¹ Iya vo rassi yaga mequ volavola vuato mutuou, na viwekani, mequ kwaya na vigauna vata na viyabaki. ² Ni mutu vo kilajiya sara no vai niko mutou ni na la mai na siga ni Turaga, me kodaki na dau driva i vibogi. ³ Ni ru kwaya no, ni vo mai no vacegu, bata e vo no oka, ena qai yaco vasauri na vuadru na Xusa, me kodaki na rarawa vua yalewa bukete:aru vo tasi tuba rewa. ⁴ Iya o kemutou na viwekani, mutu vo tasi no vena logilo, me yacoviko mutou ke na sina igi me kodaki na daudriva. ⁵ O mutou taucoko na luve ni kakarama, vata na luve ni siga: edu vo tasi luve ni bogi, se luve ni logilo. ⁶ I kiya ikwe medu qai kua ni moce, me kodaki o kuru na e cola kanikia, medu vatawa ga medu yalomatua. ⁷ Iya o kuru eru dau moce vibogi, vata o kuru na dau mateni eru dau mateni na vi bogi. ⁸ Iya okedatou, edu luve ni siga, medu yalomatua, medu maroroijiya na vabaujiya vata na loloma mu tataqomaki redu saro:vata na namabjia na cola mei varuru du ulu. ⁹ Ni tasi solia vuako datou na Kalou medu rusa medu rewajia ga na cola ina vuku ni ledu Turaga o Jisu Karisito. ¹⁰ O kiya a mate e vuku datou, madu cola vata qeya, ni du yadra se du moce. ¹¹ Okiya ikwe me mutu iya na vivacegui vai niko mutou, rata na vitaraicake niko mutou vai niko mutou me kodaki mutu dau vavea no. ¹² Iya madu vo vama sujiko mutou na viwekani, me mutu kilajidru na re na dau cakacaka vuako mutou, vata a lewaiko mutou ina kwa ni Turaga, vata a vavuliako mutou. ¹³ Me mutu dau varokorokotaki nidru, vata me mutu lomanidru valevu sara, ina vuku ni cakacaka. Vata me mutu viokaji vainiko mutou. ¹⁴ Iya madu vo varojiya vuko mutou na viwekanime mutu vunaucijidru o kuru na tasi dau va rorogo, vacegu nidru okuru na yalolelai, vukeidru na malumalumu, dau vosojidru tauco koga na e cola. ¹⁵ Dania me kua ni kia e dau viso somi takiniya na bura vua ekiya, me mutu kala tekuciya noga na kwa oka vuako mutou yakiya, vuadru muni na e cola taucoko. ¹⁶ Mutu marau noga. ¹⁷ Mutu masu noga me kua ni cegu. ¹⁸ Mutu iya na va okaoka in a buku ni kwa taucoko ga: ni ro loma ni Kalou ikwe vuako mutou ina vuku o Karisito Jisu. ¹⁹ Mutu kua ni boko ciya na Yalo Tabu. ²⁰ Mutu kwa ni beciya na tata ni parofisai. ²¹ Vatavolia na kwa taucokoga: qulumia vaoka sarana kwa e oka. ²² Qarauniko mutou mai na valavala taucoko e bura. ²³ Iya me vacaba savataki niko mutou sara na Kalou ni vivacegui: vata me vo maroroi taucoko, me kua sara ni cala, mutu yalo vata mutu yaloga qai niya mutu yago, me ya covia na siga ena la tale mai ke na ledu Turaga I Jisu Karisito. ²⁴ E vo djina o kiya a coviko mutou, ena vavea muni o kiya. ²⁵ O mutou na viwekani, masulakiniko datou ²⁶ Mutu loloma vuadru taucoko na viwekani vata mutu viyabo ena yalo savasava. ²⁷ Au vo vavojia vuako mutou ina yaca ni Turaga, me wili na ivola ikwe vuadru taucoko na viweka ni yalo savasava. ²⁸ Me lemutou na loloma ni ledu Turaga o Jisu Karisto. Emeni.