¹ O madou ikwe o Paula, o Silivenuse, vata o Timoci, ina ledru i soqosoqo lewe ni lotu na kwai Cesolonaika o rau evo nokoto no vuwadruga Kalou o Tamadatou, vata na Turaga o Jisu Karisito. Me lemutou na loloma, qaneya na vacegu mai vuwa na Kalou o Tamadatou, qaneya o Jisu Karisito. ² Madu vaokaoka no ga vuwa na Kalou me balejiko mutou taucoko ni madu a dau cavujiko mutou no ina lemudu masu. ³ Madu jikai ni cegu ni numiko mutou no ina lemutu daucakacaka ina vabaujiya, vata na lemutu dau wale ina loloma, qaneya lemutu dauvosojiya ina nuinui vuwa na ledu Turaga o Jisu Karisito, e mata na ledu Kalou o Tamadatou. ⁴ Ni madu a kilajiya na lemutu a djigitaki, o mutou na viwekani, e daulomaniko mutou na Kalou, ⁵ e jikai boto ga ni yaco vuwako mutou na lemadu i tukutuku oka ina tata boto ga, ina kaikai muni qaneya na Yalo Tabu, evo vadjinadjina taki valevu, ni mutu vo kilajiya no na lemadu i valavala me balejiko mutou ina gauna madu no qaneko mutou ke. ⁶ Ia mutu dauvatekuteku ciko madou, qaneya na Turaga ni mutu a vabaujiya na kwakwa ina vivararawataki levu, vata na reki ina Yalo Tabu. ⁷ Mutu a yaco ke mo mutu jiya i varau taucoko eru dauvabaujiya mai Masitoniya qaneya i Akaia. ⁸ Ni vo rogotaki yaji vuwako mutou na kwakwa ni Turaga i Masitoniya qaneya i Akaia, avo jikai ni niya ga igina, a yaco muni yaji nai rogorogo ni lemutu vabaujiya na Kalou ina viyasana taucoko, e jikai ni yaga i vuwako madou me madu kwa e kiya e kwa. ⁹ Niru vo kwa ga o rau me balejiko madou ga ina lemadu i varau ga madu lai nokoto no yaji ke i vuwako mutou, no mutu vo vuki dai mai vuwadru na matakau vuwa na Kalou, o mutu qwaraviya na Kalou colo e djina, ¹⁰ mo mutu waciya muni lai luve mai lomalagi evo va tucake tale mai na mate o keya, o Jisu, o keya a vacoli niko datou mai na oca e bere no mai.