¹ E vo kila jiya na turaga niru vo varogo na Farisi niru vo levu e va lotutaki nidru o Jisu a vavitaisotaki a ru lailai ga o Joni, ² [e vo tasi vi vavitaisotaki o JISU o rau ga la tisaiveli,] ³ a vo daniya o Jutia, a la tale i Kalili. ⁴ A vo no la calevu i yaloga ni vanuwa o Samaria. ⁵ A vo cava i na kiya na rara i Samaria, e yaca o Saika, e voleka na jiki ni vanuwa a soliya o Jekope vuwa o Josefa o luveya. ⁶ A vo no tu mai ke lai keli wai o Jekope.Ni vo wale o Jisu na yato, a vo mai no i na baji ni keli wai: a vo voleka na ka i ka ono ni auwa. ⁷ A la mai e kiya na lewa ni Samaria me taki wai: a kwa vuwa o Jisu, soliya mai voko au mequ somu. ⁸ Ni ru vo la na leya tisaiveli i rara meru lai voli cawa. ⁹ A qai kwa vuwa na lewa ni Samaria, ni o vo ja kwao Jutia, o kereviya va cava voko au mo somu, niqu jiya lewa ni Samaria? [niru tasi vi riji o rau na kwai Jutia, qei nidru na kwai Samaria.] ¹⁰ A tata o Jisu a kwa vuwa, kodaki o kila jiya na i solisoli ni Kalou, o keya muni a kwa vuwako, soliya mai voko au mequ somu; o qai kereviya vuwa, e qai soliya vuwako o keya na wai cola. ¹¹ A kwa vuwa na lewa, e jikai, na lemu i kalokalo, e nubu na i keli- wai: o vo rewa jiya mai vai na wai ni cola iqoi? ¹² o vo oka cake sara mai vo Jekope, na lemadu momo, o keya a soliya vuwako madou na i keli- wai, a somu ke o keya, o rau o luveya, qei nidru na leya manumanu? ¹³ A tata o Jisu a kwa vuwa, o keya yakiya e somiya na wai kwe e na mata somu tale; ¹⁴ o keya e somiya na wai qu soliya vuwa, e na tasi mata somu tale me tawa mudu; na wai qu na soliya vuwa, e na no tu e yaloga me mata-ni-wai tovure i na cola tawa mudu. ¹⁵ A kwa vuwa na lewa, soliya, mai voko au na wai i qoi, mequ kuwa ni mata somu, se o la mai mequ taki. ¹⁶ A kwa vuwa o JISU, lai coviya mai na lemu teigwane, me muru la mai i kei. ¹⁷ A tata na lewa, a kwa, e jikai na lequ teigwane. A kwa vuwa o Jisu, o kwa djina, e jikai na lemu teigwane; ¹⁸ eru lima lemu teigwane i mata; o keya muru no vata i kwe e tasi lemu: o vo tata djina i na kwa i gi. ¹⁹ A kwa vuwa na lewa, a qu vo qai kila jiya, e kiya na parofita o iko. ²⁰ A ru dau soro na lemadu qase i na yataga i kwe; mutu kwa, e no mai Jerusalemi e jiki e dodonu medu soro ke. ²¹ A kwa vuwa o Jisu, lewa, va djina jiya na lequ tata: e na la mai na gauna mutu na jikai ni lotu ke vo tamaqu, i na yataga i kwe, se mai Jerusalemi. ²² Mutu lotu vuwa mutu tasi kila jiya: madu kila jiya o keya madu lotu vuwa e tubu mai vuwadru na kwai Jutia na i va cola. ²³ E na la mai na gauna, a cava mai, e ru na lotu va yalo ka vai djina vuwa o tamada o rau na lotu djina, e vadania o tamada me kodaki i kwe orau na lotu vua. ²⁴ E yalo na kalou: o rau eru lotu vuwa, e dodonu meru lotu va yalo ka vai djina. ²⁵ A kwa vua na lewa, o vo kila jiya ni na la mai na Mesaia, [o kea e lai kawai na Karisito]: ni vo la mai o keya , e kwa vuwako datou na kwa taucoko ga. ²⁶ A kwa vuwa o jisu, o yau ga qu kwa no vuwako. ²⁷ Aru qai la mai na leya tisaiveli, e kara cidru ni ru vi tukutuku qai niya na lewa: e jikai ni kiya na tamata e tarogiya, Na cava o vadaniya? se o vi tukutuku qaneya ina vuku ni cava? ²⁸ E qai dei niya lai kalokalo na lewa, a la yaji i rara, a kwa vuwadru na tamata. ²⁹ Mutu bau la mutu lai daniya na tamata, o keya e kwa mai vuwako yau na kwa taucoko ga qu vaveya; o keya ikwe na karisito,se jikai? ³⁰ Aru qai la dai yaji i rara, aru la vuwa. ³¹ Ni si bere mai, aru qai marejiya na tisaiveli, aru kwa, va vuvuli mo kana re. ³² A kwa vuwadru o keya, E vo no tu na kwa mequ kaniya, mutu tasi kila jiya. ³³ A qai va rogo jidru na tisaiveli, e bau kiya na tamata e kau mai na kwa vuwa? ³⁴ A kwa vuwadru o jisu, na kequ vata na mequ, mequ na vaveya e yaloga o keya e vatala jiko yau mai, mequ vadevu niya na leya cakacaka. ³⁵ A mutu tasi kwa, e vo e va na vula, me qai cava na yabaki? daniya, a qu kwa vuwako mutou, mutu mata cake, mutu daniya nai teitei e voleka ni makuga na yabaki. ³⁶ O keya e musukiya e na saumi, e koro niya e vuwa i na cola tawa mudu; meru marau vata o keya e kabu raki niya qei niya o keya e musukiya. ³⁷ E djina ke nai tukutuku i kwe, e kiya e kaburaki niya e kiya e musukiya. ³⁸ A qu kwa vuwako mutou mutu musukiya na kwa mutu tasi cakacaka ke: e yavalu eru cakacaka ke: mutu vo rewa jiya na vuwa ni ledru cakacaka. ³⁹ E ru levu na kwai Samaria ina rara igi eru vabau jiya na vuku ni leya i tukutuku na lewa, o keya e vatakeya, a kwa mai vuwakoyau okeya na kwa taucoko ga qu vaveya. ⁴⁰ Ni ru vo la mai na kwai Samariya, aru masu jiya me nokoto ga mai kei igi me bogi ruwa. ⁴¹ A ru levu muni aru vabau jiya me bale jiya na leya i tukutuku; ⁴² aru kwa vuwa na lewa, i qoi madu tasi vabaujiya bale jiya na lemu tata ga: madu vo varogo o madou, madu kila jiya ni okeya djina i kwe na ledru i vacola na kwai vuravura. ⁴³ Ni vo devu e ruwa na bogi a vo ladai mai kei gi o keya, a cava i Kalili. ⁴⁴ A vata keya o jisu, e vo jikai na profita e dokai la vanua. ⁴⁵ Ni vo la mai kalili keya, aru vacegu niya orau na kwai kalili,bale jiya niru daniya na kwa taucoko ga e vaveya o keya mai Jerusalemi i na soqo, niru la muni o rau i na soqo. ⁴⁶ A vo la tale mai o Jisu i Kena i Kalili, na rara a vukiciya ke na wai me waini. A kiya na turaga a tauvi mate o luveya i Kepanaumi. ⁴⁷ A vo varogo o keya ni la mai Jutia o Jisu i Kalili, a la vuwa, a masu jiya me la bale mai me va cola niya o luveya; e vo voleka ni mate. ⁴⁸ A kwa vuwa o Jisu, kodaki mutu tasi daniya e yavalu na kwa mana qei niya na kwa e vivakurabuitaki mutu na tasi vabaujiya. ⁴⁹ A kwa vuwa na turaga, la bale mai, ke mate o luvequ. ⁵⁰ A kwa vuwa o Jisu, la yaji; e vo cola o luvemu. A va djina jiya na tamata na kwa e kwa o Jisu, a la yaji o keya. ⁵¹ Ni vo la bale no, a ru vo la mai tavaki niya na leya tamata, a ru tukutuku vuwa, a kwa, e vo cola o luvemu. ⁵² A qai tarogidru o keya na auwa a tekivu me cola ke o keya. a ru kwa vuwa, a vo la dai na katakata ni yavi na i ka vitu ni auwa. ⁵³ A kila jiya ke o tamaya na yauwa sara ga a kwa ke vuwa o Jisu, e vo cola o luvemu; a vabaujiya o keya, qei nidru na leya vu were. ⁵⁴ I kwe tale na i karuwa ni kwa mana e vaveya o Jisu, ni la mai i Jiutia i Kalili.