¹ A qai kwa na bete levu, e kodaki igi na kwa ikwe, se jikai? ² A qai kwa o keya, o mutou na vi wekani, qeiniko mutou na qase, mutu varorogo re: na Kalou vaiukuuku e la mai i mata vuwa na ledu qase o Aparama, no nokoto mai Mesopotemia, a nokoto i bere i Karana, ³ a kwa vuwa, la dai na lemu vanuwa, mai vuwadru o wekamu, no la ina vanuwa qu na vatakeya vuwako. ⁴ A qai la dai o keya mai na vanuwa o Kalitia, avo lai nokoto i Arana: nivo mate o tamaya avo meiya dai mai ke na Kalou, a va numiya ina vanuwa ikwe, mutu qai nokoto ke. ⁵ A tasi soliya ke o keya vuwa e kiya e jiki me taukeni jiya, e jikai me butukiya e la: e talatala ga vuwa me soliya me taukeni jiya, vuwadru muni la kawa, ni jikai na leya i luve. ⁶ A kwa kodaki ikwe na Kalou: niru no va vunilagi na leya kawa ina vanuwa e jikai ni ledru; eru na vabobulataki nidru, eru na va vararawataki nidru, me vanadrau na yabaki. ⁷ A kwa na Kalou, na matanitu eru na bobula ke, qu na lewaiya; e devu, eru na qai ladai mai, me qwaraviko au ina vanuwa ikwe. ⁸ A soliya vuwa na vuwa na viyalayalaji ni vicili; o tamaya o Aisake o keya, avo bogi walu a qai ciliviya o keya: e tamaya o Jekope o Aisake: o tamadru na qase jinikaruwa o Jekope. ⁹ Ni ru vo tokomata jiya o Josefa o rau na qase ikwe, eru volitaki niya ke i Ijipita: e no qaneya no na Kalou. ¹⁰ a vacola niya mai na leya rarawa taucoko ga, a soliya vuwa me oka me vuku e mata o Fero na tui Ijipita: a lesiya me kovana me lewaiya o Ijipita qeinidru taucoko ga na leya mata vuwere. ¹¹ A qai lamai na dausiga qeiniya na rarawa levu ina vanuwa taucoko o Ijipita qei niya o Kenani, a vo jikai na ledru na ledu qase. ¹² Nivo varogo o Jekope a notu mai Ijipita na sila, a qai vatalajidru ke na ledu qase. ¹³ Na leya la varuwa a vata keya o Josefa vuwadru na laya tutuwa: a vatakeya na leya mataqwali o Josefa vuwa o Fero. ¹⁴ A qai lai vatala o Josefa, me lai covi o Jekope o tamaya, qei nidru muni na leya mataqwali, eru vitu sagavulu na kedru ka lima na kedru levu. ¹⁵ Avo labale i Ijipita o Jekope, avo mate, o keya qeinidru na ledu qase. ¹⁶ Aru kau i Sikeni, aru lai bulu ina i bulubulu a voliya o Aparama ina jiki ni Siliva vuwadru o luveya o Emori mai Sikeni. ¹⁷ Nivo voleka na gauna e yaco ke na tata ni talatala, a bubului ke na Kalou vo Aparama, ¹⁸ aru qai tubu na tamata meru levu mai Ijipita, me yacoviya me buli ke e kiya na tui, e tasi kilajiya o Josefa. ¹⁹ A qai lawaki jidru o wekaya o keya ikwe, a vabura nidru na ledu qase, meru dai nidru ke i rara o luvedru, meru kuwa ni vacola. ²⁰ A qai sucu o Mosese na gauna igi, a mata oka sara, a susu vula tolu la were o tamaya. ²¹ Nivo dai i rara o keya, a roqojiya mai o luveya o Fero na lewa, a susugiya me niya o luveya. ²² A vo va vulici o Mosese na ledru vuku taucoko ga nakwa Ijipita, a kaikai na leya tata qei niya na cakacaka. ²³ Nivo vasagavulu na leya yabaki, a qai lamai ve yaloga me lai danidru o wekaya o rau na luve ni Isireli. ²⁴ Nivo daniya e kiya ni vo va vararawataki, avo kodaki niya, a ocajiya o keya evo vararawataki, a yavijiya na kwai Ijipita: ²⁵ a numiya o keya niru kilajiya o wekaya e lima e na vacola nidru ke na Kalou: eru tasi kilajiya. ²⁶ Na qwata a danidru ke e u ruwa niru vivala, a oka jiya me vaoka nidru tale, a kwa, o muru na turaga, mutu viwekani ga: na cava muru vi buraji ke? ²⁷ "Avo biliya dai o keya a vaburaniya o wekaya, a kwa, o cei a lesiko mo mai lewaiko madou? ²⁸ O mata vamateniko au, me kodaki na lemu va mateniya na kwai Ijipita ni yavi?' ²⁹ A qai tuba o Mosese na vuku ni tata igi, avo lai vunilagi no ina vanuwa o Mitiani, a lai sucu ke e ruwa o luveya na teigwane. ³⁰ Nivo devu e vasagavulu na yabaki, a qai lamai vuwa e kiya na agilosi ni turaga, ina yataga o Saineai, ina mudremudre ni quto ve kiya na vuni kai. ³¹ Nivo daniya o Mosese, e karaciya na kwa e daniya; mo toroviya me vadaniya, e cava mai vuwa nai tukutuku ni Turaga, ³² O au na ledru Kalou na lemu qase, 'na Kalou o Aparama, la Kalou o Aisake,qei niya la Kalou o Jekope.' Avo saqanini o Mosese, nivo mataku ni vadaniya. ³³ "A qai kwa vuwa na Turaga, 'Luva jiya dai na lemu i vava mai ve mu la: ni vo jiya qwele tabu na vanuwa o nokoto ke. ³⁴ Aqu daniya sara ga na ledru rarawa na lequ tamata eru nokoto mai Ijipita, qu varogo na ledru vutugu; io quvo labale mai mequ vacola nidru; io ikwe, no la, qu na vatala jiko mo la i Ijipita.' ³⁵ O Mosese ikwe eru dau burajiya, aru kwa o cei e lesiko mo Turaga mo lewaiya? o keya ga ikwe a vatalajiya na Kalou me jiya turaga me jiya i vacola e lima na agilosi laidani mai vuwa na vuni kai. ³⁶ Avo meidru yaji o keya, nivo vaveya devu e yavalu na kwa e vakaraciko datou vata na vivatakei ina vanuwa o Ijpita, qeiniya na waitaci dradra, qeiniya na vikaikai, na yabaki vasagavulu. ³⁷ "O Mosese ikwe o keya a kwa vuwdru o luveya o Isireli, ina vatu niya vuwako mutou o Jiova na lemutu Kalou, mai vuwadru o wekamutou, e kiya na parofita me kodaki o au.' ³⁸ O keya ikwe, e no qanedru nai soqosoqo ni soro ina vikai, qeiniya agilosi a kwa vuwa ina ulu ni yataga o Saineai, qeina ledu qase: e rewa jiya o keya nai vunau cola me soliya vuwako datou. ³⁹ Aru duwa ni varogo vuwa na ledru qase, aru biliya dai vuwadru, avo suka tale eru yalo i Ijipita. ⁴⁰ Aru kwa vuwa o Eroni, vaveya e kiya na ledu Kalou me simata taki niko datou: O Mosese ikwe, o keya a meiko datou mai na vanuwa o Ijpita, edu tasi kilajiya se na cava e yaco vuwa. ⁴¹ Aru vaveya e kiya na luve ni bulumakau na gauna igi, aru va caboniya nai soro me mataku, aru marautaki niya na ledru cakacaka ni liga. A qai vuki dai na Kalou, a qai dainidru tu meru qwaraviya tu navi kalokalo ni lomalagi, me kodaki na kwa e volai na ledru i vola na parofita, ⁴² O mutou na mataqwali i Isireli, mutu vacaboniya vuwako au na manumanu evo mate, qeiniya nai madrali, ina vikai me yabaki vasagavulu, se jikai? ⁴³ Io mutu vo dagiya la were o Moloke, qei niya la kalokalo ni lemutu kalou o Remifani, na mataku mutu vaveya me mutu soro ke: Io qu na meiko mutou yaji me sivi o Papiloni. ⁴⁴ Evo notu ga vuwadru na ledu qase i na vikai na were ni Kalou e noke nai vunau, e kodaki ni tata o keya, a kwa vo Mosese, me vaveya me kodaki na keya i vatakarakara e daniya. ⁴⁵ O keya muni e qulu miya i bere na ledu qase, aru qai kau mai o Josua ina ledru vanuwa na vimatanitu, o rau eru roviya na Kalou ve ru mata na ledru qase, me yacoviya la gauna o Tevita, ⁴⁶ o keya e daniya na loloma vuwa na Kalou, a kereviya me leya i tavi e kiya were leya o keya la Kalou o Jekope. ⁴⁷ Ia o Solomoni ga e vaveya na were me leya. ⁴⁸ "E tasi nokoto o keya e yawa i yata sara ina were e vai na lima; me kodaki na tata ni parofita, ⁴⁹ Na lequ i nono va turaga o lomalagi, qeiniya kai tutu qu la o vuravura: Na were cava mutu vaveya me lequ? e tarogiya o Jiova: se e jiki cava me lequ i vavacegu? ⁵⁰ E tasi vaveya na kwa taucoko iqoi qu lima?' ⁵¹ "O mutou na yalo kaikai, e tasi cili mutu yalo qei niya mutu bebe, mutu vo vorajiya no ga na Yalo Tabu; o mutou mutu vo vaveya me kodaki o rau na lemutu qase. ⁵² O cei vuwadru na parofita eru tasi va bura nidru na lemutu qase? aru vamatenidru o rau eru kwa i mata ni na lamai o keya na yalo dodonu; o keya mutu qai soliya yaji me mutu vamateniya: ⁵³ avo soli vuwako mutou nai vunau nivo kwa na agilosi, a mutu tasi vabaujiya." ⁵⁴ Niru vo varogo na kwa ikwe, e lai suwa eru yalo, aru vagudrugudru baji vuwa. ⁵⁵ O keya nivo vuqa ina Yalo Tabu, a tola makuga i lomalagi, a daniya nai ukuuku ni Kalou, qeiniya o Jisu ni no ina lima matau ni Kalou, ⁵⁶ a kwa, daniya, aqu vo daniya nivo wase ruwa na lomalagi, avo wavu tu na luve ni tamata me lima i matau ni Kalou. ⁵⁷ Aru qai kulakula ina domo levu, aru sogojiya eru qwara ni bebe, aru wavu vakaikai vuwa niru yalo vata. ⁵⁸ Aru dainiya ina i bili ni rara, aru vaviri kiya ina vatu; o rau aru bilitakiniya, eru biujiya bale na ledru i sulu ve la e kiya na suravou, e yaca o Saula. ⁵⁹ Aru vaviri kiya o Sitiveni ina vatu, a masu no, a kwa, "O mutou na taga o Jisu, qulumiya qu yalo." ⁶⁰ A jikituru o keya a coco ina domo levu, "O mutou na Turaga, kuwa ni ocajidru nai valavala ikwe." Nivo tata devu kodaki ikwe, a qai moce.