¹ A ru sa la mai ki na tiliva ni waidui I na yasayasa vakha Kheresoni. ² Na gauna kha si qei sovutakhi no khe kho Jisu, sa la ci kwoya yati kha tlia na tagwane kha lei curumi tu kha rusu tu mai na vi bulubulu. ³ Kho kwoya e sa dau no tu ga mai I nai bulubulu qa sa tamurewa muni vua khei tlia me sobeti kwoya rewa, qa tamu rewa boto ro I na se ni codo. ⁴ Tikhai tlia na tamata kha rewati kwoya. Ni dau drutalakhinia khece na se ni codo vata qa na khea I vakhadre e na levu na gauna khei dau vesurakhi khe. ⁵ I na vi siga qa na vi bogi e dau tagi tu mai I na buto ni ri bulubulu mei e dela ni sa dau tavarakhi ni kwoya tu I na vatu gare. ⁶ Mai na vanua yawa, na gauna sa tolavi Jisu yati khe, a qei wavu yati qa lakhi kharuva. ⁷ Kha tagi e na domo levu, “na cava me qu na tara ve khe mu, Jisu, na luve ni Khalou levu? Qi tereri mu, e na vukhu ni Khalou vakhatakhini kwoya mo mu na khua ni totogi takhi ni au”> ⁸ Ni a kwaya no I vua “la dai mai vua na tagwane kho ikho na yalo velavela.” ⁹ Kha sa qei tetei kwoya, “Kho cei mu yaca”. Saumia yati kho kwoya, “qu yaca kho vavakhoso qa mamu wara.” ¹⁰ A sa qei tereri kwoya no ga me na khua ni vakhatalai kwo ya teni mai na yasayasa gima. ¹¹ Khi e dela, kha ra khana tu khe kha wara na qo, qa ra sa qei terevi kwoya, “mu vakhatalai mamu boto me mamu rusuvi kwora na yalo ni qo.” ¹² Kha sa qei vakhatara me deini kwora na yalo velavela qa la khi rusuvi kwora yati na qo. ¹³ Kha ra sa qei vitau wavu civo I e dela na qo khece gima, kha rautia ni rua na udolu, qa ra la khi cidromu kheu tu yati khi na buto ni wai dui. ¹⁴ Kho kwora na vakhana qo no kha ru sa dukhu tuba qa ra la khi tukhunia ati mara khei so leqwa na tamata I na buto ni vi tauni yalevu qa na yasa khece ni vikhorokhoro e na buto ni vanua qa sa tekivu la yati na tamata me ra la khi tolavia na kwa kha yaco. ¹⁵ A ra sa qei la mai va Jisu qa ra sa mei tolaria muni na tamata kha curumia tu kho vavakoso ni sa gatule tu, vakhaisulu vina tu, kha ra sa qei matakhu. ¹⁶ Kho kwora na tolavia na kwa kha yaco vua na tagwane curumi yalo velavela gima, kha ra sa qei talanoatakhi vakha vina vata na kwa muni kha yaco vuara na qo. Kha ra sa qei tereri ¹⁷ Kwoya, me sa la dai mai na vanua gima. ¹⁸ Na gauna sa vodo no khe I na waqa, sa terevi kwoya yati na tamata curumi yalo velavela, me la vata qei kwoya. ¹⁹ Ia kha tamu vakhatara kho Jisu, qa vecei kwoya me, “la I leu sue, vuara na wekhamu, qo vecei kwoya na kwa kha sa tara I na lemu cola na Turaga qei na lea loloma I va khe ikho. ²⁰ Kha sa qei kwaya rauni yati I na buto ni vikhorokhoro yalevu na kwa kha sa mai tara I na lea cola kho Jisu, kha ra sa qoroqoro tu boto na tamata. ²¹ Na gauna kha sa takhoso leqwa khe khi tiliva kho Jisu I na waqa, sa mici osori kwoya yati na tamata I na matacawa. ²² Kha sa qei tlia na teiteimata ni sue ni lotu, e yaca kwo Jairo, kha mai kharuva vua qa terevi kwoya qa kwaya, ²³ “na lequ vulau, khe I sa vakhalekhe tu du ni ciba qi terevi mu, mo mu mai derei kwoya boto me ma rewa ni cola vina. ²⁴ A sa qei la vata qei ni kwoya, qa ra osori khoya yati. ²⁵ A no khoto no muni mai khe gima kha tlia na yalewa kha la ci kwoya tu na dra me rautia e tinikharua na yabakhi. ²⁶ Vakhalusinia tu e levu sara na lea I yau, e na lea dau la khi tolavi vakhavuniwai. ²⁷ Na gauna sa vakharogocia khe na I tukhutukhu baleti Jisu, a la mai e lobo li Jisu qa dere boto na bele ni sulu li Jisu, ²⁸ Kha qei kwaya kwo kwoya, “O au ma qi na dere boto na lea I sulu, qi na cola.” ²⁹ Na gauna ga kha dere I kwoya khe kha mudu vakhasauri na dra kha la ci kwoya tu qa vakhilatia muni na taumama ni e yago qa sa cola muni mai nai vesu, ³⁰ Vakhilatia muni kho Jisu ni reva vakhasauri vua e tlia na qwaqwa vuki vuara na tamata qa kwaya “Kho cei kha dere na lequ I sulu,” ³¹ A ru kwaya vua na tisaiveli, “tolavia ro na wara ni tamata khai ri oso ti mu tu kwe, qo qei kwaya tu, “kho cei kha derei au”. ³² Ia, kha vi tolayaki kho Jisu me dania se kho cei ro kha derei kwoya. ³³ Ni sa khilatia na yalewa gima, na kwe=a khe yacori kwoya, a sa qei matakhu, qa la yati kha rura I vua qa kwaya vua na kwa du. ³⁴ Vecei kwoya, “lequ vulau, sa vakhacola ni ikho na lemu vakhabautia. I sa cola mai I na I vesu qa mo la I na vakhacegu.” ³⁵ Gauna kha tata no khe kha sa qei so vuara na teiteimata ni sue ni lotu,ka ra la mai qa ra vecei kwoya, “kho luvemu sa ciba, na cava I vakhaosooso takhi ni vakhavuvuli leqwa no khe. ³⁶ Ia na gauna kha vakharogocia khe kho Jisu na kwa kha ru sa vakways no, sa qei vecei kwora na teiteimata ni sue ni lotu, mutu khua ni matakhu, mutu vakhabautia boto.” ³⁷ Kha tamu tlia vata kho kwoya me tlia leqwa me la vata qei ni kwoya, ia ko vita boto Jemesa, qei ni Joni na taci Jemesa.’ ³⁸ A ru la I na sue li khoya na teiteimata ni sue ni lotu, qa ru vakharogociadra lio I na ledra vitagicakhi tu. ³⁹ Ni sa rusu yati I buto ni sue, sa vecei kwora, “na cava mi ti rarawa takhi na cava mi ti tagicakhinia”? Na luve waki khei tamu ciba, ia e I moce bo boto. ⁴⁰ Tekhivu me ra vakhalewai kwoya. Kha sa qei biuti kwora khi tuba, qa mei kworu ga na I tubutubu li vulau qe I ni kworu lea I lala qa ru la khi rusu khi na vanua kha dara no khe kho vulau. ⁴¹ A qulumia e lima na luve qa vecei kwoya, “Talica”, na khea I balebale, “vulau sewa:, qi sa kwaya ve khe iko, “mo dure”. ⁴² Vakhasauri na lea dure na vulau sewa (ni sa yabakhi tinikharua no) qa taubale. Kha ra sa qoroqoro qa ra khurabui e na kwa kha sa mai yaco ⁴³ Kha sa terevi kwora du vakha biri, me na khua leqwa ni tlia me na khilatia na kwa kha yaco. Qa vecei kwora me ra solia vua na magiti me khana.