¹ Ia ni vo oki na ue, vo covidru na lotu o Paula, avo tatau, ea biubiu yaji me la i Masitonia. ² Ia ni vo la oji vena yosa igi, qai vavulicidru valevo, ru vo qai lai Kirisi, ³ Aru vo no ke ru qai vula tolu. Io niru vo bukijia na kea vere o kuru no jiu, niru vo varau soko i Siria, vo nakijia o kia me lavidru tale o Masitonia e lea lesu tale. ⁴ Aru vo qai la qaneya i Esia o Sopatero na kwai Peria; vata o Arisitaki, Sedudu, o kuru no kwai cesalonaiko; vata o kelo na kwai Tapi, vata o Jimoci:Jikiko, Jinofimo, o kuru na kwai Esia. ⁵ O kuru ikwe ru vo lai mata ru qai waciko datou mai Tiroa. ⁶ Ia, nivo oji re na gauna ni kana madrai tawa leveni, madu vo qai soko yaji i Filipai, madu qai bogi lima madu vo qai talevidru i Tiroa; madu vo no ke e bogi viru. ⁷ Ia na matai ni siga ni wiki, ni ru vo soqoni vata o kuru na lotu meru dovi madia, vo vunau vuadru o Paula, ni vo varau la na qwata; Avo vunau no niva bogi na vanua. ⁸ Avo levu na sino inai taba ni yaloga ni wer iyata, madou madu vo soqoni vata ke. ⁹ Avo kia na Suravou e yaca o utiko, vo no voleka ina mataniwere iyata, a vo moco lutu sara; ia ni vo vunau balavu o Paula, vo vodokia na mata moce, avo lutu mai na kotolu ni taba were, io na gauna e laveji cake ke avo mate tu. ¹⁰ Avo labale sara yaji o Paula avo dara sara i yataga, qai okovia, qai kwaya, mutu kua ni mataku; nivo no qaneya e yalo. ¹¹ Ia niva lacake o kia, qai dovi madrai, ro qai kano, aru vo vitalanoa balavu, vo qai kida mai na qwata, vo qai la talo yaji o kia. ¹² Aru vo meia mai na tamata nivo colo, aru vo vacegui valevu. ¹³ Ia madu qai Simata yaji me madu lai vokokia no waqa, madu qai soki i Aso, ni madu vo numia ni mai vavodoki o Paula, vo kodaki ikwe na lea lewa, nivo mata taubale o kia. ¹⁴ Ia ni madu vo sota qaneya mai Aso, madu vo vavodonia, me yaco i Mitilini. ¹⁵ Ia ni madu vo soko dei yaji, me yaco i Kio na siga taravia; me bogi kia, madu vo yaco i samo; me kia tale na bogi, madu vo qai yaco i Milito. ¹⁶ Nivo yaco oji na lea lewa o Paula me balejio na soko i Efeso, me kua ni no bolovu mai Esia; ni vo variri, kodaki a rewa vua, me no tale re mai i Jerusalemi vo qai yaco na siga ni Penijiko. ¹⁷ Avo lai vatala mai Milito i Efeso, me lavidru no qase ni soqosoqo lewe ni lotu. ¹⁸ Ia ni ru vo yaco vua, vo qai kwaya vuadru o kia, mutu vo kilojia na lequi valavala na sisiga taucoko niqu a no qainikomutou, vo tekivu mai na matai ni siga qu a la ke i Esia. ¹⁹ Niqu a qwaravia na Turaga ina yalo e malumalumu, qai levu qu wai ni mata, vata na dauvere ea yaco vuako au niru vo buki qau voio o kuru na Jiu. ²⁰ Niqu vo tasi motaku mequ tasi kwaya ke e kia na kwa e yaga vo kemutou, qu vavulici kemutou, mi mutu a sosqoni vata, ina viwere talega. ²¹ Niqu vunautakinia no vuadru no Jiu, vuadru lologa na vimatanitu tani, na vivutuni vua na kalou, vata na vabaujia na ledu Turaga o Jisu Karisito. ²² Aqu vo qai lo yaji i Jerusalemi nivo uqejiko au qu yalo, niqu vo tasi kilajia na cava ena yaco vuako au. ²³ Iqio ga na kwa eva vatakilakilatakinia vuako au na Yalo Tabu ina virora taucoko, qu qai kwaya vo waciko au na ivesu vata na rarawa. ²⁴ Ia qu vo tasi numia sara na lequ cola, me kwa talei vuako ou mequ voojinia ga na lequ cakacaka vata na itavi ea solia mai vuako au na Turago o Jisu, mequ vakilakilatakinia na itukutuku oka ni loloma ni Kalou. ²⁵ Mutu tolvia, aqu kilajia mutu na tasi tolavia tale qu mata, o kemutou taucoko qu a la qionikomutou, du qai vunautaki nia na matanitu. ²⁶ O kia g ikwe qu vo vadjinadjinatokinia vo kemutou na siga ikwe, niqu tasi colo ina vuku ni kia eva lai ocaji. ²⁷ Niqu vo tasi matoku na kwakwa vo kemutou na lama ni Kalou taucoko. ²⁸ O kia ga ikwe me mutu va danikomutou, vato o kuru talega na qwolo ni sipi, vo valesini kemutou na Yalo Tabu me mutu ledru ivatawa, me mutu va konidru na soqosoqo lewe ni latu ni Kalou; o kuru eru vo voli ina lea dra takio ga. ²⁹ Niqu va kilajia ikwe, niqu na vo la oru na qai unu mai vo lemutou e vica na walifa bura; eru na tasi lomanidru na qwele ni sipi. ³⁰ Eru na tubu cake talega e vica na tamata mai vo kemutou, eru na tata takinio e vica na kwa e vivacalai, meru marojidru na vo lotu tu meru tekucidru. ³¹ O kia ikwe me mutu qai vatawa, me mutu qai numia nivo talu na yabaki niqu vo tasi cegu rewa na vunaujikomutou taucoko na siga vata na bogi, vo qai vawai no qu mata. ³² O kemutou na viwekani, qu va qai tatautaki ni kemutou vua na Kalou, vata no lea tata ni loloma o kia vo rewajia me kodaki o kemutou me solia vo komutou me mutu va ivotavota vato qai nidru na vasavasavataki. ³³ Aqu vo tasi kocovia na siliva, se na koula, se kio na isulu ni tamata. ³⁴ Mutu vo kilajia talega, nivo dau cakacaka talogo qu lima ikwe, me vica na kwa e yaga vuako au, vuadru talega na vo no qai niko no au no. ³⁵ Ina kwa taucoko qu vo vakilakilatakinia vo kemutou, nivo kilikili me mutu daucakacaka kodaki ikwe me mutu vukeidru na vo malumalumu, me mutu numia talega na lea kwakwa na Turaga o Jisu, nivo kwaya, Ero kwa ni vivakalougatataki na soli kwa, me valailai ga na ciqomia no kwa. ³⁶ Ia nivo oji lea kwakwa ea vo qai lekidruru, qai masu qainidru yakia. ³⁷ Aru vo qai tagi taucoko, meru qai okovia o Paula, ru qai kisivia taloga. ³⁸ Eru vo qai oca valeru ru talo na vuku ni tata ea kwaya o Paula, niru na vo tasi dania tale. Aru vo qai lai vitalatala qainidru ina waqa.