¹ Mutou na yaluve, qi sa vola vola no yati khwe vei khe mutou mo mutu khuwa ni dau vala vala ca. Ia ma Khei vala vala ca, e tlia sa na matatakhini da no i va tamaya, Jisu Karisito, kho khoya khei dodonu. ² Khoya a solia na lea cola me baletia na leda vala vala ca, qa tamu ni da boto, kho khora khece na khoi vura vura. ³ Di sa khilatia ni da sa la mei khilati khoya, ma di sa maroroya na lea I vunou. ⁴ Ma khei tlia ei khwaya “O yau qi sa khilatia na Khalou” qa tamu dau takucia na lea vaka vuvuli e tamata rekhwa rekhwa, qa na du e tikhai vekhe khoya. ⁵ Ia kho khoya khei takucia na lea tata, i vua na loloma ni Khalou e tlia coko. A khwe di na khilatia ni da la vata no qei khoya: ⁶ Kho khoya ya tlia ei khwaya ni no qa na halou, khei dodonu me takhucia na lea sala. ⁷ Lequ khwa talei, O yau tamu vola no yati i nai tlia na i vola vou vekhe ikho. Ia na vunau makhawa boto khoya tau tu mai e na i tekhitekhi vu. Na vunau makhawa mu sa vakharogocia devu. ⁸ Ia qi sa vola no yati e tlia na vunau vei khemu. Khoya khei du vua na Karisito qei mu, baletia sa mai reva na gigilo, qa sa cedre na cece du. ⁹ Khoya ei khwaya ni sa no khoto i butu ni cece qa se cakha catia no ga na taciya, e se no tu i butu ni gigilo me yacovia mai khwe. ¹⁰ Kho khoya a tlia e lomania na tacia e tau no ga i butu ni cece qa tikhai na gauna me lutu khe. ¹¹ Ia kho khoya e dau cakotia na lea vunisuwe e se no tu i bubu ni gigilo. E tamu khilatia na sala e takhucia baletia ei vakho mata kha bulutaki tu e mata. ¹² Qi vola vola no yati khwe va be mu, kho mu a yaluve, baletia na lemutu vala vala ca sa lei sovi e na vuku ni lea yaca. ¹³ Qi vola vola no yati vei khemu, na vei tama, baletia mu khilati khoya khei la ma na tekhitekhivu. Qi vola vola no yati khwe, vei khemu na saravou, baletia mu sa rewatia na qwaqwa mei vana vuni ca. Qi sa vola vola no yati va khemu na luve yau baletia mu sa khilatia na tamada. ¹⁴ Qi sa volavola yatu khwe, vei khemu na tama, baletia mu hilati hoya e la mai na tekhitekhivu. Qi vola vola no yati khwe, vei khemu na saravou yasewa baletia mi qwa qwa, qa na tata ni Khalou e tau no ve khemu, qa mu sa qwa qwa mai vuwa na vuni ca. ¹⁵ Khuwa ni lomania na vura vura se na vi kwa vakha vuravura. Khe so e lomania na vura vura na loloma ni tamada e tikhai vua. ¹⁶ A khwe na khwa e tau no i butu ni vura vura – na garo garo ca ni yago, na garo garo ca ni mata qa na cola dokha dokha e tamu la mai vei tamada ia khei la mei vura vura. ¹⁷ Na vura vura qa na kea gagadre e sa reva no yati. Ia hoya a tlia e tara na lewa ni khalou e na cola no qa tawamudu. ¹⁸ Khemu na yaluve, a hwe na devu devu ni gauna. O daki ga o sa vakarogocia ni na Khalou rekwa e tamu dodonu, e la no mai. A khwe di sa na khilatia khe ni sa te devu devu ni gauna. ¹⁹ Khoru aru la teni mai vekhe mamtou ia a tam ni mam tou vataaru khe no khoto no ga qei mamtou. Ia na ledru dei ni mamtou e vakha takhea ni tamu ni mamtou vata. ²⁰ Ia ho mu khei nakhi no vekhe mu na vilumuti ni le tlia yalo sava sava, mo khilatia khece. ²¹ Au qu tamu vola vola vekhe ikho baletia na lemu tamu khilatia na du, ia baletia boto na lemu sa khilatia na, qa baletia muni, tikhai tlia na rekhwa e vu mai e na du. ²² Kho cei na dau rekhwa? Kho khoya a tlia khei cakhatia ni kho Jisu na Kharisito? Na tamata wakhi e te kharisito rekhwa, baletia na lea cakha catia na tamaya qa leiveya. ²³ E tamu tlia khei cakhi takhi ni luveya me no vata qa ni tamaya. Kho khoya a tlia e tusanakhinia nayacai luvuya eri no vata qa tamaya. ²⁴ Ia vekhe iko me nakhi no ga na khwa kho vakhorogocia mai nai tekhi tekhi vu. Qa ni me ke no qei ikho na kwa ho vakha rogocia mai na tekhi tekhi vu, i na no khoto no ga qei ikho na luveya qei tamaya. ²⁵ A khwe na khwa kha sa yalatakhinia ve khe da – cola tawamudu. ²⁶ Qu sa vola khece vekhe ikho baletia kho khora ara vaka sese ni mu. ²⁷ Ia vekhe ikho na vilumuti kho sovia mai vua me nakhi no ga vekhe iko qa me kuwa ni tlia leqwa me vakha vulici iko. Me odaki na lea vakho vulici ikho ina khwa na lea vilumuti qa du qa tamu dau rekhwa me odaki na lea vakha vulici iko, to khoto no ga i vua, no khata no ga vua. ²⁸ Akhwe yaluve, mutu tukhata i vua i gauna khei la mai khe, di na dou dou qa du na tamu madua i vua na lea la mai. ²⁹ Ma khi sa khilatia ni kho khoya na yalo dodonu, kha sa hilatia ni kho khora khece e dodonu eri sucu mai vua.