¹ Ai vola ni kawa i Jisu Karisito, a luvei Tevita, a luvei Eparama. ² Ko Eparama na tamai Aisake, Aisake a tami Jekope, Jekope na tamai Juta kei ira na tacina. ³ Ko Peresi kei Sera rau na luvei Juta kei Tama, Peresi a tamai Esironi, Esiromi a tamai Erami. ⁴ Erami a tamai Aminatape, Aminatape a tamai Nasoni, Nasoni a tami Salimoni. ⁵ Salimoni a tamai Piasa kei Reapi na Jinana, Poasa a tamai Opeti kei Ruci a Jinana, Opeti a tamai Jese ⁶ Jese a tamai Tevita a tui, Tevita a tamai Solomoni ka jinana a wagi Uraia. ⁷ Solomoni a tamai Riapoama, Riapoama a tamai Apaia, Apaia a tamai Asa. ⁸ Asa a tamai Jiosafati, Jiosafati a tamai Jorami, Jorami e kawa mai vei Usaia. ⁹ Usaia a tamai Jocame a tamai Aasi, Aasi a tamai Esekaia. ¹⁰ Esekaia a tamai Manase, Manase a tamai Amoni, Amoni a tamai Josaia. ¹¹ Josaia e kawa mai vei Jekonaia kei ira na tacina ena gauna ni kau vakabobula ki Papiloni. ¹² Ni gi na kau vakabobula ki Papiloni, ko Jekonaia na tamai Salacieli e kawa mai vei Serupepeli. ¹³ Serupepeli a tamai Epiuta, Epiuta a tamai Elikimi, ko Elikimi a tamai Asori. ¹⁴ Asori a tamai Setoki, Setoki a tami Akimi, Akimi a tamai Eliuta. ¹⁵ Eliuta a tamai Iliesa, Iliesa a tamai Macani, Macani a tamai Jekope. ¹⁶ Ko Jekope a tamai Josefa a waji Meri, ka sucu mai kina ko Jisu, ko koya ka vakatokai ko Karisito. ¹⁷ E jini ka va taucoko ai tabatamata mai vei Eparama me yaco mai vei Tevita, ka jini ka va tale ai tabatamata mai vei Tevita ka yacova a kau vakabobula ki Papiloni, mai na gauna ni kau vakabobula mai Papiloni ka yacova mai na gauna i Karisito e jini ka va tale ai tabatamata. ¹⁸ Sa vaka toka iei a ka ka yaco ena I lakolako ni ona a sucu ko Jisu Karisito, a tinana ko Meri ka rau ka veirosaki kei Josefa ni bera ni rau vakawaji, ka sa kilai ni sa bukete kei na Yalo Tabu. ¹⁹ Ia ko Josefa a wajina sa tamata yalo dodonu, ka sa tawa vinakata me kilai, ni sa via biuji ko koya lo ga. ²⁰ Ni sa vakananuma a vei ka sa yaco, sa qai rairai mai vei ko koya ina tadra e dua agilosi ni turaga, ka kaya, “ I Josefa a luvei Tevita Kakua ni rere ni kauji Meri me wajimu, baleta ko ka ka kunekunetakina jiko e kunekune mai keina yalo tabu. ²¹ E na buketetakina e dua a gone tagane, ka ko na vakayacani ko koya ko Jisu, ka na vakabulai ira mai a ona tamata mai na i valavala ca. ²² I ei sana yaco kina a ka ka vosa kina a Kalou kina ona parogita, ka kaya,” ²³ Raica e na bukete e dua a gone yalewa, ka na vakasucuma e dua a gone taga,e, ko na vakayacani ko koya ko Imanueli. “Na Kalou sa jiko vata kei keta” qoya ai balebale ni yacana. ²⁴ Sa qai yadra ko Josefa ka valata a meca ka kaya kina a agilosi ni turaga; ka sa qai kauji Meri me wajina. ²⁵ Ia ko Josefa sa tawa kilai Meri me yacova ni sa vakasucuma e dua a gone tagane, ia sa mani vakayacani ko koya me ko Jisu.