¹ A vo vadevuniya o Jisu na i tukutuku ikwe, a vo qai la i Kalili a yaco sara na yasayasa va Jutia e kiya e tavo o Joritani. ² A ru vo levu sara a ru tekuciya a vo vacolanidru mai keigi o kiya. ³ Aru lamai vuwa o rau na farisi a ru vatovoliya, aru kwa vuwa, "E tara vuwa na teigwane me dainiya la yalewa e na vuku ni kwa taucoko ga se jikai?" ⁴ A vo tata o Jisu, a kwa vuwadru mutu tasi wilikiya o kiya e bulidru mai nai vatekivu a buliya ga na teigwane qeiniya na lewa? ⁵ A kwa ina vuku ni kwa ikwe e biujiya ke o tamaya qeiniya la nene na teigwane, a kabijiya la yalewa eru na kiya ga. ⁶ O kiya ikwe e vo jikai niru ruwa no, eru na kiya ga: Na kwa vo vauciya vata na Kalou me kuwa ni wasekiya na tamata. ⁷ Aru kwa vuwa, ''Na cava e varojiniya ke o Mosese me soliya na i vola ni vibiu a qai dainiya?'' ⁸ A kwa vuwadru o kiya, ''E vuku ni lemutu yalo kaikai, e vosojiko mutou o Mosese mutu dainiya ke na lemutu yalewa: a tasi kodaki ikwe nai vatekivu. ⁹ Aqu vo kwa vuwako mutou, o kiya e dainiya na leya yalewa, ke jikai ni dau teigwane, la vayalewa tale ve kiya, e dauyalewa, o kiya muni eru viwajini vata o kiya e vo dai e dauyalewa.'' ¹⁰ Aru kwa vuwa o rau na leya jisaiveli, ''ke kodaki ikwe na lewa vuwa na teigwane qeniya la yalewa, e oka me kuwa na viwajini.'' ¹¹ A kwa vuwadru o kiya, ''E tasi rewajiya na kawa ikwe na tamata taucoko ga, o rau ga a soli vuwadru. ¹² E yavalu me kuwa ni vawaji, niru sucu mai na kete ni ledru nene, e yavalu me kuwa ni vawaji, ni vo selevijidru o rau na tamata, e yavalu me kuwa ni vawaji, niru lewaiya meru kodaki i na vuku ni matanitu valomalagi o kiya e rewajiya me vabaujiya, me vabaujiya.'' ¹³ A qai kau mai vuwa e yavalu na luve yalai me tabakidru o kiya ve lima, a masu a vunaucijidru o rau na leya jisaiveli. ¹⁴ A kwa o Jisu, ''Dainidru nai luve yalai, mutu kuwa ni tarovidru, niru vo lamai voko au, niru kodaki na lewe ni matanitu valomalagi.'' ¹⁵ A tabakidru ve lima o kiya a qai ladai mai keigi. ¹⁶ A tolaviya, a lamai e kiya a kwa vuwa, ''Vavavuli oka, Na cava e oka mequ vaveya mequ rewajiya ke na cola tawa mudu?'' ¹⁷ A kwa vuwa o kiya, ''Na cava o tarogiko au ke na vuku ni kwa oka? E kiya ga e okaji kodaki o mata unu i na cola, mo tekuciya na i vunau.'' ¹⁸ A kwa vuwa o kiya, ''Nai vunau cava?'' ¹⁹ A kwa o Jisu, ''Mo kuwa ni laba, mo kuwa ni vidriva, mo kuwa driva, mo kuwa ni beitakiniya vailasu, Varokorokotaki nidru o tamamu o nene mo lomanidru o rau na kwai lemu me kodaki na lemu lomaniko.'' ²⁰ A kwa vuwa na suravou, ''Na kwa taucoko ga iqoi qu vabaujiya ga aqu si jiya i luve qu yacoviya na siga iqoi. Na cava tale esi vo voko au?'' ²¹ A kwa vuwa o Jisu, ''Kodaki o kajiya mo oka sara,mo la mo lai volitakiniya lemu i yau, soliya vuwadru na dravudravuwa, o na qai vai yau mai lomalagi, io mo lamai, mo tekuciko au.'' ²² Ni vo varogo na tata ikwe na suravou, a vo ladai e rarawa e yaloga, ni levu na leya i yau. ²³ A qai kwa vuwa o rau na leya jisaiveli o Jisu, ''Aqu vo kwa vaijina vuwako mutou, e dredrei vuwa na tamata vutuniyau me unu i na matanitu valomalagi. ²⁴ Au qu kwa tale vuwako mutou, e vo rewarewa me unu viya na mata ni cula na kameli, e dredrei vuwa na tamata vutuniyau me unu na matanitu ni Kalou.'' ²⁵ Niru vo varogo na leya jisaiveli, e karacidru sara, aru kwa, ''O cei ena va colai rewa?'' ²⁶ A va tolavidru o Jisu, a kwa vuwadru, ''Na kwa taucoko e dredrei vuwadru na tamata, e rewarewa vuwa na Kalou na kwa taucoko ga.'' ²⁷ A qai tata o Pita a kwa vuwa, ''Tolaviya, madu vo dainiya na kwa taucoko, madu tekuciko. Na cava e qai lemadou?'' ²⁸ A kwa vuwadru o Jisu, ''Aqu vo kwa vaijina vuwako mutou, o mutou mutu vo tekuciko au , ni vo yaco na vi vadodonutaki, ni vo no na Luve ni Tamata ina nono vaturaga ni leya i ukuuku, mutu na qai no muni i nai nono vaturaga e jinikaruwa, me lewaidru na mataqwali Isireli e jinikaruwa. ²⁹ kiya yakiya e daniya na were, se na vitacini, se o gwaneya, se la momo,se la nene, se o luveya se nai vunau, e vuku qu yaca, e yadrau e rewajiya e na taukeinijiya na cola tawa mudu. ³⁰ Eru lewe levu eru simata eru na bere, qeinidru eru bere eru na simata.