¹ Olsem ol kiaman profet we oli bin kam, ol kiaman tija tu bae oli kam long yu. Bae oli kam wetem ol tingting we i haed blong distroiem yu, bae oli mekem olsem se oli no save masta we i bin pemaot olgeta. Kaen fasin ia bae i kivim en long laef blong olgeta kwik taem. ² Fulap man bae oli folem ol wantem blong seks we oli ting se i oraet, mo tru toktok bae i no kam tru lo olgeta from ol toktok blong olgeta hemi akensem trut. ³ Bae oli kivim ol toktok we i blong kiaman nomo long yu from oli kavetem yu. Panismen blong olgeta i kam long taem finis, mo distraksen blong olgeta hemi olsem wan samting we ino save slip. ⁴ Spos God i no bin panisim ol enjel we oli mekem sin, be hemi putum olgeta iko insaed long hel faea blong stap long jen long tudak kasem taem blong jajmen, ⁵ mo spos hemi no panisim olfala wol, be hemi kipim Noa, wan prija blong raejesnes, wetem sefen narafala man taem hemi distroiem ol man we oli no folem fasin blong God. ⁶ Mo spos hemi bonem daon ol taon blong Sodom mo Komora i kam asis blong faea olsem wan eksampol blong jajmen blong distraksen we bae i hapen long olgeta we oli no folem wanem we hemi wantem, ⁷ be hemi karemaot Lod, we ol man we oli brekem loa blong God oli mekem fasin nogud tumas long hem- ⁸ from raejes man ia istap harem nogud tumas long spiret man blong hem from everi dei taem hemi stap luk mo harem olgeta nogud wok we oli mekem we i no folem loa- ⁹ spos God i mekem olgeta samting ia, i minim se hem i save hao blong karemaot ol raejes man blong hem mo hao blong putum olgeta man we oli no raejes long presen kasem taem we oli kasem panis blong olgeta long dei blong jajmen. ¹⁰ Kaen ia hemi tru fasin blong olgeta we oli wokbaot folem ol korap desaea blong bodi blong olgeta we i ko akensem atoriti blong God. Oli stronk blong mekem wanem we oli wantem mo oli no fraet blong sakem ol toktok we ino kat rispek long hem i go long ol enjel. ¹¹ Ol enjel oli kat bigfala strenkt mo pawa, be oli no tok akensem ol man long foret blong God. ¹² Olgeta man ia oli olsem ol animol we oli nokat pepes, oli bon blong ol man oli kasem olgeta mo kilim ded olgeta. Oli no wantem save long wanem we oli tok nogud iko long hem. Fasin blong olgeta blong spolem man bae i distroiem olgeta, ¹³ bae oli safa nogud olsem presen blong ol harem nogud we oli stap mekem igo long ol man. Oli ting se wanem we oli stap mekem i olsem wan gudfala laef we oli harem gud from. Oli olsem wan klos we mak blong toti i stap long hem mo man we i werem i stap sem from. Oli stap injoiem ol fasin blong kiaman blong olgeta taem oli stap lafet long kakae wetem yufala. ¹⁴ Taem oli luk eni maret woman o man, oli wantem slip wetem, sin i neva satisfiem olgeta. Oli givim toktok we i fosem ol man we oli no feitful long God blong mekem nogud fasin, mo oli trenem hat blong olgeta blong selfis. Kusing i stap long ol pikinini ia! ¹⁵ Oli leko stret rod mo wokbaot olbaot, folem fasin blong Balam pikinini blong Beo, we i laekem blong stap karem mani from ol nogud fasin ia. ¹⁶ Be God hemi rebukem hem from ol sin blong hem- taem hemi mekem animol ia dongki, blong i toktok long hem long vois blong man we i mekem hem blong i stopem fasin ia olsem profet blong ol krangke fasin. ¹⁷ Olgeta man ia oli olsem stampa blong wota we ino gat wota i kamaot long hem mo olsem dak klaot blong ren we win i muvum olbaot. God i makem aot tudak i stap blong olgeta. ¹⁸ Ol toktok blong olgeta i nogat mining long hem. From bodi blong olgeta i wantem nogud fasin, i mekem se oli usum fasin blong seks wetem woman o man we oli no maret wetem blong holem taet ol man we we oli wantem ronwe long laef we i fulap long nogud fasin. ¹⁹ Oli promes se bae oli givim fridom long olgeta, be oli no mekem from we oli ol slev blong korapsen. From man i kam olsem wan slev blong fasin we hemi no save ovakamem. ²⁰ Spos oli bin leko fasin blong korapsen blong wol taem oli save moa long Masta Jisas Kraes we i sevia blong yumi mo bakeken oli ko bak long fasin blong korapsen ia, oli kam nogud olgeta bitim festaem. ²¹ I mo gud spos oli no bin save stret fasin ia festaem from naoia oli save gudfala fasin ia finis be oli tanem raon long ol holi komanmen ia we i bin ko long olgeta. ²² Mo toktok ia we i talem se: " Wan dok i go kakae bak wanem we i traot long hem, mo wan pik we i klin gud i go bak wasem hem long sopmad," i tru nomo.