¹ Ia ni vo labale mai na ulu ni yataga o kiya, e ru lewe levu sara a ru tekuciya mai. ² Qai danyia, e kiya na tamata vukavuka ni vo lamai qai kaere vua, qai kwa, "Na Turaga, kodaki o vo okajia mo vo vasavasavataki ni ko au rewa." ³ A qai dodokiya e lima o Jisu, me dereiya, qai kwa, a qu vo okajia, mo savasava mai. A vo savasava vasauri na leya vukavuka. ⁴ A qai kwa vuwa o Jisu, Tolaviya, mo kuwa re ni kwa vuwa e kiya, ia mo lai vatakeko re vua na bete, qai va caboniya nai madrali a varojia o Mosese, me jiya i va jina jina vuwadru. ⁵ Ia ni vo unu o keya i Kapenaumi, a qai la mai vua e kiya na turaga ni valu, a masujia, ⁶ qai kwa, "Lequ Turaga, e vo daro no mai lemadou na lequ tamata e tauvi-paralasi, a vo yaluma valevu sara. ⁷ A qai kwa vua o Jisu, A qu na lai vacolo niya. ⁸ A kwa na turaga ni valu, Na Turaga, e tasi yaga mo unu ina lequ were: mo cavujia wale ga na kwa, e na lai cola ke na lequ tamata. ⁹ niqu vo turaga lailai ga o au, a qu vo lewaia e yavalu na sojia, ia a qu vo kwa vuwa e kiya, mo layaji, a vo layaji, qai niya e kani kia tale, Mo la mai, a vo la mai, qai nia vua na lequ tamata, Mo vavea ikwe a vo vavea. ¹⁰ Ia ni vo varogo o Jisu, e kurabua, a qai kwa vuadru tekuciya no, A qu vo kwa kwajina vuako mutou, A qu vo tasi daniya vuwadru na Isireli e kiya na vabaujia levu kodaki ikwe: ¹¹ A qu vo kwa tale ga vuwako mutou ni ru na lewe levu e ru na la mai na tu i yata, mai ra talega; qai no ira vo Eparama, qai niya o Aisake qai niya o Jekope, i na matanitu valomalagi: ¹² Ia o rau na i luve ni matanitu e ru na biu i na gilogilo i rara, e ru na dautagi ka vasequruquru baji. ¹³ A qai kwa vua na turaga ni valu o Jisu, Mo la ga; ia me kodaki ni o vo vabaujia, me yaco vuwako. A vo cola na leya tamata i na jiki-ni-yauwa igi. ¹⁴ A qai la i la were o Pita o Jisu, a qai daniya la nene la yalewa, ni daro no, e tauvi-katakata. ¹⁵ A qai qulumia e lima o keya, a vo ladei vua na katakata a vo tucake o keya, a qwaravidru. ¹⁶ Ia ni vo , a ru vo kau mai vua e ru lewe levu e vo unu vidru tu na nitu: a qai vaqaqidru na nitu o kiya a qai vacolo nidru taucoko na tauvi-mate: ¹⁷ O kiya a vo vai ke na kwa a kwa o Aisea na parovita, qai kwa, o keya ga me kau vuwa na ledu malumalumu, qai dagiya na ledu mate. ¹⁸ Ia ni vo tolaviya o Jisu ni ru vo lewe levu sara eru vo wavokijia tu, qai kwa me vai na la i jiliva. ¹⁹ A qai la mai e kia na vu- ni-vola, a kwa vuwa, Vavuvuli, a qu na tekuciko i na viyasana o lake. ²⁰ A qai kwa vua o Jisu, E vaqwara na vokisi, e vairoro na manumanu vuka; ia na Luve ni tamata, e jikai vua na vanua me va daroniya ke e ulu. ²¹ E kiya tale na leya i jisaiveli a kwa vua, Kemuni na Turaga, biujiko au me qu la re i bulujia lequ Momo. ²² A qai kwa vua o Jisu, Mo tekuciko au, qai biujidru na mate me ru bulujia na ledru mate. ²³ Ia ni vo lai vodo na waqa o kiya, a ru vo tekucia na leya jisaiveli ²⁴ Qai dania, ni vo tubu na ua levu i wasawasa, a vo dromu na waqa i na biau: a vo moce o keya. ²⁵ A ru qai lamai na leya jisaiveli, a ru vayadrajia, a ru kwa, "kemuni na Turaga, vacolo ni ko datou: ni du na mate!" ²⁶ A qai kwa vuwadru o kiya, "Mutu vo mataku ena vuku ni cava? o mutou e vo lailai lemutu vabaujia ? A qai tucake o kiya, a vunauci jiya na cagi vata na wasawasa; a vo maravu sara mai. ²⁷ A vo karacidru na tamata, a ru kwa, E kodaki re i vei lai tovo na tamata ikwe, ni vo talairewarewa vuwa na cagi vata na wasawasa?" ²⁸ Ia ni vo toso o kiya i jiliva, i na ledru vanuwa na kwai Kerikesa, qai sota qanidru e lewe rua e unuvidru no e yavalu na nitu, eru vo la mai nai bulubulu, eru vo yalo ocaoca sara, a vo jikai ke na tamata me la rewa i na calevu igi. ²⁹ Qai daniya, e ru vo kulakula, e ru qai kwa, "E kodaki vei o datou, i Jisu na luve ni kalou ? o vo la mai i kei mo vararawataki niko madou ni sibere ni yaco na keya gauna?" ³⁰ A qai kiya na i lala vore levu a ru lai vakana no, a ru no va yawa no mai vuwadru. ³¹ A ru vo masujia o rau na nitu, a ru kwa, kodaki o vo vaqaqiko madou, vadeniya me madu unu vidru na i lala vore. ³² A qai kwa vuwadru o kiya, mutu la ga. A ru vo la dai, a ru qai unu vidru na i lala vore, qai danyia, ni ru vo wavu na i lala na vore taucoko i yataga me yaco i ruwai, a ru vo mate i ruwai. ³³ Ia o rau na vivakana, a ru vo tuba, aru vo la i rara. a ru vo lai kwa na kwa taucoko, vata na kwa a yaco vuadru na unuvidru no na nitu. ³⁴ Qai daniya, e ru vo la taucoko yaji na lewe ni rara me ru sota o Jisu: ia ni ru vo daniya, e ru vo masujia me ladei yaji i na ledru vanuwa.