valeke na siga ni lesu mai. ²⁶ Ia maga te nakitia no mete tara ga no nai valavalaca ni te sa kilatia rewa no na du, sa lalalia leqwa nai soro ni valavalaca me qei vakabau. ²⁷ Koya so kwe, sa vo boto na leda maraki nia ina mataku na siga ni vilewai, na quto udre vamataku ina kani kora na meca ni Kalou. ²⁸ O koya i becia na lawa lei Mosese ina mate qana tam lomani ni lai tavui ni rua se tolu nai vadudu. ²⁹ I vei ina wetai re na cakaca ni totogi ina yaco vua ilia ina lea buturaki nia na Luve ni Kalou, qa vakawaletakhi nia na dra ni viyalayalati me tamtia kwa tabu- na dra a visotavi vua- qa becia na Yalo ni loloma? ³⁰ Nite sa kilati koya a kwaya, “so lequ i tavi mequ tau cia na kem i lologi, qi na vaganiko ga.” Asa kwaya leqwa, “Na Momo ina lewai kora na lea tamata.” ³¹ Isatia kwa vamataku mo lutu mai na lima ni Kalou cola! ³² Ia mete dau vanumia lesu na vi siga sa oti, tesa vacecetaki mai kho, na kea lai vakilati na vi kwa rarawa oba so tavia. ³³ Ina sewa na gauna omna lai vakadure medra mata mom lai varivariva se viwalitakhi, sewa na gauna omdau viwasei qai kora are sotavia muni mai na kea cakaca. ³⁴ O ikho mo lomani kora na vesu tu, ia mo sovia ina rekhi maga i qara vaqwaqwa mai vatikem na vatilem i yau. Nio ba kilatia no mai mem bu ni yalo ni tau no na lemivotavota ni yau koi vina sara sqa tam vaiyalayala. ³⁵ Mo kua ni walataki dei na lem dutia, ni levu sara na kea i votavota. ³⁶ Ivdudonu me tau via iko a yalo ni vosotia mo rewa ni tara rewa kha e loma na Kalou, ina qei vatilem na kwa a yalatakinia tu. ³⁷ “Ina tam balavu sara, o koya koi laka mai ina laka du mai qana tam daro. ³⁸ O kora lequ tamata yalododonu ere na cola ina vabautia. Maga i lia i tusukha i taku, qu yalo ina tam vinatikho.” ³⁹ Ia o keta tena tam ucira yalia na vuku lesu ina rusa, ia mete no vikawacaki qai kora na vabautia qa te vacola nia medra yalo.