¹ Mi luk wan nara enjel i kamdaon long heven we hem i gat strong paoa. Hemi werem klaod olsem klos blong hem, mo i gat renbo antap long hed blong hem. Fes blong hem i saen olsem san mo leg blong hem i olsem bigfala pos we faea i stap laet long hem. ² Hem i holem wan smol pepa we oli rolem, we i open finis long han blong hem. Hemi putum raet leg blong hem long solwota mo left leg blong hem long graon. ³ Nao hemi singaot long wan bigfala vois olsem wan laion. Taem hem i singaot olsem, ol sevenfala tanda ia oli toktok long ol saon blong olgeta. ⁴ Taem ol tanda ia oli toktok olsem, mi mi redi blong raetem wanem we oli talm, be mi harem wan vois i kamaot long heven i talem se, "Yu no talemaot wanem we ol sevenfala tanda ya oli talem. Yu no raetem daon." ⁵ Nao enjel ia we mi bin luk i stanap long solwota mo long graon hem i leftemap raet han blong hem i go antap long heven. ⁶ Nao hem i promes long Masta blong yumi we hem i stap oltaem gogo i nogat en blong hem, we hem i mekem heven mo evri samting we oli stap long hem, mo solwota wetem evri samting we oli stap long hem,mo enjel ia i talem se, "Bambae i nomo gat man i wet nao. ⁷ Be long dei ia we bambae namba seven enjel i redi blong i flu long trampet blong hem, mo plan blong God we hemi talem bae kamtru, olsem we hem i talemaot gud nius blong hem long ol wokman blong hem we oli ol profet." ⁸ Mo vois ia we i kamaot long heven hem i toktok long mi bakeken: "Yu go, tekem pepa we i stap long han blong enjel we hem i stanap long solwota mo long graon." ⁹ Nao mi go luk enjel ia mo talem long hem blong i givim smol pepa ia long mi. Hemi talem long mi se, "Yu tekem pepa ia mo yu kakae. Bambae i mekem bel blong yu i strong mo bambae i soa, be bambae i swit olsem hani blong sugabi long maot blong yu." ¹⁰ Nao mi tekem smol pepa ia we i stap long han blong enjel ia mo mi kakae. Hemi swit olsem hani blong sugabi long maot blong mi, be taem mi solem daon, bel blong mi i stat blong strong mo i soa. ¹¹ Nao wan man i talem long mi se, "Yu mas talem fiuja blong plante man, mo plante kantri, mo plante lanwij, mo plante king."