¹ Nao namba faev enjel i mekem nois long trampet blong hem. Nao mi luk wan sta we i kamaot long heven we I bin foldaon i kam long wol. Sta ia i karem ki blong openem bigfala hol we i go daon we i go daon. ² Hem i openem bigfala hol ia, mo smok we i kamaot long hem i olsem smok we i kamaot long wan bigfala faea. Tudak i kavremap ples san mo skae i blak lo smok ia. ³ Nao i gat ol bebet olsem grashopa we oli save kakae lif oli kamaot long smok ia mo oli kam daon long graon, oli gat ol paoa olsem skopion blong wol ia. ⁴ Oli talem long olgeta se bambae oli no spolem ol grass mo eni grin plant mo wud long graon ia, be oli save spolem ol man nomo we oli nogat mak blong God long foret blong hed blong olgeta. ⁵ Mo oli blokem olgeta blong oli no kilim ol man ya, be blong panisim olgeta blong faev manis. Bae harem nogud blong olgeta i olsem we wan skopion i stikim olgeta long posen blong hem. ⁶ Mo long taem ia bambae ol man oli lukaotem blong ded be bae oli no save faenem. Be oli wantem tumas blong ded, be ded bae i ronwei long olgeta. ⁷ Ol grashopa ya oli olsem ol hos we oli stap redi from wan bigfala faet. Antap long hed blong olgeta i olsem wan hat blong king we gol i stap long hem, mo fes blong olgeta i olsem fes blong man. ⁸ Hea blong olgeta i olsem hea blong ol woman, mo tut blong olgeta i olsem tut blong laion. ⁹ Mo oli gat ol ayan we i olsem ayan blong kavremap jes, mo nois blong wing blong olgeta i olsem nois blong ol hos we i ron wetem jariot blong go long wan bigfala faet. ¹⁰ Tel blong olgeta i olsem tel blong skopion we i gat posen long hem, mo long tel blong olgeta oli gat paoa blong kilim ol man blong faev manis. ¹¹ Oli gat wan king blong olgeta we hem i wan enjel, enjel ia i enjel blo hol we i go daon we i go daon olgeta. Nem blong hem long Hibru hemi Abadon, mo long grik lanwij hem i Apolion. ¹² Mo bigfala trabol ia i pass. Luk! Bihaen long hemia bambae i gat tu disasta bakeken bae i kam. ¹³ Nao namba siks enjel i flu long trampet blong hem, mo mi harem wan vois i kamaot long hon blong olgeta ia we oli mekem long gol i stap long foret blong God, ¹⁴ mo vois ia i talem long namba siks enjel ia we i holem trampet ia se, "Yu lego ol fofala enjel we oli fasem olgeta long bigfala riva ia Eufrets i go." ¹⁵ Ol fofala enjel ia oli bin redi from haoa ia, dei ia, manis ya, mo yia ia from bae oli rilisim olgeta blong oli kilim haf blong ol man oli ded. ¹⁶ Namba blong ol soldia long baksaet blong hos hem i 200,000,000. Mi mi harem namba blong olgeta. ¹⁷ Hemia nao hem i olsem wanem we mi mi luk ol hos ia long visen blong mi mo olgeta we oli ron long hem: Ayan we i blokem jes blong olgeta oli red we oli red, oli dak blu mo yelo olsem salfa. Ol hed blong olgeta i olsem ol hed blong laion,mo faea, smok, mo salfa i kamaot long maot blong olgeta. ¹⁸ Ova 66,000,000 man oli ded long trifala trabol ia: faea, smok mo salfa we i kamaot long maot blong ol hos ia. ¹⁹ From paoa blong ol hos ia i stap long maot mo tel blong olgeta-from tel blong olgeta i olsem snek, mo oli gat ol hed we oli save mekem ol bigfala soa long bodi blong ol man. ²⁰ Be ol narafala man,we oli no ded long trabol ia, oli no ripen long ol nogud blong olgeta we oli mekem, oli no stop blong prei long ol devel mo ol gods blong gol, silva, brons, ston mo wud-ol samting we oli nosave lukluk, harem mo wokbaot. ²¹ Mo tu oli no ripen long ol sin blong olgeta we oli kilim ded man, oli stap karem ol posen,fasin blong stap wetem man mo woman mo oli stap stil.