¹ Mi lukluk i go mi luk smol sipsip blong God i stap stanap long bigfala hil ia saeon. Hem wetem wan handred foti fo taosen man we oli raetem nem blong hem mo nem blong papa blong hem long foret blong olgeta. ² Mi harem wan vois i kam daon long heven we nois blong hem iolsem nois blong fulap wota mo wan bigfala tanda.Mo saon ia i olsem fulap man oli stap plei long ol gita. ³ Oli sing long wan niufala singsing i go antap long tron blong hem mo ol fo fala animol mo ol elda. Ol 144,000 man ia nomo we oli bin karem olgeta long wol i go oli save singsing ia. ⁴ Olgeta ia oli no ol man blong mekem fasin nogud wetem ol woman, be oli kipim laef blong olgeta i klin gud. Olgeta ia nao we oli stap folem smol sipsip i go evri ples hem i go. God hem i pemaot olgeta finis mo olgeta oli olsem ol fes frut we God i jusumaot se oli blong God mo smol sipsip blong hem. ⁵ I nogat wan kiaman i kamaot long maot blong olgeta; mo i nogat wan samting we i mekem olgeta oli doti long fes blong God. ⁶ Nao mi luk wan enjel i stap flae antap long skae,i stap talemaot gud nius ia i go long evriman we oli stap long wol- long olgeta kaontri,ol traep,ol lanwis,mo long evri man. ⁷ Hem i stap singaot wetem wan bigfala vois i se, "Yufala i mas fraet long God mo yufala mas givim glori long hem. From taem i stap kam kolosap we bae hem i jajem ol man. Yufala i mas wosipim hem, from nomo i mekem wol ia, solwota, mo ol spring blong wota." ⁸ I gat wan narafala enjel-wan seken enjel-i folem hem,nao i stap talem se, "i foldaon, bigfala taon ia Babilon i foldaon finis, hem i olsem rabis woman we i mekem fulap kaontri i dring waen long hem blong folem ol fasin nogud blong hem." ⁹ Wan nara enjel-hem i namba tri enjel-i folem olgeta, mo i stap talem long wan bigfala vois se, "spos eni wan we hem i wosipim krija ia mo pija blong hem mo i risivim wan mak long foret o long han blong hem, ¹⁰ Bae hem i dring sam waen blong kros blong God, waen ia we oli bin kavsaedem strong i go long kap blong kros blong God. Man we dring long kap ia bae hem i bonem hem long faea mo ol ston we i hot gud long foret blong ol holi enjel blong God mo smol sipsip. ¹¹ Smok blong faea we i stap go antap ia bae i stap gogo ino gat en blong hem, mo bae faea i bonem olgeta dei mo naet-olgeta we oli wosipim krija ia mo pija blong hem, mo evriwan we oli risivim mak blong nem blong hem. ¹² Hemia i wan singaot i go long yufala we i stap folem ol tok blong God,olgeta we oli stap kipim ol loa blong God mo fet blong olgeta i stap strong long Jisas." ¹³ Mi harem wan vois long heven i talem se, "yu raetem daon tok ia: Blesing i stap long olgeta we oli ded be long fasin we oli ded from masta." "Yes," spirit i talem se, "blong mekem se olgeta i save spel long ol bigfala wok we oli bin stap mekem, bae ol frut blong wok we oli bin mekem i folem olgeta." ¹⁴ Mi lukluk, mo mi luk wan waet klaod. Man we i sidaon antap long klaod ia i olsem pikinini blong man. Hem i gat wan hat we oli mekem long gol i stap long hed blong hem mo hem i stap holem wan huknaef long han blong hem. ¹⁵ Nao i gat wan enjel i kamaot long tempol ia mo i singaot wetem wan bigfala vois i go long man ia we i stap sidaon antap long klaod: "Yu karem huknaef blong yu mo stat havestem ol kakai long karen. From stret taem blong Havestem ol kakai i kam, ol kakae long wol ia oli raep finis." ¹⁶ Nao man ia we i stap sidaon antap long klaod i swingim hugnaef ia ova long wol, mo i havestem ol kakai long wol ia. ¹⁷ Nao i gat wan nara enjel i kamaot long tempol ia long heven;hem tu i gat wan hugnaef. ¹⁸ Be i gat wan nara enjel bakeken i kamaot long rum blong insens olta, we hem i gat ful paoa ova long faea. Hem i singaot long wan laod vois i go long man we i stap holem sap hugnaef ia, "Yu tekem hugnaef blong yu mo yu katem rop blong ol grep,ol grep ia oli raep finis. ¹⁹ Nao enjel ia i swingim huknaef blong hem long wol ia mo i hipimap ol greps we hem i havestem olgeta long wol ia. Hemi sakem olgeta i go long wan ples we oli stap mekem gudafala waen long hem be i stap aotsaed mo hemi ples we God i stap panisim ol man long hem. ²⁰ Ples blong waen ia i stap aotsaed long taon,mo blad we oli kamaot i fulap spos wan horse i stanap bae i kasem maot blong hem, mo samples wan taosen six handred stadia.